Read Saluan 2 KORINTUS 3 Bible Online

2 KORINTUS 3 - Saluan bible

2 KORINTUS 3

¹Pa' aiya otoa au'aitu kami daagi' mompuji' butong kami? Kabai o kami palalu mombau sulat pompuji' komiu, kabai lengkat hi komiu, susumo anu nubau nu to mia-mian sangga'at?

²To Utu-utusmo na timbali sulat pompuji' mami, anu tuli-tulis i kinyonyoa mami, ka' anu timbali osumbu' ka' o basa' nu batu-batu mian.

³ Posi aha timbali montoa saba' komiu Utus pokakanamo sulat anu tinulis i Kristus, anu pinakatunyo ka' pinotokakon mami. Sulat aitu misa' tinulis nu tinta, panyo Roh nu Tumpu anu tumuu'; misa' mule' i batu tulis, panyo i kinyonyoa nu mian.

⁴Kami motatae sumo aijo' kalana palesaya mami totu-totu'u hi Tumpu anu i humpak hi Kristus.

⁵Kami madi' ko apa-apaa moko ala momponyata' au'aitu kami moko ala mombau kalaja aiya, panyo Tumpu na nombee'i kahosonan aijo' hi kami da moko ala mombau.

⁶ Iamo na nompotimbali kami da moko ala timbali posaihon i palajanjian anu bu'ou; palajanjian anu lengkat hi Roh nu Tumpu Allah, misa' anu tuli-tulis i atulan. Kalana anu tuli-tulis aijo' momboa kapatean, panyo Roh nu Tumpu aijo' mombee'i kantumuu'an.

⁷ Tempo'nyo janji' anu momboa kapatean aijo' binau ka' binotik i batu, jingka nu Tumpu lonyingkaban na nonjingkai ohup i Musa. Jingka-Nyo aijo' lonsinoan hondo, sahingga bansa Israel madi' noko ala nontoa ohup i Musa, mau mule' jingka i ohupnyo aijo' montampu'unimo mopoho' tempo'nyo aitu. Yo, de mojanji' anu ola momboa kapatean aijo' pinododo ka' taha-tahahumo na lonyingkaban,

⁸tantu mojanji' anu nubee' nu Roh nu Tumpu lebe lonyingkaban mule' na nompokododo.

⁹De palajanjian anu mohukum mian aijo', sumo aijo'mo na ko lonyingkabannyo, tantu lebe lonyingkaban mule' na palajanjian anu moko ala mompotimbali mian mompo'ule ma'ima' tiba Tumpu Allah.

¹⁰Timbali otaloakon saba' apaa na anu naipuan mae lonyingkaban, madi'mo daagi' lonyingkaban kalana daagi'mo ko anu lonyingkaban tempo' uuka aiya.

¹¹De pa'apaa na anu montahan ola sasaingoni' sumo aijo'mo na ko lonyingkabannyo tantu anu montahan sampe toka sidu-sidutu' lebe lonyingkaban mule'.

¹²Kalana kami montaha'imani anu susumo aijo', sahingga kami baani na motatae sumo aijo'.

¹³ Kami madi' sumo i Musa mongkukubi ohupnyo nu kukumbung da bansa Israel madi' montoa jingka nu Tumpu anu hau-haunyomo mopoho' ka' madi'mo kantoan i ohupnyo. Pikilan nu aha kinukumbunganmo.

¹⁴Ka' toka sampe sinaa aiya pikilan nu aha daagi' nukukumbungi nu kukumbung de aha mombasa'mo kitab-kitab mongkona janji' anu pini-pininmo aijo'. Kukumbung aijo' timbali tonsukap de mian mosa'angu'mo tiba i Kristus.

¹⁵Sampe tempo' uuka de aha mombasa'mo kitab-kitab i Musa, kukumbung aijo' daagi' mongkukumbungi pikilan nu aha.

¹⁶Panyo de daagi' ko mian toka mangadap hi Tumpu, kukumbung aijo' o alinakonmo i ohup nu mian aijo'.

¹⁷Jadi Tumpu anu sina-sinanggo aiya, aijo'mo Roh. Ka' iya na ko Roh nu Tumpu daagi', i kiijo' mule' daagi' ko kabebasan.

¹⁸Uuka aiya ohupto iwi-iwi' madi'mo kinukumbungan nu kukumbung, ka' kita monjingkakonmo lonyingkaban nu i Tumpu Yesus. Ka' kalana aijo' kita saja' obali'i susumo ia lebe pin lebe timbalimo lonyingkaban na kita. Anu mompolonyingkaban aijo' lengkat mae hi Roh, ka' Roh aijo'mo na Tumpu.