Read Saluan GALATIA 4 Bible Online

GALATIA 4 - Saluan bible

GALATIA 4

¹Panyo palalu hondo ku poto'i: de samian anu mohaki halata' umunnyo ma'isa motu'a, daagi' ko mian anu monjagai ia ka' mongulus iwi-iwi' na kapalaluannyo sampe ia montokaimo umun anu tinantukanmo nu tuumanyo. Ia obau pokakana sumo samian na posaihon, mau mule' sabenannyo ia na tumpu nu halata' iwi-iwi' aijo'.

³Sumo aitumo tiba kita: De kita ma'isa tu'anyo, kita nubotuani nu to roh-roh anu mongkuasai dunia aiya.

⁴Panyo tinokamo i tempo'nyo anu tinantukanmo, Tumpu nonsaimo mae Anak-Nyo namba i dunia. Anak-Nyo aijo' i hampeakon nu samian na boune ka' tinumuu'mo i uno nu kakuasa'an nu atulan nu agama.

⁵ Tiba jalan anu sumo aijo' Ia nompobebasmo to mia-mian anu tumuu' i uno nu kakuasa'an nu atulan nu agama; da kita mule' moko ala timbali to ana-anak nu Tumpu.

⁶Kalana komiu to ana-anakmo nu Tumpu, Tumpu nonsaimo mae Roh nu Anak-Nyo da minsoop i uno nu kinyonyoa nu kita Utus ka' i kinyonyoangku, aijo'mo Roh anu notatae, “Tuuma, o, Tuumangku.”

⁷Jadi, komiu misa'mo daagi' botuan, panyo tinimbalimo anak. Ka' kalana komiu anakmo nu Tumpu, sahingga Tumpu mombee'mo hi komiu iwi-iwi' apaa na anu pinosadiakon-Nyomo hi to ana-anak-Nyo.

⁸Uutu mae komiu madi' monsumbu' Tumpu, mokonyo aijo' tinimbalimo botuan nu to kua-kuasa' anu osangka sumo Tumpu, panyo sabenannyo misa' Tumpu anu sahondo-hondonyo.

⁹Panyo uuka komiu nonsumbu'mo Tumpu, kabai lebe kona mule', Tumpu nonsumbu'mo komiu. Jadi, kadaka' komiu mongka'oho' mule' minsusule' hi to roh-roh nu dunia aiya anu madi' moko ala mombau apa-apaa ka' kasiasi? Kadaka' komiu mongka'oho' mule' nubotuani nu to roh-roh aijo'?

¹⁰Komiu molame'akon to sina-sinaa anu tinantukanmo, to bitu-bitu'on anu tinantukanmo, ka' to taun-taun anu tinantukanmo.

¹¹Ku kameatakon, boli-boli lawengku hi komiu ola palasuma.

¹²To Utu-utus! Ku poita hondo-hondo da komiu timbali pokakana sumo aku. Kalana aku suele tinimbalimo sumo komiu. Komiu madi' nombau kasala'an apa-apaa hi belengku.

¹³Komiu tantu daagi' monginau' apaa na anu nonsabapimo aku i moonanyo nompolele Lele Ma'ima' aijo' hi komiu. Sababnyo aitumo aku i nasakit.

¹⁴Tempo'nyo aitu komiu madi' nongkahumimi'i aku, maumo ka'ada'an nu butongku sumomo salaku bau ponsobai anu talalomo hondo hi komiu. Komiu ola ahi' nontalimamo aku sumo montalimamo malaikat nu Tumpu kabai sumo nontalimamo i Kristus Yesus.

¹⁵Komiu binilahimo hondo tempo'nyo aitu. Panyo uuka, iyamo mae na kabilahian aijo'? Kusumbu' tempo'nyo aitu komiu halala'mo na mongkubetakon posi mataum ka' mombee'mo mae hi belengku, de aijo' timbali obau.

