Read Saluan ROMA 3 Bible Online

ROMA 3 - Saluan bible

ROMA 3

¹Desumo aijo' apaa na untungnyo timbali mian nu Yahudi? Ka' apaa na kaliangannyo mombatuki atulan nu sunat?

²Tantu manjoo' na gunanyo! Momoonanyo, kalana hi mian nu Yahudi Tumpu montaha'imani da obau apaa na koonyo nu potatae nu Tumpu.

³Panyo mosia de sambagian na mian nu Yahudi madi' mohongo-hongo? Pa' kalana aijo' sahingga Tumpu madi'mo mongkalibosi aha?

⁴ Tantu misa'! Kalana manasamo Tumpu saja' totu'u, mau mule' batu-batu mian baleko'. I uno nu Kitab nu Tumpu tinulis, “Kahanda'nyo beleyum saja' o toa totu'u apaa na anu tinaloakonum, ka' mule' beleyum untung de tempo'nyomo oputusi na beleyum.”

⁵Panyo de ka'adinan nu Tumpu konyata-nyata'nyomo, kalana kita mombau anu madi' totu'u, apaa na anu ka'oho' otaloakonto? Tebolong Tumpu madi' adin de ia mohukum kita? (Memang anu opokilawa aiya, pantas de susumo mian.)

⁶Totu-totu'u madi'! Kalana de Tumpu madi' adin, mosia na Ia timbali momputusi dunia aiya?

⁷Panyo de kalana bauon anu madi' totu'u, apaa na anu totu'u mongkona Tumpu konyata-nyata'nyomo sahingga Ia o puji', ka' kadaka' mian anu mombau ma'idek aijo' daagi' opisala'i sumo mian baladosa'?

⁸Ka' kadaka' kita madi' timbali montaloakon, “Sahanyo kita mombau anu ma'idek da lubat na ka'ima'an?” Memang daagi' ko to mia-mian anu mongalu aku, nontaloakon tukoonyo, aku nontaloakonmo sumo aijo'. To mia-mian anu sumo aijo' nukonamo na o hukum nu Tumpu.

⁹Jadi, te kita mian nu Yahudi lebe ma'ima' molingkudui bansa sangga'at? Totu-totu'u madi'! Pinoko taloakonkumo mau mian nu Yahudi kabai bansa sangga'at, iwi-iwi' kinuasanmo nu dosa'.

¹⁰ Sumo anu tinulis i uno nu Kitab nu Tumpu, “Madi' ko samian pe'e na anu totu'u,

¹¹madi' ko samian pe'e na anu monsumbu' ka' madi' ko samian pe'e na anu monsombah hi Tumpu.

¹²Iwi-iwi' mian natikojo'onmo hi Tumpu, iwi-iwi' pinonga'mo. Madi' ko samian pe'e na mombau anu totu'u; samian pe'e madi'!

¹³ Gogohong nu aha sumo kubun anga-anga'. Pangakali ka' baleko' nu aha mo'ili lengkat mae i jila' nu aha, ka' biwi nu aha monsabatakon pitana', sumo bisa nu ulo.

¹⁴ Nganga' nu aha saja' montuda'i balaa' ka' laloasa.

¹⁵ Langkas nu aha malia'mo, de kahanda'mo monsakisa ka' mompatei mian.

¹⁶Kapohopu'an tiba kasusa'an, nubau nu aha iyaya mae.

¹⁷Madi' nusumbu' nu aha na jalan mamba i ka'ima'an,

¹⁸ ka' madi' mongadati Tumpu.”

¹⁹Uuka aiya osumbu'to taalu' iwi-iwi' na anu tinulis i uno nu atulan nu agama Yahudi, kona hi to mia-mian anu daagi' i aluk nu palentah nu atulan aijo'. Desumo aitu madi' ko samian pe'e na moko ala mombee'i katalangan da bau kahondoan mule', ka' songko-songko na dunia timbali nu tuntut nu Tumpu.

²⁰ Kalana madi' ko samian pe'e na moko ala mompaha ima' tiba Tumpu, kalana mian aijo' mombau hahan anu daagi' i uno nu atulan nu agama. Ola ahi' atulan aijo' na mompotiju' hi mian taalu' mian aijo' baladosa'.

²¹Panyo uuka aiya Tumpu nompotiju'mo jalan, mosia na mian mompaha ima' tiba Ia; ka' jalannyo aijo' madi' ko tuusanannyo tiba atulan nu agama Yahudi. Kitab-kitab i Musa tiba kitab-kitab nu to nabi-nabi memang nompoto'imo han aijo',

²² saba' Tumpu nombaumo da mian timbali mompaha ima' tiba Ia, de mian palesaya hi Yesus Kristus. Tumpu nombau sumo aijo' kona hi iwi-iwi' mian anu palesaya hi Yesus Kristus; kalana madi' oposi posangalasan na samian ka' samian.

²³Iwi-iwi' mian binaladosa'mo hi Tumpu anu kahanda' momposalamat aha.

²⁴Ola kalana balakat nu Tumpu samata-mata anu i halala'akon, pompahasumbu'an nu Tumpu tiba mian timbali mompo'ule' ma'ima'; baunyo aijo'mo: mian pinobebas i Yesus Kristus.

²⁵Tumpu nongkolobanakonmo i Yesus Kristus, da kalana Ia sinilaka aijo' mian natantumo pinobebasmo i kasala'an de aha palesaya hi Ia. Tumpu nombau sumo aijo' da mompotoa ka'adinan-Nyo. Kalana tempo' anu i hikuhakonmo Tumpu nonsabalakonmo dosa-dosa' nu mian, sahingga Ia madi' nohukum aha.

²⁶Panyo uuka aiya Ia nontantukanmo kaputusan nu dosa' bau pomponyata' ka'adinan-Nyo. Tiba jalan aijo' Ia mompotoamo saba' butong-Nyo totu'u; ka' batu-batu mian anu palesayamo hi Yesus Kristus nutantukanmo mian anu po'ule'mo nompaha ima' tiba Tumpu Allah.

²⁷Mokonyo aitu madi' ko pintoongan hi kita mongkabubuunakon. Kadaka' sumo aitu? Ugaat kalana kita mombau anu tuli-tulis i uno nu atulan nu agama Yahudi? Misa'. Panyo kalana kita palesaya.

²⁸Kalana pato'nyo nu sisik sumo uuka: Mian anu po'ule'mo mompaha ima' tiba Tumpu, misa' kalana ia nombaumo anu tuli-tulis i uno nu atulan nu agama Yahudi, panyo kalana palesayamo hi Yesus Kristus.

²⁹Kabai o, Tumpu aijo' ola Tumpu nu mian Yahudi? Te misa' Ia suele Tumpu nu bansa sangga'at? O, memang Ia suele Tumpu nu bansa sangga'at!

³⁰ Kalana Tumpu ola sa'angu'. Iamo na nombau da moko ala na to mia-mian Yahudi timbali mompaha ima' mule' tiba Tumpu kalana aha palesaya. Ka' Iamo mule' na nombau da moko ala na to mia-mian bansa sangga'at po'ule' mompaha ima' tiba Tumpu; aijo' suele kalana aha palesaya.

³¹Ugaat aiya na alati'nyo kalana kita palesaya hi Kristus, sahingga kita nontibahakonmo atulan nu agama Yahudi? Misa' hondo-hondo! Ola o, kalana kapalesaya'anto aijo', kita nohalagaimo atulan iajo'.