Read Saluan 1 KORINTUS 7 Bible Online

1 KORINTUS 7 - Saluan bible

1 KORINTUS 7

¹Uuka aiya aku mongka'oho' basisik mongkona hahan anu tinaloakon miu i uno nu sulat miu. De samian na mo'ane madi' mo'osoa, aijo' ma'ima'.

²Panyo da madi' tagoda mombau hahan anu madi' patut, lebe ma'ima' to momo'ane daagi' ko posi bengkele'nyo, ka' to bouboune daagi' ko posi langkai'nyo.

³Langkai' tionyo ahi' mombau kalajanyo salaku langkai' nu bengkele'nyo, ka' bengkele' tionyo ahi' mombau kalajanyo salaku bengkele' nu langkai'nyo; toto samian mombau kalajanyo hi samian ka' samian.

⁴Bengkele' madi' moko ala mombau apa-apaa i posi butongnyo; anu moko ala mombau apa-apaa i butongnyo aijo'mo langkai'nyo. Sumo aitu mule' langkai' madi' moko ala mombau apa-apaa i posi butongnyo; anu moko ala mombau apa-apaa i butongnyo aijo'mo bengkele'nyo.

⁵Boli mosi tade-tade samian ka' samian salaku moto bengkele'. Timbali panyo boli pin asan ua-ua'aha bubuu' setuju. Desumo aitu yo toto samian moko ala balado'a ka' madi' ko anu monggoda. Panyo lapas mae tionyo ahi' komiu po'ule' motuang salaku moto bengkele'. De madi' sumo aijo' komiu saidi' mae salatan nusale'imo nu roh ma'idek obatukimo miu, kalana komiu madi' moko ala mongintim napisu.

⁶Anu kutaloakon aiya misa' salaku palentah, panyo salaku pokinde'.

⁷De o'ala hi belengku lebe ku ka'ima'i de iwi-iwi' na mian timbali sumo aku. Panyo toto samian nohumpakmo balakat anu madi' pokakana lengkat hi Tumpu. Samian daagi' ko balakat aiya, sangga'at daagi' ko balakat aijo'.

⁸Hi to mia-mian anu ma'isa no'osoa, ka' hi to bouboune anu binalumo, aiya na pokinde'ku: Lebe ma'ima' kita Utus tataapmo tumuu' sausa' susumo aku.

⁹Panyo de kita Utus madi' moko ala mongintim napisu, kita Utus sahanyo mo'osoa. Kalana lebe ma'ima' kita Utus mo'osoa da boli monsaduakon napisu nu beleyum ko suhu-suhut.

¹⁰ Kakona hi aha anu no'osoamo, aiya na palentang-ku: (Sabenannyo misa' aku na mombee'i palentah aiya, panyo Tumpu.) Samian na boune anu no'osoamo, bolimo mompala'i langkai'nyo.

¹¹Panyo de ia mompala'imo, ia tionyo sidu-sidutu' madi'mo mo'osoa, kabai po'ule' ahi' minsusule' hi langkai'nyo. Ka' samian na langkai' madi'mo timbali mongga'atakon bengkele'nyo.

¹²Hi sangga-sangga'atnyo pokinde'ku sumo uuka: — aiya posi pokinde'ku, misa' Tumpu — de samian na Kristen ko bengkele'nyomo samian na boune anu madi' palesaya hi Kristus, ka' bengkele'nyo setuju jojoong mogalum tiba ia, mian aijo' madi' timbali mongga'atakon bengkele'nyo.

¹³Ka' de samian na boune Kristen ko langkai'nyo anu madi' palesaya hi Kristus, ka' langkai'nyo setuju jojoong mogalum tiba ia, saba' bengkele'nyo madi' timbali mongga'atakon langkai'nyo.

