Read Saluan 1 KORINTUS 4 Bible Online

1 KORINTUS 4 - Saluan bible

1 KORINTUS 4

¹Kami aijo'mo to posa-posaihon i Kristus anu mangaku mompolele tanga'an nu Tumpu anu ma'isa sinumbu' nu dunia.

²Anu momona pagala opoita hi to posa-posaihon anu susumo aijo' madi' kosangalasannyo aijo'mo da ia mohongo-hongo tuannyo.

³Hi belengku madi' mongkuka pa' mosia na hi komiu — kabai mau mule' pa' ihe — na mompopikilakon mongkona butongku. Aitu pe'e apaa na anu kuposi tutugi mongkona posi butongku madi' timbali mongkuka.

⁴Aku madi' mongoa'i sala' i uno nu han mau mule' pa' apaa, panyo aijo' misa' bukuti' au'-aitu aku memang madi' kosala'nyo. Posi Tumpuje na montantukan aku kosala'nyo kabai madi'.

⁵Mokonyo aijo', kalana misa' pe'e tempo'nyo, boli komiu lia-lia' montantukan batu-batu mian kosala'nyo kabai madi'. Tanda'i tokaje na Tumpu. Iaje na mompoto'i iwi-iwi' lahasia anu sulu-suluk i uno nu pintung. Iaje na mompotalang tanga'an anu sulu-suluk i uno nu kinyonyoa nu mian. Tempo'je aitu ka' batu-batu mian mohumpak pompuji' lengkat hi Tumpu anu patut nu talima.

⁶To Utu-utus! Bau kapentingan miu pinokonangkumo iwi-iwi' aijo' hi Apolos ka' i posi butongku. Kahanda'nyo da sonto' lengkat hi kami aijo' komiu timbali monggulu'i apaa na alati'nyo nu anu tinaloakonmo, “Otoongi na atulan anu daagi'.” Desumo aitu yo madi' ko samian pe'e atina' hi komiu na mombuulakon toto samian, lantas mompopo'ambang sangga'at.

⁷Ihe na nompotimbali kita Utus molingkudui mian sangga'at? Te misa' iwi-iwi' apaa na anu i humpak nu kita Utus, lengkat hi Tumpu Allah? Jadi, kadaka' kahanda' mombuulakon butong, au'aitu apaa na anu daagi' hi kita Utus, aijo' misa' anu binee'?

⁸Memang komiu madi'mo daagi' mompalalui apa-apaa! Komiu kinayamo! Komiu tinimbalimo tomundo! Ka' kami madi'. Palias na ko'ima'nyo de komiu totu-totu'u tinimbalimo tomundo, da kami timbali mompalentah hingga-hinggat tiba komiu.

⁹Kalana de mombatuki pikilanku, kami to rasul-rasul pinotimbalimo nu Tumpu sumo anu lewa' otoa i ahop nu mian tiba to mala-malaikat. Kami sumo to mia-mian anu madi' opajuli, anu pinokakanamo hukuman mate i ahop nu mian da'isan ka' sola' ohagai nu dunia.

¹⁰Kalana i Kristus, kamimo na mian anu ponga', ka' komiu mian Kristen na pande! Kami madi' moko ala mombau apa-apaa, komiu mahoson! Kami o'alu, ka' komiu na opopodaka'!

¹¹Sampe tempo' uuka kami mongoa'i susa' i anu okaan tiba susa' i anu o inum; baju' mami me anu i butong; mian monsakisa kami; kami madi' ko kajojoongan tataap:

¹² Kami pagala mombau apa-apaa molio kaanon. De kami ototobi'akon obalosi mami nu mondo'akon da obalakati; de kami osakisa, kami sabaan;

¹³de mian mombusi-busiki kami, obalosi mami nu potatae toto ima-ima'. Kami sumomo duhehe nu dunia aiya; sampe uuka aiya, kami daagi' osangka sumo duhehe nu dunia.

¹⁴Ku tulis na aiya toka hi komiu, misa' pongambangi komiu, panyo bau pompokinde'i komiu sumo posi to ana-anakku.

¹⁵Kalana akumo na timbali tuuma miu, mau mule' ugaat salaku mian Kristen, komiu kino gulu'mo sampulu' na madala. I uno nu kantumuu'an miu susumo to mia-mian anu nosa'angu'mo tiba i Kristus, aku na timbali tuuma miu, kalana aku na nomboa Lele Ma'ima' mongkona i Kristus hi komiu.

¹⁶ Mokonyo aijo' kupoita da komiu sabole-bole mombatuki sonto'ku.

¹⁷Mokonyo aijo' sinaingkumo na i Timotius hi komiu. Salaku anu mombatuki i Kristus ia sumomo posi anakku, anu ku kukalibosi. Ia anak anu timbali opalesaya. Iaje na mompotuka' komiu mongkona jalan nu kantumuu'an anu binatukumo salatan aku pinalesayamo hi Kristus, aijo'mo jalan nu kantumuu'an anu pinogulu'kumo suele hi to jama-jama'at iyaya mae.

¹⁸To pia-piangkuka na mian itina' hi komiu kinobubuunmo, kalana aha monsangka aku madi'mo toka hi komiu.

¹⁹Panyo de nupobee' nu Tumpu, aku tionyo ahi' toka hi komiu madi'mo daagi' pin. Tokaje i tempo' aijo' kutoaje suele apaa na anu nupoko ala nubau nu to mia-mian anu kobubuun aijo'; misa' ola potatae nu aha.

²⁰Kalana de Tumpu mompalentah kantumuu'an nu toto samian, han aijo' otoaje i han anu nupoko bau nu kantumuu'an nu mian aijo', misa' ola potataenyo.

²¹Jadi pile'imo apaa na talalo oka'ima'i miu! Pa' komiu mongka'oho' da aku toka masigo na mompogulu' komiu, kabai aku toka mompogulu' nu kinyonyoa molibos ka' manonong?