Read Saluan ROMA 13 Bible Online

ROMA 13 - Saluan bible

ROMA 13

¹Toto samian tionyo mohongo-hongo pamalentah, kalana madi' ko Pamalentah anu madi' mohumpak kuasa lengkat mae hi Tumpu. Ka' pamalentah anu uuka aiya, mompojalan kuasanyo kalana palentah anu lengkat mae hi Tumpu.

²Mokonyo aijo' mian anu panggaga hi pamalentah pokakanamo sumo monggagakon anu pinoto'imo nu Tumpu. Ka' mian anu mombau sumo aijo' montalimamo hukuman.

³Kalana mian anu mombau ma'ima' boli mabuhuk i pamalentah. Ola mian anu mombau anu ma'idek na tionyo mabuhuk. De kita Utus mongindi da kita madi' mongoa'i mabuhuk hi pamalentah, kita Utus tionyo mombau anu ma'ima', sahingga kita Utus o puji'.

⁴Kalana pamalentah posaihon nu Tumpu anu mokalaja bau ka'ima'an. Panyo de kita Utus mombau anu ma'idek, memang kita Utus tionyo mabuhuk hi ia, kalana madi' ola palasuma na ia ko kuasa mohukum mian. Ia posaihon nu Tumpu anu monabu'akon hukuman nu Tumpu hi to mia-mian anu mombau anu ma'idek.

⁵Mokonyo aijo' kita Utus tionyo montapali pamalentah — misa' ola kalana kita Utus madi' mongka'oho' o hukum, panyo kalana molengkat mae ahi' i kinyonyoaum anu mohongo-hongo totu-totu'u.

⁶ Aijo' suele na pu'unyo ka' kadaka' kita Utus mombayan hasin, kalana pamalentah aijo' nu atun nu Tumpu mompojalan kalajanyo aijo'.

⁷Jadi o bayan hi pamalentah apaa na anu tionyo o bayan nu kita Utus hi ia. O bayan na hasin de kita Utus tionyo mombayan hasin; ka' bea o bayan de kita Utus tionyo mombayan bea. O'angga'i na aha de anu tionyo o'angga'i, ka' o'adati na aha de anu tionyo o'adati.

⁸Boli basamaya' apa-apaa mau mule' pa' hi he. Boli mompiakon basamaya' nu liibos hi samian ka' samian. Kalana mian anu mongkalibosi sangko mian nontulutimo atulan iwi-iwi' i Musa.

⁹ Kalana atulan nu agama Yahudi, aijo'mo: Boli masala', boli mompatei, boli mombuling, boli mongkamilui anu nu mian; iwi-iwi' aijo' naninggalumo tiba to atu-atulan sangga'at, kinodo'anmo sahingga pinosa'angu'mo na atulan, aijo'mo, “Kalibosi na sangko mian sumo beleyum mongkalibosi posi butongum.”

¹⁰Mian anu mongkalibosi mian sangga'at, madi' mombau anu ma'idek hi mian aijo'. Jadi mian anu mongkalibosi sangko miannyo, aijo'mo na mian anu nontulutimo iwi-iwi' na jalan nu atulan nu agama.

¹¹Gampanyo nu anu osumbu' miu iwi-iwi' aijo', aijo'mo tempo' uuka tempo'nyomo komiu mobula, bolimo hoyot. Kalana kita oposalamat ko oha-ohaninyomo na tempo'nyo uuka aiya, misa' sumo sala'je kita nontampu'uni pinalesaya.

¹²Pihi ko mingko-mingkotnyomo; ka' daagi' sasaidi' majingkamo. Jadi, sahanyo kita bolimo solaa' mombau anu i uno nu pintung. Kita tionyo montoukaimo butongto nu toongon ponjagai butong aijo'mo jingka.

¹³Kita tionyo mombau anu ko adatnyo sumo anu biasanyo obau sinaa; boli mompopodaka' bau-bauon moliu-liumo anu madi' opoko ala obaunto, kabai malangu. Boli masala', kabai kalakuan anu madi' ko atulannyo. Boli mahantuda' kabai pusa na kinyonyoa.

¹⁴O'asanakon hi Tumpu Yesus Kristus na mompotantu apaa na anu tionyo o bau miu. Ka' boli mombatuki kalakuan nu mian anu baladosa', kahanda' mati ko osai napisu.