Read Saluan ROMA 6 Bible Online

ROMA 6 - Saluan bible

ROMA 6

¹Desumo aitu, apaa na timbali otaloakonto? Pa' timbali na kita sabau-baunyomo dosa' da Tumpu mompaka kalibosi kita?

²Tantu madi'! Dosa' madi'mo mongkuasai kita, jadi, te toho' kita saja'mo tumuu' mombau dosa'?

³Osumbu' nu to Utu-utus na tempo'nyo kita pinalamandikan, kita pinosa'angu'mo tiba Kristus Yesus? Aijo' alati'nyo kita pinosa'angu'mo tiba kasilakan-Nyo.

⁴ Tiba palamandian aijo' kita ilamunmo tiba i Kristus ka' sinilakamo hingga-hinggat tiba Ia, da sumo i Kristus sinilaka po'ule' pinotumuu' kuasa nu Tuuma anu daka', sumo aitumo mule' na kita timbali monjalani sa'angu' na kantumuu'an anu bu'ou.

⁵De kita tinimbalimo sa'a-sa'angu' tiba i Kristus kalana kita sinilakamo hingga-hinggat tiba Ia, kita mosa'angu'mo tiba Ia mule', kalana kita po'ule'mo opotumuu' suele susumo Ia.

⁶Osumbu'to na kalakuanto anu piniinmo salaku mian sinilakanmo hingga-hinggat tiba i Kristus i kau' salib da kuasa nu kalakuanto anu baladosa' aijo' madi'mo ko kaliangan-Nyo; tiba jalan aijo' kita madi'mo daagi' nubotuani nu dosa'.

⁷Kalana de batu-batu mian anu silakamo mian aijo' opobebasmo i kakuasa'an nu dosa'.

⁸De kita matemo hingga-hinggat tiba i Kristus opalesayantomo taalu' kita suele ahi' tumuu'mo hingga-hinggat tiba Ia.

⁹Kalana osumbu'tomo i Kristus sinilaka po'ule'mo pinotumuu' ka' Ia madi'mo po'ule' silaka; kasilakaan madi'mo daagi' mongkuasai butong-Nyo.

¹⁰Kasilakaan anu ingoa'an i Kristus aijo'mo kasilakaan kalana dosa'. Aijo' ola minsan na tinimbali toka sidu-sidutu'. Ka' kantumuu'an anu ingoa'an-Nyo uuka aiya, kantumuu'anmo bau bagi nu Tumpu.

¹¹Komiu tionyo suele mangaku butongum silaka kalana dosa', panyo tumuu' iuno nu pompahasumbu'an anu madodo tiba Tumpu aijo' ohumpak hi Kristus Yesus.

¹²Bolimo daagi' mompobee' dosa' mongkuasai kantumuu'an anu madi' toka sidu-sidutu' aiya, da kita Utus bolimo mombatuki pongka'oho'um anu ma'idek.

¹³Boli mule' kita Utus mombee' bagi-bagian nu butongum i kuasa nu dosa' ka' opakemo i to kaha-kahanda' anu ma'idek. Panyo simpalakonmu na butongum hi Tumpu salaku mian anu ilalinmo lengkat i kasilakaan mokiijo' i kantumuu'an. Simpalakonmo na butongum iwi-iwi' hi Tumpu da opake mombau kahanda' nu Tumpu.

¹⁴Dosa' madi'mo timbali mongkuasai komiu, kalana komiu madi'mo tumuu' i 'aluk nu atulan nu agama Yahudi, panyo i balakatmo nu Tumpu.

¹⁵Uuka aiya, mosia na katotu'uannyo? Timbali na kita mombau dosa', kalana kita madi'mo i 'aluk nu kuasa nu atulan nu agama Yahudi, panyo i 'alukmo nu balakat nu Tumpu? Madi' hondo-hondo!

¹⁶Osumbu'mo miu, de komiu mombee' butong miu pa' hi he da mombau pongka'oho'nyo, saba' komiu botuanmo nu mian anu ohongo-hongo miu aijo' — ugaat botuan nu dosa' anu momboa komiu i kapatean, kabai posaihon anu mohongo-hongo Tumpu, ka' tiba jalan aitu mompo'ule' ma'ima' tiba Tumpu.

¹⁷Panyo talima kaseh hi Tumpu! Kalana u'utu mae komiu tinimbalimo botuan nu dosa', panyo uuka aiya komiu buke-buke' na kinyonyoa mohongo-hongomo pangajalan anu totu'u, anu binee'mo hi beleyum.

¹⁸Komiu pinobebasmo i dosa', ka' uuka aiya tinimbalimo posaihon mombau kahanda' nu Tumpu.

¹⁹Kalana mongalati'i, komiu ma'isa moko ala, aku nompake sonto-sonto' tobotuanan da lebe dengke na komiu mangalati'. U'utu mae komiu mombee' butong miu iwi-iwi' salaku botuan nu hahan anu mahenyu ka' anu ma'idek bau kapentingan nu han anu ma'idek. Sumo aitumo mule' tempo' uuka, tionyo komiu monsimpalaakon butong miu iwi-iwi' salaku posaihon mombau pongka'oho' nu Tumpu, apaa na anu nukahanda'i nu Tumpu da miu susi'.

²⁰Tempo'nyo komiu binotuanan nu dosa', komiu madi'mo kinuasaan nu pongka'oho' nu Tumpu.

²¹Tempo'nyo aitu ka'untungan apaa na anu tinalima miu i hahan uuka aiya oka'ambangakon miu na o bau? Bauon haha aijo' ola momboa i kapatean!

²²Panyo uuka aiya komiu pinobebasmo i dosa', ka' tinimbalimo posaihon nu Tumpu. Ka'untunganum aijo'mo kita Utus tumuu' matungka' bagi nu Tumpu ka' han aijo' mohasinakon tumuu' kopian ka' toka sidu-sidutu'.

²³Kalana kapatean aijo' tambo nu dosa'; panyo tumuu' kopian ka' toka sidu-sidutu' tiba i Kristus Yesus Tumpunto, aijo'mo tajuu anu i halala'akonmo nu Tumpu.