Read Saluan 2 KORINTUS 2 Bible Online

2 KORINTUS 2 - Saluan bible

2 KORINTUS 2

¹Mokonyo aitu aku nombaumo katantuan madi'mo toka hi komiu mamba montoa dumo monsaduakon komiu molibos.

²Kalana de aku monsaduakon komiu molibos iheje na mohase' aku, de misa' mian haha itina'mo, anu suele pinopoliboskumo na kinyonyoanyo?

³Mokonyo aijo' tinulisku na sulat itina' toka hi komiu. Aku madi' mongka'oho' mamba montoa komiu, lantas opolibosmo miu, mae padahan komiu ahi' na anu sabenannyo mompolame' aku. Kalana ku palesaya de aku lame', makia' komiu utus iwi-iwi' suele lame' ahi'.

⁴Maboat ka' molibos na kinyonyoangku montulis sulat toka hi komiu ka' saja' monjujuhakon lolu'. Kahanda'ku misa' da komiu molibos, panyo da osumbu' miu taalu' aku talalo hondo mongkalibosi komiu.

⁵De ko mian anu monsaduakon kalibosan, saba' han aijo' binaunyo misa' kona hi belengku, panyo kona hi kita Utus iwi-iwi' kabai tahahumo sangkiding kona hi sambagian anu itina' hi komiu Utus. Aku madi' mongka'oho' talalo mompekangi ia.

⁶Kona hi mian anu sumo aijo', hukuman anu obee' hi ia nu kada'isanannyo itina' hi kita Utus sukupmo.

⁷Uuka aiya komiu tionyo mongampuni ia ka' po'ule' mongkakeha'i ia da boli talalo molibos na kinyonyoanyo dumo talalomo susa' na ia.

⁸Kalana aijo' ku poita, da komiu po'ule' mompotoa hi ia taalu' totu-totu'u komiu mongkalibosi ahi' ia.

⁹Aku nontulis sulat itina' toka hi komiu ko kahanda' monguji' komiu, pa' komiu saja' mongka'oho' mombatuki sonto'-sonto' lengkat hi belengku.

¹⁰De komiu mongampuni mian anu nombaumo sala' hi komiu, saba' aku suele mongampuni ahi' mian aijo'. Kalana apaa na anu ingampunankumo — de memang ko anu palalu o ampuni — aijo' ku ampuni i ahop i Kristus bau ka'ima'an nu komiu.

¹¹Kubau sumo aijo' da Ibilis boli mongala kasampatan mongkuasai kita; kalana osumbu'to na tanga'annyo iwi-iwi'.

¹² Tempo'nyo aku tinoka i Troas kahanda' mompolele Lele Ma'ima' mongkona i Kristus, Tumpu nombuka'mo jalan hi belengku da mokalaja i tampat aijo'.

¹³Panyo aku madi' sanang, kalana madi' siningkabot tiba utusto i Titus kiijo' mae. Sahingga aku nomoita siloloa hi to mia-mian i tampat kiijo' lantas namba i Makedonia.

¹⁴Panyo talima kase hi Tumpu! Ia saja' nolaya' kami nombatuki balondaan i kamenangan i Kristus kalana kami tumuu' nosa'angu'mo tiba Ia. Tumpu nompake kami da lele mongkona i Kristus tolele sumo nohong anu monohongi iyaya mae.

¹⁵Kalana kami sumo nohong nu kamangian anu manohong, anu pinapuanmo i Kristus bau kapalaluan nu Tumpu. Toka hi to mia-mian anu hau-haunyo mongahopi kahansunan, kami aiya sumo nohong nu kapatean anu mompatei; panyo toka hi to mia-mian anu hau-haunyo oposalamat, kami sumo nohong anu momboa kantumuu'an. Yo, ihe na anu timbali moko ganapi kalaja aiya?

¹⁷Kami madi' sumo mian da'isan anu mompotimbali lele lengkat mae hi Tumpu ola sumo balu-balukon. Pongka'oho' mami anu sahondo-hondonyo, kalana kami binee'anmo kalaja nu Tumpu. Ka' Tumpu na nosi toamo saba' kami nompotokamo lele aijo' susumo to posa-posaihon i Kristus.