Read Saluan ROMA 8 Bible Online

ROMA 8 - Saluan bible

ROMA 8

¹Uuka aiya madi'mo ko pohukuman hi aha anu tumuu' mosa'angu' tiba i Kristus Yesus.

²Kalana atulan nu Roh nu Tumpu na mombau kita tumuu' mosa'angu' tiba i Kristus Yesus nompobebasmo aku lengkat i atulan anu monsaduakon dosa' ka' kapatean.

³Apaa na anu madi' opoko bau nu atulan nu agama, kalana kita mian madi' moko ala mombau, aijo' binaumo nu Tumpu. Tumpu nohungku'imo kuasa nu dosa' anu i uno nu sipat nu mian, aijo'mo nonsai posi Anak-Nyo na tinoka nimbalu-balu sumo mian anu baladosa' da mongalini dosa'.

⁴Binau nu Tumpu sumo aijo' da pongka'oho'-Nyo anu pinoto'inyo i atulan nu agama Yahudi aijo' timbali ojalanakon i uno nu butong anu tumuu' mombatuki pongka'oho' nu Roh nu Tumpu Allah, ka' misa' mombatuki sipat nu mian.

⁵To mia-mian anu tumuu' mombatuki sipat nu mian saja' mompopikilakon apaa na anu nukahanda'i nu sipat nu mian. Panyo to mia-mian anu tumuu' mombatuki pongka'oho' nu Roh nu Tumpu Allah, saja mompopikilakon apaa na anu nukahanda'i nu Roh nu Tumpu.

⁶De pikilanum kinuasanmo nu sipat nu mian, saba' ahennyo kapatean. Panyo de pikilanum kinuasanmo nu Roh nu Tumpu, saba' ahennyo aijo'mo na kantumuu'an ka' kadamean tiba Tumpu Allah.

⁷Mian anu pikilannyo kinuasanmo nu sipat nu mian, mian aijo' mompaha bali'mo tiba Tumpu; kalana mian aijo' madi' mohongo-hongo atulan nu Tumpu; ka' memang ia madi' moko ala mohongo-hongo atulan nu Tumpu.

⁸To mia-mian anu tumuu' mombatuki sipat nu mian, madi' moko posanang Tumpu.

⁹Panyo komiu madi' tumuu' mombatuki sipat nu mian. Komiu tumuu' mombatuki pongka'oho' nu Roh nu Tumpu — de memang, Roh nu Tumpu totu-totu'u montoongi kuasa i uno nu butongum. Mian anu madi' ko Roh i Kristus, mian aijo' misa' i Kristus na tumpunyo.

¹⁰Panyo de i Kristus tumuu' i uno nu butongum, saba' mau mule' butongum mate kalana dosa', panyo Roh nu Tumpu mombee'i kantumuu'an hi beleyum, kalana pompahasumbu'anum tiba Tumpu na'ima'mo.

¹¹ De i Kristus sinilaka, pino tumuu' nu Roh nu Tumpu, tumuu' i uno nu butongum, saba' Ia anu nompotumuu' i Kristus tempo'nyo Ia sinilaka aijo' sueleje mompotumuu' butongum anu timbali silaka aijo'. Ia mombau aijo' nu Roh-Nyo anu tumuu' i uno nu butongum.

¹²Mokonyo aijo' to Utu-utus, kita tionyo mohongo-hongo apaa na anu o bau; panyo misa' tionyo mombau anu mombatuki sipat nu mian; kita madi' palalu tumuu' mombatuki pongka'oho'nyo.

¹³Kalana de komiu tumuu' mombatuki sipat nu mian, saba' komiu ola mate; panyo de kuasa nu Roh nu Tumpu, komiu saja' mompatei apa-apaa na anu obau, anu moko baladosa', atina'je yo komiu tumuu'.

¹⁴To mia-mian anu nukuasai nu Roh nu Tumpu, aijo' ana-anak nu Tumpu.

¹⁵ Kalana Roh nu nubee' nu Tumpu hi komiu, madi' monsaduakon komiu timbali botuan, sahingga komiu tumuu' i uno nu kabuhukan. Ola o, Roh nu Tumpu aijo' mompotimbali komiu to ana-anak nu Tumpu. Ka' kalana kuasa nu Roh nu Tumpu aijo', kita molaga Tumpu aijo', “Tuuma, o Tuumangku!”

¹⁶Roh nu Tumpu tiba roh to momponyata' saba' kita aitu ana-anak nu Tumpu.

¹⁷Jadi, de kita to ana-anak-Nyo, tantu kita mule' ko hak mohumpak hi Ia, anu tionyo montalima to bala-balakat anu pinosadiamo nu Tumpu bau bagi nu to ana-anak-Nyo. Kita tionyo mohumpak hingga-hinggat tiba i Kristus apaa na anu pinosadiamo nu Tumpu hi Ia; kalana de kita mongoa'i sansala tiba i Kristus, kita suele opopodaka' tiba Ia.

¹⁸Iwi-iwi' na kasansala'an anu o'oa'into uuka aiya, de aku na montutugi, madi' opoko ala opokakanakon tiba kabilahian anu oponyata' hi kita.

¹⁹Songko-songko na dunia daka-daka' na kinyonyoa montanda'i te tempo'nyo Tumpu momponyata' to ana-anak-Nyo.

