Read Saluan 2 KORINTUS 6 Bible Online

2 KORINTUS 6 - Saluan bible

2 KORINTUS 6

¹Kalana kami mokalaja hingga-hinggat tiba Tumpu, mokonyo aijo' opoita mami sabole-bole boli komiu monsia-siakon ka'ima'an nu kinyonyoa nu Tumpu aijo'.

² I uno nu Kitab nu Tumpu, Tumpu notataemo, “I tempo' anu kinaima'an-Kumo, Aku nohongomo beleyum, ka' i sinaa kasalamatan, Aku nontulungimo beleyum.” Tutugi ima-ima', uukamo aiya na tempo' anu Ku ka'ima'i aijo'. Uukamo aiya na sinaanyo bau pomposalamatan!

³Kami madi' mongka'oho' kalaja mami opisala'i. Kalana aijo' kami bala usaha madi' mombee'i pikilan hi samian pe'e da mombau han aijo'.

⁴Panyo ola ahi' i uno nu iwi-iwi' na han, kami mompotoa saba' kami te to posa-posaihon nu Tumpu. Kalana sagala lupa na kasansala'an anu ingoa'an sinabaanakonmo mami:

⁵ kami sinakisa, tinalungku', ka' opatei; kami nokalajamo make-makeke, toto minsan madi' hoyot ka' toto minsan madi'mo ko anu okaan.

⁶Tiba gau' anu hodi', pande, sabaan ka' ma'ima' na kinyonyoa, kami mompotoa saba' kami, aijo'mo posaihon nu Tumpu Allah. Tiba mule' montaha'imani pontulungi nu Roh nu Tumpu Allah, ka' mongkalibosi totu-totu'u lengkat i kinyonyoa,

⁷ka' mombebakon lele anu lengkat mae hi Tumpu ka' tiba kuasa nu Tumpu, kami nompotoamo saba' kami aiya aijo'mo to posa-posaihon nu Tumpu. Kami mintoong i kahanda' nu Tumpu bau salaku toongon mami monggagakon kabai mule' bau pontinjohi butong mami.

⁸Kami o adati, panyo mule' opopo'ambang; o puji' ka' mule' o'alu. Mau mule' kinyonyoa mami sahondo-hondonyo, kami opobau-bau baleko'.

⁹Kami osanggohi madi' talasanggo, panyo iwi-iwi' mian monsumbu' kami. Kami osangka sinilakamo, panyo nyata' kami daagi' tumuu'. Mau mule' kami osakisa, kami madi' sinilaka.

¹⁰Mau mule' kinyonyoa mami oposusa', panyo kami saja' ahi' lame'. Kami otoa kasiasi, panyo kami nompotimbalimo manjoo' na mian kinayamo. Otoa kami madi' ko apa-apaa, panyo sabenannyo iwi-iwi' daagi' hi kami.

¹¹To Utu-utus anu okanonongi i Korintus! Ilosutmo mami sala'balo hi komiu. Iwi-iwi' isi nu kinyonyoa mami tinaeyakonmo mami.

¹²Kinyonyoa mami saja' opotalang mami hi komiu. Ola ahi' komiu na madi' mompotalang mae kinyonyoa miu hi kami.

¹³Uuka aiya sahanyo aku motataemo sumo posi hi to ana-anakku. Opotalangmo mae ahi' suele na kinyonyoa miu hi kami.

¹⁴Boli mongka'oho' timbali sangalu nu to mia-mian anu madi' palesaya hi Yesus; aijo' madi' sosok. Iya na toho' ka'ima'an mosa'angu' tiba ka'idekan! Madi' toho' jingka maninggalo' tiba pintung.

¹⁵Madi' toho' i Kristus mosa'angu'mo tiba Ibilis. Te apaa na pokakanannyo mian Kristen tiba misa' mian Kristen?

¹⁶ Apaa na tuusanannyo Laigan nu Tumpu tiba laigan nu pilogot? Kita aiya Laigan nu Tumpu, aijo'mo Tumpu anu tumuu'. Posi Tumpu na notatae, “Aku jojoongmo hi aha, ka' tumuu' hingga-hinggat tiba aha. Aku timbalimo Tumpu nu aha, ka' aha timbalimo mian anu palesayamo hi beleng-Ku.

¹⁷ Mokonyo aijo', pala'i na to mia-mian anu madi' monsumbu' Tumpu aijo', ka' boli mogalum na butongum hi aha. Boli hondo-hondo monsasuhi anu mahenyu, da Ku talimaje na komiu.

¹⁸ Aku timbalimo Tuuma miu, ka' komiu timbalimo to ana-anak-Ku, sumo aitu na koonyo nu Tumpu Anu Matangkas na kuasanyo.”