¹⁴Kalana langkai' anu madi' palesaya opobee' timbali mian palesayamo hi Tumpu, kalana po'osoannyo tiba bengkele'nyo anu tinimbalimo, mian anu pinalesayamo hi Tumpu. Sumo aitu mule' bengkele' anu madi' palesaya, opobee' timbali mian anu palesayamo hi Tumpu, kalana po'osoannyo tiba langkai'nyo anu tinimbalimo, mian anu pinalesayamo hi Tumpu. De madi' sumo aijo', to ana-anak nu aha tantu sumo to ana-anak nu mian daagi' halipulu, padahan to ana-anak haha aijo' sumo-sumomo mian anu palesayamo hi Tumpu.

¹⁵Panyo de mian anu madi' palesaya aijo' mompala'i bengkele'nyo kabai langkai'nyo anu Kristen, boli montewa' ia. Han aijo' kita Langkoyang kabai Olitau aijo' bebas, kalana pongka'oho' nu Tumpu da kita Utus tumuu' mompaha hongo-hongo ka' ma'i-ma'ima'.

¹⁶Kalana kita Utus salaku bengkele' — anu palesayamo hi Tumpu — mosia na kita Utus moko ala monsumbu' totu-totu'u taalu' kita Utus madi' moko ala momposalamat langkai'um? Sumo aitu mule' na kita Utus salaku langkai' Kristen, mosia na kita Utus moko ala monsumbu' totu-totu'u, taalu' aitu kita Utus madi' moko ala momposalamat bengkele'um?

¹⁷Tionyo toto samian mompokopiani kantumuu'annyo mombatuki pokinde' nu Tumpu sumo anu pinoto'imo nu Tumpu hi ia tempo'nyo Tumpu nolaga ia da palesaya hi Tumpu. Aijo'mo atulan anu pinogulu'kumo i to jama-jama'at.

¹⁸Sonto'nyo, de samian sinunatmo ma'isa pe'e ia nontalima polaga nu Tumpu, bolimo mian aijo' mongusahakon mongalini tanda-tanda nu sunat aijo'. Sumo aitu mule' de toto samian ma'isa sinunat tempo'nyo ia nontalimamo polaga nu Tumpu, bolimo mian aijo' momoita da o sunat.

¹⁹Kalana mohongo-hongo atulan nu sunat kabai madi' mohongo-hongo, ohu-ohua' aijo' bubuu' madi' ko alati'nyo apa-apaa. Anu penting mohongo-hongo palentah nu Tumpu.

²⁰Tionyo toto samian tataapmo tumuu' i uno nu han tempo'nyo ia nohumpakmo polaga nu Tumpu.

²¹De tempo'nyo kita Utus ilaga, kita Utus posaihon, bolimo kita Utus basusa-susa' mompopikilakon han aijo'. Panyo de saidi' mae kita Utus mohumpak kasampatan da timbali bebas, pakemo na kasampatan aijo'.

²²Kalana samian na posaihon anu palesayamo hi Tumpu, aijo' mian nu Tumpu anu bebas. Ka' samian anu bebasmo anu palesayamo hi Tumpu, aijo'mo posaihon i Kristus.

²³Tumpu nongolimo kita Utus, ka' i lunasmo na nombayan. Kalana aitu, bolimo kita Utus mombee' butong da timbali posaihon nu mian.

²⁴Jadi to Utu-utus mau mosia na baunyo miu tempo'nyo ilaga, tataapmo ahi' tumuu' sumo aijo' na kita Utus hingga-hinggat tiba Tumpu.

²⁵Uuka aiya mongkona to mia-mian anu ma'isa no'osoa. Mongkona han aijo', aku madi' nontalima palentah apa-apaa lengkat mae hi Tumpu. Panyo sumo mian anu kalana balakat nu Tumpu, patut opalesaya, aku mongka'oho' mombee'i pokinde'ku.

²⁶Monginau' iwi-iwi' kasusa'an anu montokai tempo' uuka, ku oa'i lebe ma'ima' de mian tataapmo mombatuki kantumuu'annyo sumo bau-baunyo anu tempo' uuka.

