Read Saluan ROMA 15 Bible Online

ROMA 15 - Saluan bible

ROMA 15

¹Kita anu totu-totu'u junjuhi' i anu opalesayanto, tionyo sabaan i kabalatan-kabalatan nu mian anu ola tudu-tudu na kapalesaya'annyo. Boli ola kita momposanang posi butongto.

²Ola ahi' kita toto samian tionyo momposanang sangko utusto da bau ka'ima'annyo, da mompaka pahoson na ia palesaya.

³ Kalana i Kristus suele madi' ola mompopikilakon kasanangan nu posi butong-Nyo. I uno nu Kitab nu Tumpu tinulismo sumo uuka, “Iwi-iwi' na alu anu opanjolongakon hi komiu pinotudunmo hi belengku.”

⁴Iwi-iwi' anu tuli-tulis i uno nu Kitab nu Tumpu, aijo' bau pompangajali kita. Kalana pangajalan anu otalimanto i Kitab nu Tumpu mompotimbali kita sabaan ka' mahoson, sahingga kita moko ala montaha'imani Tumpu.

⁵O amalakon hi Tumpu anu nombee'i da sabaan ka' bau pohaase hi mian, montulungi komiu da tumuu' sambuku montuluti sonto' i Kristus Yesus.

⁶Kalana tumuu' sambuku na kita moto Utus iwi-iwi' hingga-hinggat moko ala mompuji' Tumpu, Tuuma nu Tumpunto i Yesus Kristus.

⁷Mokonyo aijo' tionyo to Utu-utus mompaha tali-talima samian ka' samian nu kinyonyoa sanang, sumo i Kristus suele nontalima komiu bau pompopodaka' Tumpu.

⁸Kalana, o inau', i Kristus nongajanmo mian nu Yahudi bau pomposumbu' saba' Tumpu madi' baleko' nongganapimo iwi-iwi' na janji'-Nyo hi mompolee'to.

⁹ I Yesus suele nompotimbalimo to bansa-bansa sangga'at nompopodaka' Tumpu, kalana ka'ima'an nu kinyonyoa-Nyo hi aha. I uno nu Kitab nu Tumpu tinulismo sumo uuka, “Mokonyo aijo' aku mompuji'mo Kita Tumpu aijo' hi aha to bansa-bansa, aku monyanyije pompuji' sanggon-To.”

¹⁰ Daagi' mule' tinulis sumo uuka, “Balame-lame'mo hingga-hinggat tiba mian anu palesayamo hi Tumpu anu pinile'anyomo, o to bansa-bansa!”

¹¹ Ka' aiya mule', “Iwi-iwi' bansa tionyo mompuji' Tumpu, tionyo iwi-iwi' na mian mompuji' Ia!”

¹² Ka' aiya suele na anu tinaloakonmo i Yesaya, “Lengkat mae hi lee' i Isai tokaje na sala'samian anu mompalentah to bansa-bansa; hi Ia na bau kataha'imanan nu to bansa-bansa.”

¹³Tumpu aijo'mo na tampat anu otaha'imani miu. O amalakon iaje na mongisi kinyonyoaum nu iwi-iwi' na kalame'an ka' ka'ima'an, kalana komiu palesaya hi Ia, da kalana kuasa nu Roh nu Tumpu komiu mompaka taha'iman hi Tumpu.

¹⁴To Utu-utus! Kusumbu' hondo daagi' manjoo' na anu ma'ima' hi komiu. Komiu suele monsumbu' iwi-iwi' aijo', ka' mule' timbali mompaha pogu-pogulu' samian tiba samian.

¹⁵Panyo mongkona hahan anu natantumo kupokeman hi komiu totu-totu'u i sulat aiya, kalana Tumpu nombee'mo kalaja aiya hi belengku.

¹⁶Ia nompotimbalimo aku posaihon i Kristus Yesus da osai hi to bansa-bansa anu misa' Yahudi. Ka' aku nompojalanmo sumo salaku imam, anu mompolele Lele Ma'ima' lengkat mae hi Tumpu, da to mia-mian anu misa' Yahudi timbalimo salaku anu osombahkon hi Tumpu Allah anu timbali Nutalima. O amalakon da Roh nu Tumpu mompotimbali aha da timbali salaku anu osombahkon samata-mata hi Tumpu.

