Read Saluan 1 KORINTUS 10 Bible Online

1 KORINTUS 10 - Saluan bible

1 KORINTUS 10

¹ To Utu-utus! Kita Utus saja' ahi' o'inau' apaa na anu tinimbalimo hi mompolee'to, tempo'nyo aha nombatuki i Musa. Aha iwi-iwi' i hohungan nu kundom, ka' mule' sinalamat na aha notaap i Ambai Momea'.

²Da timbali mombatuki i Musa, aha iwi-iwi' pinalamandikan i uno nu kundom ka' i uno nu ambai aijo'.

³ Aha iwi-iwi' nongkaan kaanon nu Tumpu bubuu' pokakana,

⁴ ka' nonginum inumon nu Tumpu bubuu' pokakana. Aha iwi-iwi' nonginumo i bungkutnyo nu batu rohani anu nonsangaluimo aha; bungkutnyo nu batu aijo', atina'mo i Kristus.

⁵ Mau mule' sumo aitu kanjoo'annyo na aha madi' nuka'ima'i nu Tumpu, ka' aijo'mo na sababnyo bangke' nu aha haha aijo' notanata i padang bolaa.

⁶ Iwi-iwi' aijo' timbali sonto' hi kita, bau pompotuka' kita da boli mongka'ima'i anu ma'idek sumo aha.

⁷ Tiba mule' kita boli monsombah pilogot sumo anu binaumo nu sambagian na mian aijo' hi aha. I uno nu Kitab nu Tumpu tinulismo, “Saba' bansa aijo' nontampu'unimo mongkaan ka' monginum, ka' lewa'mo nonsalelei nonsombah pilogot.”

⁸ Kita madi' timbali masala' susumo aijo' anu binau nu sambagian aha. Kalana uampulu' totolu' na madala na mian aijo' hi aha i nate i uno nu sansina kalana nombaumo han aijo'.

⁹ Kita madi' timbali monsoba-soba Tumpu, sumo anu binau nu sambagian aijo' hi aha naipuan mae, sahingga aha i nate binahe' nu ulo anu ko bisa'nyo.

¹⁰ Kita madi' timbali mososon sumo anu binau nu sambagian aijo' hi aha naipuan mae, sahingga aha pinatean nu Malaikat Kapatean.

¹¹Iwi-iwi' anu haha aijo' tinimbalimo hi aha, da bau sonto' hi to mia-mian sangga'at. Ka' iwi-iwi' aijo' tinulismo suele da timbali pompotuka' hi kita. Kalana kita tempo' uuka tumuu' i tempo'mo nu kakiamatan.

¹²Mian anu monsangka butongnyo tuminjo mahoson, obala-bala ingati; da boli mamanga ia motua'mo.

¹³Batu-batu soba'an anu o'oa'i nu kita Utus, atina' soba'an anu saja'mo o'oa'i nu mian. Panyo Tumpu tataap i pala janjian-Nyo. Ia madi' mompojohok kita Utus osobai molingkudui anu opoko ala obau miu. Tempo'nyo kita Utus nukona nu soba'an, Ia mombee'i jalan hi komiu da mahoson, da kita Utus moko ala montahan.

¹⁴Mokonyo aijo', to Utu-utus anu ku ku kalibosi, tionyo ahi' komiu mongka'ideki monsombah pilogot.

¹⁵Aku motatae hi komiu sumo hi to mia-mian anu pande. Komiu tionyo ahi' mompotutugakon potataengku aiya.

¹⁶ Tempo'nyo kita monginum anggur, kita montalima kaseh hi Tumpu, te misa' aijo' mompotiju' saba' kita nosa'angu'mo tiba i Kristus i uno nu han Ia sinilaka? Ka' tempo'nyo kita mombagi-bagiakon roti da okaan hingga-hinggat, te misa' aijo' mompotiju' saba' kita nosa'angu'mo tiba butong i Kristus?

¹⁷Kalana ola sa'angu' na roti ka' kita iwi-iwi' mongkaanmo te roti anu sa'a-sa'angu'nyomo aijo' suele, sahingga kita anu manjoo' aiya sumo-sumomo sa'a-sa'angu' na butong.