²⁷De kita Utus ko bengkele'mo bolimo ko kahanda' mongga'atakon bengkele' aijo'. De kita Utus ma'isa ko bengkele', bolimo molio bengkele'.

²⁸Panyo de kita Utus mo'osoa aijo' misa' dosa'. Sumo aitu mule' de samian na langkoyang mo'osoa misa' alati'nyo baladosa'. Ola aha anu mo'osoa aijo', saidi' mae mongahopi manjoo' na kasusa'an. Ka' ku kahanda'i da kita Utus madi' nukona nu kasusa'an aijo'.

²⁹Pongka'oho'ku sumo uuka, To Utu-utus: Kita madi'mo ko tempo' manjoo'. Otampu'uni tempo' uuka toto samian anu ko bengkele'mo tionyo ia tumuu' susumo madi' ko bengkele'nyo;

³⁰mian anu humang, tumuu'mo susumo ia madi' ko kasusa'an, mian anu kumojo, susumo ia madi' lame'; mian anu nongolimo, apa-apaa susumo ia madi' ko apa-apaa;

³¹ka' mian anu manjoo' na ulusan i dunia, tionyo ia tumuu' susumo ia madi' nupogago' nu hahan aijo'. Kalana madi'mo pin na dunia aiya, bau-baunyo anu susumo aiya tionyo lanyapmo!

³²Pongka'oho'ku da kita Utus bebas i kasusa'an. Mian anu madi' ko bengkele'nyo momposa'angu'mo pikilannyo i hahan mongkona Tumpu, kalana ia mongka'oho' momposanang Tumpu.

³³Panyo mian anu ko bengkele'nyo manjoo' mompopikilakon hahan nu dunia aiya, kalana ia mongka'oho' momposanang kinyonyoa nu bengkele'nyo;

³⁴ahennyo anu nupopikilakon mobagi-bagimo. Samian na boune anu madi' ko langkai'nyo, kabai samian na langkoyang, manjoo' mompopikilakon hahan mongkona Tumpu, kalana ia mongka'oho' da butong ka' santuu'nyo timbali Tumpu na tumpunyo. Panyo samian na boune anu ko langkai'nyomo, momposa'angu'mo pikilannyo i hahan nu dunia aiya, kalana ia mongka'oho'mo momposanang kinyonyoa nu langkai'nyo.

³⁵Kutulis iwi-iwi' aijo' da bau posi ka'ima'anum, misa' kalana kahanda' montewa' aiya, ka' montewa' aijo'. Anu ku ku ka'oho' ola da kita Utus mombau anu totu'u ka' patut, ka' da kita Utus timbali momposa'angu' pikilanum hi Tumpu.

³⁶De toto samian mongoa'i madi' mompojalan anu sahondo-hondonyo hi dohoinyo, de ia madi' moko ala mongintim napisunyo, ka' nu oa'i palalu mo'osoa tiba langkoyang aijo', sahanyo nubau apaa na anu nu oa'i ma'ima'. Ia madi' baladosa' de aha mo'osoa.

³⁷Panyo de toto samian nongalamo katantuan i uno nu kinyonyoanyo madi' mo'osoa tiba dohoinyo, ka' katantuannyo aijo' madi' pinakisa, saba' apaa na anu nubau aijo' ma'ima', asan mahoson totu-totu'u na kinyonyoanyo mompojalan.

³⁸Katantuannyo, mian anu mo'osoa ma'ima' na baunyo, ka' mian anu madi' mo'osoa lebe ma'ima' mule' na baunyo.

³⁹Samian na boune anu mo'osoamo totoongmo hi langkai'nyo, de langkai'nyo daagi' tumuu'. De langkai'nyo silakamo, boune aijo' bebasmo na mo'osoa mule' tiba mian anu nuka'ima'i, asan po'osoan aijo' po'osoan nu Kristen.

⁴⁰Pakalaus ia lebe untung de ia madi'mo po'ule' mo'osoa. Aijo' posi pikilanku, panyo kututugi apaa na anu kutaloakon aijo' te kuasa nu Roh nu Tumpu.