²⁰ Kalana dunia pinojohokmo da mojojoo', misa' kalana posi pongka'oho'nyo, panyo kalana Tumpu na mompojohok sumo aijo'. Mau mule' sumo aijo' daagi' ahi' ko anu otaha'imani aiya:

²¹daagi' ko sa'angu' na tempo' dunia aiya opobebas i kakuasa'an anu mongidei, ka' hingga-hinggat opomaladekamo tiba to ana-anak nu Tumpu.

²²Osumbu'to sampe toka tempo' uuka aiya songko-songko na dunia notusa'mo kalana nongoa'imo sansala, sumo samian na totina mongoa'i sansala de mompohampemo anak.

²³ Ka' misa' ola songko-songko na dunia na motusa'; kita suele motusa' i uno nu kinyonyoanto. Kita nohumpakmo Roh nu Tumpu Allah, panyo kita daagi' po'ule' montanda'i Tumpu mompobebas butongto iwi-iwi' ka' mompotimbali kita to ana-anak-Nyo.

²⁴Kalana samata-mata montaha'imani apaa na anu jinanji'nyomo, sahingga kita oposalamat. Panyo de anu otaha'imaninto aijo' tinoantomo, saba' aijo' misa'mo anu otaha'imani. Kalana ihe na daagi' montaha'imani apa-apaa i han anu tinoanyomo?

²⁵Panyo de kita montaha'imani apa-apaa anu ma'isa tinoanto, yo kita sabaan na montanda'i.

²⁶Sumo aitumo na Roh nu Tumpu toka montulungi kita de kita madi' mahoson. Kalana madi' osumbu'to mosia na tionyo kita balado'a; posi Roh aijo' na mangadap hi Tumpu mompoita kon apa-apaa na anu opalaluinto, kalana kapalaluan anu talalomo manjoo', sahingga madi'mo opoko taloakon.

²⁷Panyo Tumpu anu monsumbu' isi nu kinyonyoa nu mian, monsumbu' pongka'oho' nu Roh aijo' na mompoita hi Tumpu Allah bau bagi nu mian anu palesaya hi Tumpu, ka' pokakana tiba pongka'oho' nu Tumpu.

²⁸Osumbu'to Tumpu monsipatakon iwi-iwi' na han sahingga mohasinakon anu ma'ima' bau bagi nu to mia-mian anu mongkalibosi Ia, ka' anu ilaga-Nyomo pokakana tiba tanga'an-Nyo.

²⁹Aha anu pinile'anmo nu Tumpu, pinoko tantukanmo lengkat pe'e i imomoonanyo da timbali pokakana sumo Anak-Nyo, aijo'mo i Yesus Kristus. Kalana aitu Anak aijo' timbalimo anu tongkoimoona hi aha anu moto utus manjoo'.

³⁰Sumo aijo'mo na Tumpu nolaga aha anu tinantukanmo imoona; ka' aha anu ilaga-Nyo aijo', timbali nupobee' mompaha ima' tiba Ia. Ka' aha nupobee' mompaha ima' mule' tiba Tumpu Allah, mongala bahagian i kantumuu'an nu Tumpu.

³¹Apaa na anu opoko taloakon uuka aiya mongkona iwi-iwi' aijo'? De Tumpu mosambiha' hi kita, ihena moko ewa kita?

³²Posi Anak-Nyo madi kinalibosan-Nyo, panyo binee'-Nyo bau kapentingan nu kita iwi-iwi'; te madi' mule' Ia mombee' hi kita anu sasangga'atannyo?

³³Ihe na anu moko ala mohenggo kita mian anu palesayamo ka' pinile'anmo nu Tumpu, de posi Tumpu na montaloakon kita madi'mo ko kasala'an?

³⁴Pa' daagi' ko mian anu mongka'oho' mompo sala' kita? I Kristus Yesus na montinjohi kita! Ia na anu sinilakamo, kabai memanga Iamo na po'ule'mo pinotumuu' salatan Ia sinilaka ka' kiita'mo mae hi Tumpu i tampat anu mongkuasai.

³⁵Apaa daagi' ko anu moko tewa' i Kristus mongkalibosi kita? Pa' kasusa'an timbali montewa', kabai kasansalan, kabai osakisa, kabai tempo' nu susa' i kaanon, kabai kasiasi, kabai balaa', kabai o kapatean?

³⁶ I Uno nu Kitab nu Tumpu tinulis sumo uuka, “Sansina-sinaa kami tumuu' i uno nu balaa', kapatean kalana Beleyum. Kami obau sumo domba anu okahanda'imo okolot.”

³⁷Madi'! Ola o i uno iwi-iwi' aijo' kita mohumpakmo ka'untungan anu sukup lengkat hi Ia anu mongkalibosi kita!

³⁸Kalana kupalesaya hondo-hondo songko-songko na dunia, mau mule' kapatean kabai kantumuu'an, mau mule' malaikat kabai anu ko kuasa, mau mule' anu mompai patei uuka aiya, kabai anu mompai patei anu aiya mae i ahop, kabai anu toto hoso-hoson sangga'at;

³⁹mau mule' anu kiita' mae i langit, kabai hahan anu aiya i dunia, kabai anu sangga'at, iwi-iwi' madi' moko tewa' Tumpu Allah mongkalibosi kita, sumo anu pinotoa-Nyomo hi Kristus Yesus, Tumpunto.