Read Saluan 1 KORINTUS 11 Bible Online

1 KORINTUS 11 - Saluan bible

1 KORINTUS 11

¹ Obatuki na sonto'ku, sumo aku suele nombatukimo sonto' i Kristus.

²Kupuji' na komiu kalana komiu saja' monginau' aku, ka' mohongo-hongo pokinde' anu binee'kumo hi komiu.

³Panyo ku indi da komiu monsumbu' sa'angu' na han mule', aijo'mo saba' anu mongkapalai aha to momo'ane, aijo'mo i Kristus; anu mongkapalai bengkele' aijo'mo langkai'nyo, ka' anu mongkapalai i Kristus aijo'mo Tumpu.

⁴De samian na mo'ane balado'a kabai tempo'nyo monsisikakon lele lengkat hi Tumpu i ahop nu mian da'isan, okukumbungi na ubak, saba' mian aijo' mongambangi i Kristus.

⁵Ka' de samian na boune balado'a kabai tempo'nyo monsisikakon lele lengkat mae hi Tumpu i ahop nu mian da'isan madi' okukumbungi na ubak, saba' boune aijo' mongambangi langkai'nyo anu mongkapalai butongnyo. Aijo' pokakanamo ubak nu boune aijo' sumo anu kinismo.

⁶Kalana de samian na boune madi' mongka'oho' mongkukumbungi ubak, sahanyo ubaknyo o gunting. Panyo de samian na boune o kis na ubaknyo kabai o gunting na ubaknyo, aijo' sa'angu' na ka' ambangan hi ia. Mokonyo aijo' lebe ma'ima' ia mompake kukumbung nu ubak.

⁷ Mo'ane madi' pilenje mompake kukumbung nu ubak, kalana ia sumo mongkitaan pontoaan butong ka' kadaka'an nu Tumpu. Panyo boune sumo mongkitaan pontoan katalasanggoan nu mo'ane.

⁸ Kalana mo'ane misa' boune na pinotimbali, mo'ane ahi' na pinolengkatannyo boune pinotimbali.

⁹Mo'ane madi' pinotimbali da bau kapentingan nu boune, panyo boune pinotimbali da bau kapentingan nu mo'ane.

¹⁰Kalana aijo' da bau pomposanang to mala-malaikat, samian na boune tionyo mompake kukumbang nu ubak salaku tanda saba' ia ta'aluk i kakuasa'an nu langkai'nyo.

¹¹Mau mule' sumo aitu i uno nu kantumuu'anto susumo mian Kristen, boune madi' mosi tinjo sausa', manilapas i mo'ane, ka' mo'ane mule' madi' mosi tinjo sausa', manilapas i boune.

¹²Kalana mau mule' boune anu momonanyo pinotimbali lengkat i mo'ane, panyo lapas aijo' mo'ane pinohampemo nu boune; ka' iwi-iwi' na apaa, nolengkat mae hi Tumpu.

¹³Soba to Utu-utus posi popikilakon na han aiya: Pa' ma'ima' samian na boune balado'a hi Tumpu i ahop nu mian da'isan madi' mongkukumbungi ubak?

¹⁴Nusumbu' nu mian da'isan komiu pinogulu'mo, taalu' de mo'ane mingubak mantan, aijo' sa'angu' na han anu madi' patut.

¹⁵Panyo hi boune hambahan nu ubak binee' hi ia da bau pongkukubi ubaknyo, ka' ubak mantan aijo' timbali kasanangannyo.

¹⁶Jadi de daagi' ko anu mongka'oho' painggaga mongkona han aiya, sala' sa'angu' na kutaloakon aijo'mo saba' mau mule' kita, mau mule' to jama-jama'at nu Tumpu sangga'at, kanjoo'annyo ola sa'angu' na kabiasa'an anu daagi' i uno nu jama'at; de sangga-sangga'atnyo aijo' madi'mo.

¹⁷Mongkona anu susumo aiya, aku madi' mompuji' komiu. Singkabot na komiu mogaleja misa' mohasinakon anu ma'ima', panyo anu madi' ma'ima'.

