Read Saluan ROMA 2 Bible Online

ROMA 2 - Saluan bible

ROMA 2

¹ Mokonyo aijo', to Utu-utus, te ihe na kita Utus sahingga kita Utus mompisala'i mian sangga'at? Kita Utus madi' koko mohumpak apa-apaa de mompototu'u posi butong! Kalana de kita Utus mompisala'i mian sangga'at, yo aitu posi kita Utus suele mombau hia anu sumo hia nu aha, nyata' kita Utus mosi nabu'akonmo hukuman suele hi butong.

²Osumbu'to de Tumpu monabu'akon hukuman hi to mia-mian anu mombau hia sumo aijo', pomputusi nu Tumpu aijo' totu'u.

³Panyo komiu, to Utu-utus, mombau suele i posi butong hahan anu otukakon miu hi mian sangga'at! Ka' o tutugi miu, komiu madi' nukona nu hukuman nu Tumpu?

⁴Kabai o oa'i miu dengke na kanonongan nu Tumpu tiba ka'ima'an nu kinyonyoa ka' kasabalan-Nyo anu daka' hondo sumo aijo'? Tantu osumbu' miu te Tumpu mompotoa ka'ima'an nu kinyonyoa-Nyo kalana Ia mongkahanda'i da komiu bolimo daagi' mombau to dosa-dosa' miu.

⁵Panyo komiu panggaga hondo, madi' mongka'oho' mombabaali'i. Kalana aijo' posi komiu na nombau hukuman miu mompaka maboat i Sinaa Kakiamatan, de Tumpu mompotoamo tambuha'nyo, ka' monabu'akonmo hukuman anu adin.

⁶ Kalana Tumpu mombalosakonmo hi toto samian pokakana tiba apaa na anu binaunyomo.

⁷Tumpu mombee'i kantumuu'an kopian ka' sidu-sidutu' hi aha anu sabaan mombau anu ma'ima' da pohumpakan anu ko angga'nyo, anu opopodaka' ka' toka sidu-sidutu'.

⁸Panyo to mia-mian anu ola monginau' posi butong ka' madi' montapali Tumpu, panyo ola mombatuki anu ma'idek, to mia-mian haha aijo' nu tambuha'i hondo nu Tumpu.

⁹Batu-batu mian anu mongka'ima'i mombau ka'idekan tionyo sansala' ka' sakisa; momoonanyo mian nu Yahudi, ka' suele bansa-bansa sangga'at.

¹⁰Panyo iwi-iwi' mian anu mongka'oho' mombau anu ma'ima', tionyo obee'i anu opopodaka' ka' anu o adati tiba ka'ima'an lengkat mae hi Tumpu; momoonanyo hi mian Yahudi, sumo aitu mule' hi to mia-mian bansa sangga'at.

¹¹ Kalana Tumpu mompoposia iwi-iwi' mian pokakana.

¹²To mia-mian bansa sangga'at baladosa' panyo madi' monsumbu-sumbu' atulan nu agama Yahudi. Jadi aha ohukum i sambiha'nyo nu atulan aijo'. Panyo to mia-mian Yahudi baladosa' salatan nonsumbu'mo atulan aijo'; mokonyo aijo' aha ohukum suele susumo koonyo nu atulan aijo'.

¹³Kalana mian po'ule'mo ma'ima' tiba Tumpu, misa' kalana mian aijo' nonsumbu'mo atulan nu agama Yahudi, panyo kalana ia nombaumo apaa na anu tuli-tulis i uno nu atulan aijo'.

¹⁴To mia-mian bansa sangga'at madi' monsumbu' atulan nu agama Yahudi. Panyo de posi kahanda' nu aha na mombau apaa na pinalentakon nu atulan aijo', posi kinyonyoa nu aha na timbali atulan nu aha, mau mule' aha madi' monsumbu' atulan nu agama Yahudi.