¹⁶Te komiu uuka monganggapmo aku sumo sampo bali', kalana aku monsisikakonmo anu totu'u hi komiu?

¹⁷To mia-mian sangga'at aijo' makeke hondo na molio komiu, panyo kahanda' nu aha madi' ma'ima'. Aha ola mongka'oho' mongga'atakon pompahasumbu'an miu tiba kami, da makeke hondo na komiu mombatuki aha.

¹⁸Memang ma'ima' na makeke i uno nu hahan anu ma'ima', asan saja' sumo aijo' ka' boli ola de aku daagi' aiya tiba komiu.

¹⁹To ana-anakku anu ku kanonongi! Uuka aiya aku po'ule' mule' nongoa'i sansala kalana komiu. Aku mongoa'i sansala sumomo samian na tina nu anak anu mongoa'imo sansala tempo'nyo mohampeakonmo anak. Aku saja' mongoa'i sansala, de sipat-sipat i Kristus ma'isa minsoop hi butong miu!

²⁰Aku molibos hondo na jojoong i aiya hi komiu, da aku timbali motatae hi beleyum nu potatae anu sangalasan, kalana madi'mo kusumbu' apaa na anu kahanda' kubau hi komiu!

²¹To Utu-utus anu kahanda' tumuu' da nu kuasai nu to atu-atulan nu agama, soba hongo mae na aku! Ku poto'ije hi komiu apaa na anu totu'u tinulismo i uno nu Kitab Atulan i Musa.

²² I kiijo' tinulis saba' i Abraham ko anak ua'aha: Tina nu anak samian te posaihon, ka' tina nu anak sangga'at aijo' mian anu bebas.

²³Anak nu boune anu tinimbali posaihon, i hampe biasa kalana pongka'oho' nu manusia. Panyo anak nu boune anu bebas, i hampe kalana jinanji'mo nu Tumpu.

²⁴Aiya timbali opake sumo ande-andeon. Ua'aha na boune aijo', aijo'mo susumo ohua' na palajanjian: samian nolengkat mae i Bungkutnyo nu Sinai — aitumo i Hagar; to ana-anaknyo pinohampe salaku posaihon.

²⁵Jadi, i Hagar aijo'mo Bungkutnyo nu Sinai, i lipu' nu Arab. Ia salaku tanda nu kota Yerusalem tiba iwi-iwi' na anu jojoong, uuka aiya tinimbalimo posaihon.

²⁶Panyo Yerusalem anu i suluga', aijo'mo Yerusalem anu bebas, ka' iamo na nene'to.

²⁷ Kalana i uno nu Kitab nu Tumpu tinulismo, “Balame'-lame'mo na beleyum boune lengke', anu madi' toho' nompohampe. Bila-bilahimo ka' lewa'mo pinsoso oya' na beleyum anu madi' toho' mongka'oa'i monganak! Kalana boune anu pinala'ianmo nu mo'anenyo, lebe mohumpak manjoo' na anak molingkudui boune anu tumuu' tiba langkai'nyo.”

²⁸To Utu-utus! Komiu atina' to ana-anak nu Tumpu anu pinohampe kalana jinanji'mo nu Tumpu; komiu pokakanamo sumo i Ishak.

²⁹ Tempo'nyo aitu anak anu i hampe kalana pongka'oho' nu manusia, monsakisa anak anu pinohampe kalana pongka'oho' nu Roh nu Tumpu. Sumo aitumo tempo' uuka aiya.

³⁰ Panyo apaa na anu tinulismo i uno nu Kitab nu Tumpu? I kiijo' tinulismo sumo uuka: “O laa' na posaihon boune aijo', tiba anaknyo, kalana anak nu posaihon boune aijo', madi' timbali ko hak hingga-hinggat tiba anak nu boune anu bebas aijo'.”

³¹Jadi to Utu-utus, kita aiya misa' to ana-anak nu samian na posaihon boune; kita to ana-anak nu boune anu bebas.