Read Saluan 2 KORINTUS 13 Bible Online

2 KORINTUS 13 - Saluan bible

2 KORINTUS 13

¹ Aiyamo na ko pintolunnyo aku toka molenga komiu. I uno nu Kitab nu Tumpu tinulismo, “Batu-batu palakala tionyo nu tinjohi nu sakisi ua'aha kabai totolu' na mian monsakisi, atina'je ka' palakala aijo' opototu'u.”

²To mia-mian anu tempo'nyo naipuan mae nombaumo dosa' ka' mian iwi-iwi' sangga'at pinoto'ingkumo momonanyo tempo'nyo aku namba nolenga komiu kinopinduannyo. Uuka aiya hau-haunyo aku to majo'onan tiba komiu, po'ule' ku poto'i, saba' de aku po'ule'mo toka madi' ko samian pe'e itina' hi aha na anu madi' o hukum.

³Sahingga ohumpakje miu iwi-iwi' na bukuti' anu o kahanda'i miu taalu' totu-totu'u potataengku nolengkat mae hi Kristus. De i Kristus mompalentahmo komiu, ia madi' mompalentah ola yayamo, panyo ahi' nu potoaje na kuasanyo i tina' hi komiu.

⁴Memang tempo'nyo Ia sinalib, Ia madi'mo noko ala nombau apa-apaa, panyo uuka aiya Ia tinumuu'mo kalana kuasa nu Tumpu Allah. Kami suele madi' moko ala mombau apa-apaa i uno nu kantumuu'an mami mosa'angu' tiba i Kristus. Panyo de mongahopi komiu, kami suele mahosonmo hingga-hinggat tiba i Kristus kalana kuasa nu Tumpu.

⁵Soba posi uji' na butong miu pa' totu-totu'u komiu tumuu' kalana palesaya hi Kristus! Tantu osumbu'je miu taalu' i Kristus Yesus daagi' itina' hi komiu! — sangalasan na hannyo de memang komiu madi' totu-totu'u palesaya.

⁶Ku poita na komiu da monsumbu' taalu' kami misa' mian anu madi' moko ala montahan ponguji'.

⁷Kami balado'a hi Tumpu da Ia mongka'oho' montulungi komiu da madi'mo mombau kasala'an. Misa' mongka'oho' mompotoa au'aitu kami aiya memang pande na mompojalan palentah, panyo da komiu mombau apaa na anu nukahanda'i nu Tumpu — mau mule' otoa kami madi' moko ala mombau, madi' mongkuka!

⁸Kalana kami madi' noko ala nombau apa-apaa anu mompahasala' tiba anu sahondo-hondonyo; kami tionyo mombatuki anu totu'u.

⁹Kami sanang de kami madi' moko ala mombau apa-apaa, ka' komiu na mahoson. Kami mule' balado'a da komiu timbali ganap.

¹⁰Mokonyo aijo' aku nontulismo sulat aiya tempo'nyo aku ma'isa itina' hi komiu. Desumo aijo', de aku tokamo saidi' mae, madi'mo pilenje mapohos na aku mompalentah komiu mompake kakuasa'an anu binee' nu Tumpu hi belengku. Kakuasa'an aijo' binee' da pombangonakon komiu, misa' da bau pohansuni.

¹¹Ahennyo, to Utu-utus, sabole-bole ahi' komiu lame', ka' bala usaha da timbali ganap. Ala na pokinde'ku iwi-iwi'. Sabole-bole ahi' komiu momposa'angu' kinyonyoa ka' mompaha hongo-hongo. Tumpu Allah Anu talalo Mongkalibosi ka' saja' mompodame, aijo' na saja' monjagai komiu.

¹²Mompaha sala-salando'ai samian ka' samian nu kalibosan salaku poto utusan nu mian Kristen. Iwi-iwi' na mian anu palesayamo hi Tumpu nompakatu salan do'a hi belemiu.

¹³I Tumpu Yesus Kristus mombalakati komiu. Tumpu mongkalibosi komiu ka' Roh nu Tumpu monjagai komiu iwi-iwi'! Tabea' mami, I Paulus 29