¹⁵Kalakuan nu aha na mompotiju' apaa na anu pinalentakon nu atulan aijo', tuli-tulis i uno nu kinyonyoa nu aha. Kinyonyoa nu aha suele momponyata' hahan aijo', kalana posi aha toto minsan o pisala'i ka' toto minsan opototu'u nu pikilan nu aha.

¹⁶Sumo aijo'mo na anu saidi' mae timbali i sinaa anu tinantukanmo aijo'. I sinaa aijo' — koonyo nu Lele Ma'ima' anu kupo-kupolele — Tumpu hi Yesus Kristus na momputusi iwi-iwi' na lahasia nu kinyonyoa ka' pikilan nu mian iwi-iwi'.

¹⁷Panyo uuka posi komiu mosia to Utu-utus? Kita Utus mangaku mian nu Yahudi. Kita Utus mintoong i atulan nu agama Yahudi, ka' kita Utus mongoa'i daka' na kinyonyoa i pompahasumbu'an nu kita Utus tiba Tumpu.

¹⁸Kita Utus nohumpak pokinde-pokinde' lengkat i atulan aijo' sahingga kita Utus nonsumbu'mo montantukan iyaa na anu ma'ima'.

¹⁹Kita Utus mangaku totu-totu'u tukooyum kita Utus te polaya' mian mapisok, ka' jingka hi aha anu i uno nu pikat;

²⁰kita Utus mompogulu' to mia-mian anu tabiatnyo ma'idek, ka' gulu' nu to mia-mian ponga'. Kita Utus mangaku totu-totu'u i uno nu atulan nu agama Yahudi, kita Utus monsumbu' iwi-iwi' kapandean ka' pangajalan anu totu'u.

²¹Kita Utus mompogulu' mian sangga'at; yo, kadaka' kita Utus madi' mompogulu' posi butong? Kita Utus mompogulu' mian da boli mombuling, yo aitu kita Utus mombuling!

²²Kita Utus mompogulu' mian da boli masala', yo aitu posi kita Utus masala'! Kita Utus mongka'ideki pilogot, yo aitu posi kita Utus mongala palabuat nu to lai-laigan bapilogotan.

²³Kita Utus mombuulakon tukonto, kita Utus daagi' ko atulan i Musa, yo aitu posi kita Utus mompopo'ise' Tumpu tiba mule' madi' montapali atulan-Nyo.

²⁴ I uno nu Kitab nu Tumpu tinulis sumo uuka, “Kalana komiu to mia-mian nu Yahudi, sahingga sanggo nu Tumpu binusikanmo i tonga-tonga' nu bansa-bansa sangga'at.”

²⁵De kita Utus mombatuki hondo-hondo atulan nu agama Yahudi yo sunat nu kita Utus ko kaliangannyo ahi. Panyo de kita Utus madi' moko batuki anu pinalentakon i uno nu atulan aijo', yo sunat nu kita Utus madi' hondo ko kaliangannyo.

²⁶De samian misa' Yahudi anu madi' sinunat, mombatukimo atulan nu agama Yahudi, te misa' nutalimamo nu Tumpu susumo mian anu sinunatmo?

²⁷Ka' to mia-main anu madi' sinunat aijo' mompisala'imo kita Utus mian nu Yahudi, kalana kita Utus daagi' ko atulan nu agama Yahudi, ka kita Utus sinunatmo, panyo kita Utus molanggai atulan aijo'. Aha madi' sinunat, panyo ahamo na anu montanga'imo atulan nu agama Yahudi.

²⁸Kalana mian anu totu-totu'u Yahudi misa' ola asan sanggonyo mian nu Yahudi; ka' mian anu totu-totu'u sinunat misa' ola sinunat tudu-tudu i butong.

²⁹ Panyo sabenannyo ahi', samian anu totu-totu'u Yahudi aijo'mo mian anu mingkinyonyoa Yahudi, ka' anu totu-totu'u sinunat, aijo'mo sunat i uno nu kinyonyoa anu binau nu Roh nu Tumpu, misa' anu tinulis i uno nu kitab. Mian anu sumo aijo' mohumpak pompuji' lengkat hi Tumpu, misa' lengkat hi mian.