¹⁸Momona ihongongku tukoonyo i uno nu kasingkabotan-kasingkabotan daagi' ko toto sanggombu na mian anu mompaha pisa-pisala'i. Ka' kututugi sangkiding kabai manjoo' na lele aijo' tantu totu'u.

¹⁹Memang konamo na ko poga'a-ga'atan itina' hi komiu da otoaje saidi' mae ihehe na mian Kristen anu totu-totu'u.

²⁰Panyo tempo'nyo komiu silimu' anu obau miu misa' Palajamuan nu Tumpu.

²¹Kalana de mongkaanmo, komiu toto samian gago'mo mongala posi kaanonnyo, sahingga daagi' ko anu madi' mohumpak apa-apaa, panyo sangga'at malangumo.

²²Kadaka' sumo aitu? Te madi' kita Utus ko laigan ahi'? Kita Utus timbali mongkaan ka' monginum i kiijo'! Kabai o kita Utus mongka'oho' mompopo'ise' jama'at nu Tumpu, ka' mongambangi to mia-mian kasiasi? Apaa na anu tionyo kutaloakon hi komiu? Pa' tionyo aku mompuji' komiu? Madi'! I madi' hondo-hondo aku mompuji' komiu.

²³Kalana pinogulu'akonkumo hi komiu, aijo' ihumpaku lengkat mae hi Tumpu: aijo'mo pihi-pihi salatan i Yesus, Tumpunto kinabisa'anmo, Ia nongalamo roti,

²⁴ka' noko taloakon na Ia talima kaseh hi Tumpu mongkona roti aijo', pinuge-puge-Nyomo na roti aijo' nu lima-Nyo, ka' notatae, “Aiyamo na butong-Ku anu binee'mo kalana komiu. Bau na aiya salaku ponginau' Aku.”

²⁵ Sumo aitu mule' salatan noko kaan, ingalanyomo na galas nu anggur lantas notatae, “Anggur aiya anu sala'je jinanji'akon nu Tumpu, sinela' nu baso'-Ku. De komiu monginumo aiya, obau na aiya bau ponginau' Aku.”

²⁶Memang de komiu mongkaanmo roti ka' monginumo anggur aiya, komiu nompolelemo kapatean i Tumpu, sampe Ia toka.

²⁷Mokonyo aitu, mian anu mongkaan roti nu Tumpu kabai monginum anggur nu Tumpu tiba jalan anu madi' patut, mian aijo' baladosa' hi Tumpu anu nongkolobanakonmo butong-Nyo tiba baso'-Nyo.

²⁸Jadi batu-batu mian tionyo mompalesa pe'e butongnyo, atina'je ka' ia timbali mongkaan roti ka' monginum anggur aijo'.

²⁹Kalana de mian mongkaan roti ka' monginum anggur, panyo madi' mongangga'i palajamuan aijo' mongkona butong nu Tumpu, mian aijo' mongkaan ka' monginum da mohumpak hukuman nu Tumpu i posi butongnyo.

³⁰Mokonyo aijo' manjoo' anu itina' hi komiu masakit ka' madi'mo mahoson, ka' mule' ko anu sinilakamo.

³¹Panyo de kita mompalesa pe'e butongto momona, kita madi' nu hukum nu Tumpu.

³²Panyo de kita nu hukum nu Tumpu, Ia mondoke kita, da kita boli nukona nu hukuman mohingga-hinggat dunia aiya.

³³Mokonyo aitu, to Utu-utus, de komiu silimu' da mongkaan i palajamuan nu Tumpu, komiu tionyo ahi' mompaha tanda-tanda'i.

³⁴De daagi' ko anu mo'ohop, ia tionyo ahi' mongkaan pe'e i laigan. De komiu mongangga'i han aiya, pompahasingkabotan miu mogaleja madi' mompodaagi' hukuman lengkat mae hi Tumpu i posi butongum. Mongkona hahan sangga'at kututuhakonje hi komiu de aku po'ule'mo toka mae.