¹⁷Jadi, kalana aku nosa'angu'mo tiba i Kristus Yesus, sahingga aku timbali mongoa'i lame' i uno nu kalajangku bau kapentingan nu Tumpu.

¹⁸Aku baani basisik sumo aijo' ola mongkona apaa na anu binaumo i Kristus hi belengku da mompotimbali to mia-mian anu misa' Yahudi mohongo-hongo Tumpu. Aku nompojalan aijo' tiba potatae, kabai mule' tiba hahan anu binaungkumo,

¹⁹ka' mule' tiba hahan anu okabangangi ka' anu ma'isa toho' tinimbali; iwi-iwi' aijo' kalana kuasa nu Roh nu Tumpu Allah. Lele Ma'ima' mongkona i Kristus pinolelengkumo iwi-iwi' hi to mia-mian nolengkat pe'e mae i Yerusalem tinoka-toka i Ilirikum.

²⁰Anu ku kahanda'i aijo'mo mompolele Lele Ma'ima' anu lengkat mae hi Tumpu i tampat-tampat iya na anu ma'isa nohongo mongkona i Kristus. Kalana aku madi' mongka'oho' mombau kalaja opotinjo i mesen anu binau nu mian sangga'at.

²¹ I uno nu Kitab nu Tumpu tinulismo, “To mia-mian anu ma'isa toho' nohumpak lele-Nyo aijo', montoaje; ka' aha anu ma'isa toho' nohongo, monsumbu'je.”

²² Mokonyo aijo' aku saja'mo ko anu nolingkang na mamba montoa komiu.

²³Panyo u'uka aiya kalajangku i da'erah haha aijo' i ningkotmo. No tau-taunmo na kopinnyo aku nontanto mamba montoa komiu.

²⁴Saidi' mae de aku mamba motulu i kota miu mokiijo' i Spanyol o amalakon mae da timbali singkabot tiba komiu, ka' lame' sasaingoni' tiba komiu. Lapas aijo' ku poita da komiu timbali montulungi aku mamba mokiijo' i Spanyol aijo'.

²⁵ Panyo uuka aiya aku mongka'oho'mo mamba i Yerusalem momboa pontulungi mian anu pinalesayamo hi Tumpu kiijo' mae.

²⁶Kalana to jama'-jama'at i Makedonia ka' i Akhaya nonsetujuimo mombee'i pontulungi to Utu-utus anu kasiasi, hi mian anu palesayamo hi Tumpu kiijo' mae i Yerusalem.

²⁷ Tiba kinyonyoa sanang aha nomputusimo da mombau sumo aijo'. Memang konanyomo na aha patut montulungi to utu-utus anu kasiasi i Yerusalem aijo'; kalana mianmo nu Yahudi haha aijo', sahingga mian anu misa' Yahudi nohumpakmo to bala-balakat anu lengkat mae hi Tumpu. Jadi to mia-mian anu misa' Yahudi aijo' patut suele montulungi to mia-mian Yahudi nu to bala-balakat, susumo lapangnyo to bala-balang.

²⁸De kupoko baumo na kalajangku aiya, ka' mombee'mo hi aha kiijo' mae i Yerusalem, pontulungi anu ilimu'mo aijo', saba' aku mambaje i lipu' Spanyol motulu i kota komiu.

²⁹De aku toka hi komiu, tantu aku momboa manjoo' na balakat lengkat mae hi Kristus toka hi komiu.

³⁰Tiba sanggo nu Tumpunto i Yesus Kristus, ka' tiba kalibosan anu binee' mae nu Roh nu Tumpu, kupoita sabole-boleh hi komiu da aku tiba komiu mondo'akon mae totu-totu'u aku hi Tumpu Allah.

³¹Balado'a da Tumpu molapasakon aku i lima nu to mia-mian anu madi' palesaya kiijo' mae i Yudea, da kalajangku momboa pontulungimo kiijo' i Yerusalem otalima nu kinyonyoa sanang nu mian anu palesayamo hi Tumpu kiijo' mae.

³²Desumo aitu, maluannyo nukahanda'i nu Tumpu, aku toka hi beleyum tiba kinyonyoa sanang. Ka' aku mongoa'ije lame' tiba komiu itina'.

³³O amalakon da Tumpu mombee'i mae kabilahian hi mian mombalakati komiu Utus iwi-iwi'. Amin.