Read Saluan 1 KORINTUS 6 Bible Online

1 KORINTUS 6 - Saluan bible

1 KORINTUS 6

¹Kadaka' daagi' ko anu itina' hi komiu baani mamba hi mian kopian anu madi' monsumbu' Tumpu, mongkalaak Utus anu pokakana kapalesaya'an, de ia mahantuda' tiba Utusnyo aijo'? Kadaka' ia madi' momoita mian anu palesayamo hi Tumpu na mongulus palakala aijo'?

²Te madi' osumbu' miu, mian anu palesayamo hi Tumpu na momputusi dunia aiya? Jadi, de memang komiu na momputusi dunia aiya, te komiu madi' moko ala mongulus to pala-palakala nu nu putusi nu mian kopian anu madi' ko alati'nyo?

³Te komiu madi' monsumbu', saba' to mala-malaikat, kitamo na momputusi? Lebe-lebe mule' to pala-palakala nu kantumuu'an anu sansina-sinaa!

⁴Sahingga de daagi' ko palakala anu susumo aijo', komiu mongkalaakmo hi to mia-mian anu mau pe'e madi' ko pangkatnyo i uno nu jama'at?

⁵Mongambangi hondo! Tantu itina' hi komiu daagi' ko anu toto samian na pande hondo mongulus palakala nu po'uwalian anu itina' hi komiu to utu-utus anu bubuu' Kristen!

⁶Panyo ola mule' ko mian Kristen anu mamba hi anu misa' Kristen kahanda' mongkalaak palakalanyo mongkona Utusnyo anu Kristen!

⁷Ma'isa pe'e mamba mahampalakala hi mian anu misa' Kristen; panyo de maluannyo ko po'uwalian anu itina' hi komiu timbalimo pontu'osian sa'angu' na kakalahan hi komiu. Sahanyo komiu opotimbali madi' adin, kabai opolugi'!

⁸Panyo ola mule' ahi' komiu na mombau hi mian sangga'at madi' adin. Posi komiu suele mompolugi' mian sangga'at. Ka' aijo' obau miu kona hi to Utu-utus anu pokakana na kapalesaya'an!

⁹Osumbu' miu na to mia-mian anu madi' montuluti pongka'oho' nu Tumpu madi' timbali mian anu palesayamo hi Tumpu? Boli o akali! To mia-mian anu masala', to mia-mian anu bapilogot, anu masala', anu mombau anu moko ambang hi sangko gampanyo bubuu' mo'ane, kabai bubuu' boune,

¹⁰anu buling, anu mangoa, saja' malangu, anu saja' mongalu mian sangga'at, tiba anu mompolugi' mian sangga'at — iwi-iwi' na mian anu sumo aijo' madi' timbali mian anu palesayamo hi Tumpu Allah.

¹¹To pia-piangkuka itina' hi komiu u'utu mae ko kalakuan sumo aijo'. Panyo uuka dosa' miu pinobelesinmo. Komiu tinimbalimo samata-mata anu nu Tumpu. Komiu nompo'ule'mo nompaha ima' tiba Tumpu, kalana komiu pinalesayamo hi Tumpu Yesus Kristus, ka' kalana kuasa nu Roh anu nolengkat mae hi Tumpu Allah-nto.

¹² Daagi' ko anu notatae tukoonyo toto samian timbali mombau iwi-iwi na apaa. Panyo de hi belengku madi' iwi-iwi'mo mingguna. Jadi mau mule' aku timbali moko ala mombau pa' apaa, panyo aku madi' mongka'oho' mompojohok butongku nukuasai nu apa-apaa.

¹³Daagi' mule' ko anu notatae tukoonyo, kaanon bau pongisi kompong, ka' kompong pinotouka bau pongisian kaanon. Panyo ohu-ohua' aijo' madi' nutalima nu Tumpu. Butong nu mian madi' timbali opake mombau palabuatan masala', panyo opake bau pohongo-hongo Tumpu. Ka' Tumpu na mompotuu' butong aiya.

¹⁴Tumpu Yesus sinilaka po'ule' pinotumuu' nu Tumpu, sumo aitu mule' na Tumpu mompotumuu' kita nu kuasa-Nyo.

¹⁵To Utu-utus nonsumbu'mo saba' butong miu nosa'angu'mo hi butong i Kristus. Jadi, pa' timbali na aku mongala sambagian butong i Kristus, lantas opotimbali na sambagian butong nu samian masala'? Madi' hondo-hondonyo!

¹⁶ Kabai ugaat komiu ma'isa monsumbu', mian anu nogalumo tiba samian anu masala' inosa'angu'mo tiba mian anu masala' aijo'! Kalana i uno nu Kitab nu Tumpu tinulismo, “Ohu-ohua' na aha nosa'angu'mo”.

¹⁷Panyo mian anu momposa'angu' butongnyo tiba Tumpu, Roh nu Tumpu tiba roh nu mian aijo' nosa'angu'mo.

¹⁸Opimpali na mombau palabuatan masala'. Kalana iwi-iwi' na dosa' sangga'at anu nubau nu mian, obau i sambiha' nu butong nu mian aijo'. Panyo mian anu momba-mombau anu ma'idek sumo-sumomo mombau dosa' i posi butongnyo.

¹⁹ Tionyo ahi' osumbu' miu saba' butong miu kajojoongan nu Roh nu Tumpu. Roh aijo' jojoong i uno nu butong miu. Ka' posi Tumpu na nombee' Roh aijo' hi komiu. Butong nu kita Utus, misa' kita na tumpunyo. Aijo' Tumpu na tumpunyo.

²⁰Ingolimo nu Tumpu na komiu ka' pinolunasnyomo na olinyo. Mokonyo aijo', opake na butong miu ma'i-ma'ima' sahingga Tumpu opopodaka'.