Read Saluan 1 KORINTUS 2 Bible Online

1 KORINTUS 2 - Saluan bible

1 KORINTUS 2

¹To Utu-utus! Tempo'nyo aku tinoka hi komiu ka' nompolele hi komiu mongkona tanga'an nu Tumpu anu ma'isa sinumbu' nu dunia aiya, aku madi' mompake kapandean nu dunia aiya, kabai basisik nu potatae anu toto ima-ima' anu ola momposanang bihing.

²Kalana aku binalaniatmo mau sangkuka na kopinnyo na aku jojoong hingga-hinggat tiba komiu, aku madi' monsisik apa-apaa de misa' anu mongkona i Yesus Kristus; anu sini-sinilakamo sinalib.

³ Tempo'nyo aku tinokamo hi komiu, aku ilundengmo ka' ilakatmo nu buhuk.

⁴Lele anu pinotokakon hi komiu madi' pinotokakonku nu potatae anu mompagala mongendei susumo kapandean nu dunia. Aku nompotokakon aijo' tiba jalan momponyata', saba' Roh nu Tumpu Allah ko kuasanyo.

⁵Kubau sumo aijo' da palesaya miu hi Kristus madi' mimpu'u i kapandean nu mian, panyo mimpu'u i kuasa nu Tumpu.

⁶Mau mule' sumo aitu, kona hi to mia-mian anu nasasakmo na kapalesaya'annyo i uno nu kantumuu'annyo, aku memang motatae mongkona kapandean. Panyo kapandean aiya misa' kapandean nu dunia, kabai kapandean nu anu mongkuasai tempo' uuka, anu kakuasa'annyo ola mingkot.

⁷Kapandean anu kupoto'i aitu aijo'mo kapandean lengkat mae hi Tumpu. Kapandean aijo' madi' nusumbu' nu dunia, panyo tinoukanmo nu Tumpu bau kabilahianto salatanmo pe'e dunia aiya ma'isa binau.

⁸Madi' ko samian pe'e na anu mongkuasai tempo' uuka monsumbu' kapandean aijo'. Kalana de sinumbu'mo nu aha, tantu aha madi' nonsalib Tumpu anu ko angga'annyo aijo'.

⁹ Ola ahi' han aijo' sumo anu tinulismo i Kitab nu Tumpu Allah, “Apaa na anu madi' toho' tinoa kabai i hongo nu mian, ka' madi' mule' toho' i lubat i pikilan nu mian, aijo'mo na pinotouka nu Tumpu bau bagi nu to mia-mian anu mongkalibosi Ia.”

¹⁰Panyo Roh nu Tumpu na nomponyata'mo hi kita. Roh nu Tumpu aijo' na nonselidiki iwi-iwi' apaa, toka-toka i tanga'an nu Tumpu pe'e anu talalo mapohowini.

¹¹Kalana anu monsumbu' isi nu kinyonyoa nu samian, te misa' posi rohmo ahi' nu mian aijo'? Sumo aijo'mo na mongkona Tumpu. Anu monsumbu' isi nu kinyonyoa nu Tumpu ola posi Roh nu Tumpu!

¹²Ka' kita madi' binee'an roh nu dunia aiya, panyo Roh anu lengkat mae hi Tumpu, da kita monsumbu' iwi-iwi' apaa na anu binee' nu Tumpu hi kita.

¹³Kalana aijo' de kami montutuhakon hahan mongkona Tumpu hi to mia-mian anu ko Roh nu Tumpu, kami madi' montutuhakon mombatuki kapandean nu mian, panyo mombatuki pokinde' nu Roh nu Tumpu.

¹⁴Mian anu madi' ko Roh nu Tumpu, madi' moko talima apaa na anu pinonyata'mo nu Roh aijo'. Kalana kona hi mian aijo' hahan anu sinanggomo aijo' sumo ola kaponga'an. Mian aijo' madi' moko ala monsumbu', kalana han aijo' ola opoko ala oselidiki de palesaya.

¹⁵Mian anu ko Roh nu Tumpu timbali moko ala monselidiki iwi-iwi' apaa, panyo madi' ko samian pe'e ko hak monselidiki Ia.

¹⁶ I uno nu Kitab nu Tumpu tinulismo, “Ihe na monsumbu' pikilan nu Tumpu? Ka' ihe na moko ala mompokinde'i Ia?” Kitamo na anu ko pikilan pokakana tiba i Kristus!