Read Saluan ROMA 1 Bible Online

ROMA 1 - Saluan bible

ROMA 1

¹To Utu-utus iwi-iwi' i Roma anu nunukalibosi nu Tumpu ka' anu ilagamo nu Tumpu da timbali mian-Nyo anu palesayamo. Tumpu nompile'imo ka' nongangkatmo aku samata-mata da mompolele Lele Ma'ima' lengkat mae hi Tumpu.

²Lele Ma'ima' aijo' jinanji'mo nu Tumpu daagi' pe'e naipuan mae sinisikakonmo nu to nabi-nabi-Nyo ka' tinulismo i uno nu Kitab nu Tumpu.

³Lele Ma'ima' aijo' mongkona Anak nu Tumpu, Tumpunto i Yesus Kristus. Salaku Ia mian, Ia aijo' lee' mae i Daud,

⁴panyo salaku Tumpu Ia memang Anak nu Tumpu. Aijo' nyata' i kuasa anu madi' ko gampanyo kalana mau sinilakamo na Ia panyo po'ule' tinumuu'.

⁵Kalana Ia sahingga Tumpu nombee'imo belengku balakat timbali rasul, da aku — mongangga'i Kristus — molaya' to mia-mian lengkat i songko-songko na bansa da palesaya ka' mohongo-hongo.

⁶Anu minsoop hi iwi-iwi' na bansa, aijo'mo suele komiu anu jojoong i Roma; komiu suele ilagamo da timbali mian palesaya hi Yesus Kristus.

⁷Mokonyo aijo' aku nontulis toka hi komiu. O' amalakon da Tumpu Tuumanto ka' i Tumpu Yesus Kristus mombee'i balakat kopi-kopian hi komiu.

⁸Momonanyo aku montalima kaseh hi Tumpu, kalana i Yesus Kristus ka' mule' hi to Utu-utus iwi-iwi'; kalana songko-songko na dunia nohongomo saba' komiu pinalesayamo hondo hi Kristus.

⁹Aku saja' monginau' komiu de aku balado'a. Tumpu na nonsakisi apaa na anu tinaloakonkumo aijo' memang totu'u. Iamo na Tumpu anu kuku hongo-hongo buke-buke' na kinyonyoangku, aijo'mo mompolele Lele Ma'ima' mongkona Anak-Nyo.

¹⁰Ku kakase hondo hi Tumpu, bisa-bisa' Ia mongka'oho' mompobee' aku uuka aiya mamba montoa komiu.

¹¹Kalana aku mongka'oho' hondo singkabot tiba komiu, da aku timbali mombagi balakat hi komiu lengkat mae hi Roh nu Tumpu da mompohoson komiu.

¹²Kahanda'ku aijo'mo kalana kita bubuu'mo pinalesaya hi Yesus Kristus sahingga kita timbali paimpoho-pohosonan, kapalesaya'an.

¹³ To Utu-utusku! Ku indi da osumbu' miu taalu' saja'mo na aku mompai kahanda'i montoa komiu, panyo saja' ko anu monsalempodi. Ku indi da itina' hi komiu suele kalajangku ko hasinnyo susumo kalajangku anu kinohasinnyomo hi to mia-mian anu misa' Yahudi i tampat-tampat sangga'at.

¹⁴Kalana aijo' aku ko kahanda' mamba i songko-songko na bansa; anu monsumbu'mo atulan tiba anu ma'isa monsumbu' atulan, anu nosikolahmo tiba anu ma'isa nosikolah.

¹⁵Mokonyo aijo' ku indi hondo mompolele Lele Ma'ima' aijo' hi komiu anu suele jojoong i Roma.

¹⁶ Ku palesaya hondo na Lele Ma'ima' aijo', kalana lele aijo' kahosonan nu Tumpu momposalamat iwi-iwi' na mian palesaya; momonanyo hi mian Yahudi, ka' bansa suele sangga'at.

¹⁷ Kalana tiba Lele Ma'ima' aijo', Tumpu nompotiju'mo mosia na bau-baunyo pompahasumbu'an nu mian tiba Tumpu po'ule'mo na'ima'; baunyo aijo'mo palesaya hi Tumpu lengkat pe'e imoonanyo toka-toka i kahimpusannyo. Aijo' pokakana sumo anu tinulismo i uno nu Kitab nu Tumpu, “Mian anu palesayamo hi Tumpu sahingga pompahasumbu'an tiba Tumpu po'ule'mo ma'ima', mian aijo' tionyo tumuu'!”

