Read Saluan 1 KORINTUS 13 Bible Online

1 KORINTUS 13 - Saluan bible

1 KORINTUS 13

¹Mau mule' aku moko ala basisik tiba ngangahan basa' nu mian, kabai o tiba basa' nu malaikat, panyo aku madi' mongkalibosi mian sangga'at, saba' anu saja' kutaloakon aijo' ola onyi' anu linsingan panyo madi' ko alati'nyo.

² Mau mule' aku pande na mompotokakon lele lengkat mae hi Tumpu, ka' monsumbu' iwi-iwi' ilimu', ka' monsumbu' iwi-iwi na apaa, ka' mule' talalo palesaya hi Tumpu sahingga timbali moko ala molalin bungkutnyo, panyo aku madi' mongkalibosi to mia-mian sangga'at, saba' aku madi' ko alati'nyo apa-apaa!

³Mau mule' iwi-iwi' na anu daagi' hi belengku kubee' hi mian kasiasi, ka' kubee' na butongku da opapui, panyo aku madi' mongkalibosi to mia-mian sangga'at, saba' iwi-iwi' aijo' madi' hondo ko kaliangannyo.

⁴Mian anu mongkalibosi to mia-mian sangga'at, sabaan ka' ma'ima' na kinyonyoa. Ia madi' pangka'ideki mian, madi' malambubut, madi' kobubuun.

⁵Ia madi' mingkadaka'an, madi' laloasa, ia madi' mompakisa mian sangga'at da mombatuki posi pongka'oho'nyo, madi' mule' malia' monipis na bihing, ka' mongingu.

⁶Mian anu mongkalibosi to mia-mian sangga'at, madi' mongka'ima'i ka'idekan, ia ola mongka'ima'i ka'ima'an.

⁷Ia moko ala montahan mongahopi iwi-iwi na apa-apaa, ka' mongka'oho' palesaya hi anu talalo ma'ima' hi batu-batu mian; i uno nu han mau mule' pa' mosiamo, mian anu ko kalibosan aijo' madi' toho' mongkolilimi apaa na anu nutaha'imani, ka' sabaan montanda'i iwi-iwi na apa-apaa.

⁸Madi' toho' ko tempo'nyo na mian madi'mo palalu mompaha kali-kalibosi. Uuka aiya daagi' ko mian anu pande na mompotokakon lele lengkat mae hi Tumpu, panyo saidi' mae ia madi'mo mompotoka lele aijo'. Uuka aiya daagi' ko anu pande basisik mongangahan na basa' anu okabangangi, panyo saidi' mae ia madi'mo basisik nu basa' haha aijo'. Uuka aiya manjoo' na mian anu monsumbu' lupa-lupa na han, panyo saidi' mae apaa na anu nusumbu' nu aha aijo' po'ule'mo okolilimi.

⁹Kalana anu osumbu'to tiba anu opoko ala opotoka na lele lengkat mae hi Tumpu, ma'isa talalo sukup.

¹⁰Tokaje uuka mae na tempo'nyo Tumpu mombaumo iwi-iwi' aijo' sukupmo, ka' anu madi' sukup aijo' o alinmo.

¹¹Tempo'nyo aku daagi' anak, aku basisik sumo anak, aku mingkinyonyoa sumo anak ka' aku bapikin sumo anak. Uuka aiya aku dinaka'mo, kalakuanku anu mingana-anak ingalinkumo.

¹²Apaa na anu otoanto uuka aiya daagi' sumo lolung anu madi' manasa i uno nu mongkitaan. Panyo saidi' mae otoantoje mana-manasa. Uuka aiya ma'isa kusumbu' iwi-iwi', panyo saidi' mae kusumbu'je iwi-iwi', pokakana sumo Tumpu monsumbu' songko-songko butongku.

¹³Jadi, tempo' aiya totolu' na han anu tionyo saja' obaunto: palesaya, montaha'imani, ka' mompaha kali-kalibosi. Anu talalo hondo penting i anu totolu' aiya, aijo'mo, mongkalibosi to mia-mian sangga'at.