¹⁸ Sobo palahatikan na to mia-mian Yahudi. Aha anu nongkaanmo kaanon anu osombahkon aita' i bawo nu tampat ponsombahkonan koloban, aijo'mo na to mia-mian anu nosa'angu'mo tiba tampat aijo'.

¹⁹Apaa na anu ku ku kahanda'i mongkona han aijo'? Pilogot kabai kaanon anu osombahkon hi pilogot aijo' madi' kokaliangannyo apa-apaa.

²⁰ Apaa na anu sinombahkonmo i tampat koloban bau bagi nu pilogot madi' sinombahkon hi Tumpu, panyo hi to roh-roh ma'idek. Ka' aku madi' mongka'oho' komiu mosa'angu'mo tiba roh ma'idek.

²¹Komiu madi' timbali monginum i galas nu anggur nu Tumpu, ka' mule' suele i galas nu anggur nu roh ma'idek. Komiu madi' timbali mongkaan i meja' nu Tumpu tiba i meja' suele nu roh ma'idek.

²² Kabai o kita mongka'oho' mombau Tumpu ma'idekan na kinyonyoanyo? Te kita lebe mahoson molingkudui Tumpu?

²³ Koonyo nu mian, “Kita timbali mombau mau mule' apaa na okahanda'into.” Totu'u! Panyo madi' iwi-iwi' na oka'oho'to aijo' mingguna. “Kita timbali mombau mau mule' apaa na oka'oho'to” — panyo madi' iwi-iwi' na oka'oho'to aijo' mombangonakon kantumuu'anto.

²⁴Boli ko samian mombau usaha ola posi kapentingan nu butongnyo. Toto samian mombau usaha tionyo ahi' bau kapentingan nu mian sangga'at.

²⁵Komiu timbali mongkaan maumo apaa na anu opobaluk i pasan pompobalukan ponoha'. Boli pilenje oleleki imoonanyo, mau mule' ko kabalatan i uno nu kinyonyoaum.

²⁶ Kalana i uno nu Kitab nu Tumpu tinulismo, “Dunia aiya tiba iwi-iwi' na isinyo anu nu Tumpu.”

²⁷De komiu opaso mongkaan nu samian anu misa' Kristen, ka' otalima miu na ia nompaso aijo', kaanmo na anu tinatuakonmo hi komiu. Bolimo pilenje moleleki pa' nolengkat mae iya na kaanon aijo', da boli ko kabalatan i uno nu kinyonyoaum.

²⁸Panyo de ko anu motatae hi beleyum, “Kaanon aiya sinombahkonmo hi pilogot,” bolimo mongkaan kaanon aijo', kalana montoa kapentingan nu mian aijo' tiba kalana monginau' anu uutu i kinyonyoa.

²⁹Anu ku kukahanda'i misa' anu o'oa'i nu kinyonyoaum, panyo anu nu'oa'i nu kinyonyoa nu mian aijo'. Tantu daagi' ko anu mompokilawa, “Ah, kadaka' kabebasan, nukinyonyoangku mongalamo anu nu o'oa'i nu kinyonyoa nu mian sangga'at?

³⁰De aku mongkaan kaanon ka' montalima kaseh hi Tumpu, kadaka' mian mongalumo aku kalana kaanon aijo', padahan aku nontalima kaseh hi Tumpu kalana kaanon aijo'?”

³¹Mau mule' apaa na obau nu kita Utus — kita Utus mongkaan kabai kita Utus monginum — baumo na aijo' iwi-iwi', bau pompopodaka' Tumpu.

³²Tumuu'mo sumo aitu na baunyo da kita Utus madi' monsaduakon mian sangga'at mombau dosa'; pa' aha mian nu Yahudi kabai misa' mian nu Yahudi, kabai jama'at nu Tumpu.

³³Tumuu'mo susumo aku. Aku bala usaha momposanang kinyonyoa nu mian iwi-iwi' i uno nu lupa-lupa na han, madi' ko kahanda' bau kapentingan nu posi butong. Patujungku ola da aha iwi-iwi' timbali oposalamat.