¹⁸Lengkat mae i suluga' Tumpu nompotoamo tambuha'-Nyo hi iwi-iwi' na dosa' tiba ka'idekan nu mian, kalana ka'idekan mongompo' mian da madi' monsumbu' pokinde' anu totu'u mongkona Tumpu.

¹⁹Apaa na anu nupoko ala nu sumbu' nu mian mongkona Tumpu, i nanasamo i uno nu kinyonyoa nu mian, kalana Tumpu na nomponyata'mo aijo' hi mian.

²⁰Salatanmo pe'e Tumpu nompotimbali dunia, pikilan nu Tumpu anu madi' otoa-toa, aijo'mo salaku tandanyo Ia aijo' Tumpu tiba kuasa-Nyo anu sampe toka sidu-sidutu', timbalimo nu sumbu' nu mian de montoamo iwi-iwi' apaa na anu pinotimbali-Nyomo. Jadi mian madi' hondo-hondo ko pintoongan da mompototu'u butongnyo.

²¹ Mian monsumbu' Tumpu, panyo mian madi' mongadati Ia salaku Tumpu ka' madi' mule' montalima kaseh hi Ia. Ola mule' ahi' mian mompotutugakon anu mamisa-misa'; kinyonyoa nu aha pinintungmo.

²²Aha mongoa'i butong pande, yo aitu aha ponga'.

²³ Misa' Tumpu anu sampe toka sidu-sidutu' na anu osombah nu aha, panyo patong-patong anu montiho to bina-binatang anu timbali mate; aijo'mo mian, tomonsi, binatang anu ko tengkenyo opat, ka' binatang anu jumolo.

²⁴Mokonyo aitu Tumpu nompojohokmo aha nukuasai nu anu okamilui nu kinyonyoa nu aha da mombau anu mahenyu, sahingga aha mombau anu to ide-idek kona hi sangko mian.

²⁵Tumpu anu totu'u, nubalosi nu aha tiba tulu-tulumo anu madi' totu'u. Misa' anu Nompotimbali, panyo anu pinotimbali, aijo'mo na nusombah ka' nupalesaya nu aha. Padahan ahi' anu Nompotimbali na tionyo o puji' sidu-sidutu'! Amin.

²⁶Kalana mian nombaumo anu sumo aijo', sahingga Tumpu Allah nompojohokmo aha mombatuki napisu nu aha anu moko ambang. To boboune nu aha madi'mo mongka'ima'i to momo'ane nu aha susumo ahi' biasanyo hi mian, panyo mongka'ima'imo bubuu' sangko boune.

²⁷Mo'ane mule' sumo aitumo; aha madi'mo tinalakana na mombau pompahakonaan tiba boune, panyo mongka'ima'imo moduhus hi sangko mo'ane. Mo'ane mombau anu moko ambang hi sangko mo'ane, sahingga aha montalima balosnyo anu pokakana tiba bauon nu aha anu ma'idek aijo'.

²⁸Kalana mian madi'mo mongoa'i palalu monsumbu' Tumpu Allah, sahingga Tumpu mompojohok pikilan nu aha da timbali ma'idek, sahingga aha mombau hahan anu madi' timbali nubau nu aha.

²⁹Kinyonyoa nu aha nobuke'mo nu anu toto ma'i-ma'idek, anu madi' totu'u; nobuke'mo nu mangoa, kabusikan tiba saja' mongoa'i singgi; nobuke'mo nu kahanda' mompai patei, mahantuda', mongakali tiba mongingu. Aha mongka'ima'i solaa' monsisik mian sangga'at,

³⁰mongka'ima'i mombusi-busiki sanggo nu mian sangga'at; aha sombong ka' madi' ko adatnyo, anu mongka'ideki Tumpu, ka' mongka'ima'i monsisik anu madi' ko kaliangannyo. Aha pande molio hahan anu bu'ou da timbali mombau anu ma'idek. Aha madi' mompajuli tu'anyonyo;

³¹aha madi' mongka'oho' monsumbu' mian sangga'at; aha panggaga, tiba madi' monsumbu' atulan hi sangko mian.

³²Nusumbu' nu aha, tukoonyo atulan nu Tumpu, mian anu mombau aijo' iwi-iwi' tionyo ohukum mate. Mau mule' sumo aijo' nubau ahi' nu aha na hahan aijo'; tiba mule' monsetujui mian sangga'at mombau.