Read Saluan 1 KORINTUS 8 Bible Online

1 KORINTUS 8 - Saluan bible

1 KORINTUS 8

¹Uuka aiya mongkona anu okaan anu obee' salaku osombahkon hi pilogot. Memang totu'u sumo anu tinaloakonmo nu mian, “Kita iwi-iwi' pinandemo.” Panyo kapandean monsaduakon mian da kobubuun, panyo kalibosan mombau da mian timbali ma'ima'.

²Mian anu monsangka tukoonyo manjoo' na anu nusumbu', sabenannyo ma'isa monsumbu' anu sahondo-hondonyo.

³Panyo anu totu-totu'u mongkalibosi Tumpu, ia nusumbu' nu Tumpu.

⁴Han painggaga mongkaan kaanon anu sinombahkonmo hi pilogot, osumbu'to saba' te pilogot monggambanakon apa-apaa anu sabenannyo i madi'an. Ka' osumbu'to mule' saba' Tumpu ola sa'angu'; madi' ko sangga'atannyo.

⁵Memang manjoo' ahi' na anu osanggohi pilogot tiba tumpu; anu kiita' i langit tiba anu aiya i dunia.

⁶Panyo hi kita, Tumpu ola sa'a-sa'angu'nyo. Ia Tuuma anu nompotimbalimo iwi-iwi' na anu daagi'. Bau kapaluan-Njo na kita tumuu'. Ka' Tumpu suele ola sa'angu', aijo'mo i Yesus Kristus. Anu binau iwi-iwi' nolengkat mae hi Ia, ka' kalana Ia sahingga kita tinumuu'mo.

⁷Mau mule' sumo aitu, madi' iwi-iwi' na mian monsumbu' anu sumo aijo'. Daagi' ko anu naipuan mae monsombah pilogot. Jadi, kalana aijo' sampe tempo' uuka aha daagi' monginau' te kaanon anu sinombahkonmo hi pilogot, aijo' kaanonmo nu pilogot. Sahingga de nukaan nu aha na kaanon aijo', aha mongoa'i baladosamo; kalana palesaya nu aha ma'isa mahoson.

⁸Sabenannyo de ola kaanon madi' monsabapi pompahasumbu'anto tiba Tumpu timbali lebe ma'ima'. De kita mongkaan kaanon aijo', kita madi' mohumpak ka'untungan apa-apaa. Panyo mule' de kita madi' mongkaan kaanon aijo', kita mule' madi' ko lugi'nyo apa-apaa.

⁹Panyo obala ingati! Boli mule' monsaduakon mian sangga'at timbali baladosa' — kalana palesayanyo ma'isa mahoson — kalana kita Utus bebas mombau maumo pa'apaa.

¹⁰Pongka'oho'ku sumo uuka: Bisuannyo kita Utus, anu mahosonmo na palesaya hau-haunyo suha-suhang mongkaan i pontalakanian pilogot. Lantas daagi' ko mian montoa kita Utus suha-suhang mongkaan i kiijo'. De palesaya nu mian aijo' madi' mahoson, temisa' aijo' monsaduakonmo mian aijo' baanimo mongkaan kaanon anu binee'mo i pilogot aijo'?

¹¹Jadi kalana aijo', sahingga palesaya nu kita Utus monsaduakonmo mian anu palesayanyo madi' mahoson aijo' timbalimo madi' ma'ima'. Padahan i Kristus sinilaka kalana mian aijo' suele.

¹²Ka' de kita Utus mombau kasala'an pokakana sumo aijo' hi to Utu-utus Kristen, — aijo' kita Utus mongideimo palesaya nu aha anu ma'isa mahoson — jadi kita Utus baladosa'mo hi Kristus.

¹³Mokonyo aijo' de kaanon monsaduakonmo Utusku baladosa', saba' aku madi'mo hondo daagi' mongkaan ponoha'. Kalana boli-boli Utusku baladosa'mo kalana aku.