Read Saluan GALATIA 5 Bible Online

GALATIA 5 - Saluan bible

GALATIA 5

¹Kita uuka aiya binebasmo kalana i Kristus nompobebasmo kita! Kalana aijo' otoongi dodo-dodo na kabebasan miu, ka' bolimo mongka'oho' obotuani mule'.

²Jaga, de komiu mompoita da o sunat, aijo' alati'nyo i Kristus madi'mo daagi' ko gunanyo hi komiu. Anu nontaeakon aiya aku, i Paulus.

³Po'ule' mule' kupotuka' hi mian anu mompoita da o sunat, sabenanyo ia palalu ahi' mompojalan iwi-iwi' na atulan nu agama!

⁴De komiu ko usaha da mompo'ule'mo ma'ima' tiba Tumpu olio ihan mombatuki atulan nu agama, aijo' alati'nyo pompahasumbu'an miu tiba i Kristus mobotu'mo. Desumo aitu komiu tumuu' i sambiha'nyomo nu balakat nu Tumpu.

⁵Panyo de hi kami, kami taha'iman saba' de Roh nu Tumpu Allah na montulungi ka' mimpu'u kalana kami palesayamo hi Kristus, Tumpu montalimamo kami mompo'ule'mo ma'ima' tiba Ia.

⁶Kalana de kita mosa'angu'mo tiba i Kristus Yesus, han mombatuki kabai madi' mombatuki atulan nu sunat, madi'mo mongkuka. Anu palalu hondo ola ahi' palesayamo hi Kristus, ka' aijo' oponyata' i uno nu kita mongkalibosi mian sangga'at.

⁷U'utu mae komiu nokalajamo ima-ima'! Uuka aiya na kadaka' komiu madi'mo nontuluti pongka'oho' nu Tumpu? Ihe na nonsale'imo komiu?

⁸Tantu anu mombaumo aijo' misa' Tumpu anu nolagamo komiu!

⁹ “Ragi anu sangkiding mompoliba'mo iwi-iwi' na anu okompo-kompon,” na koonyo nu mian.

¹⁰Mau pe'e sumo aijo' daagi' kupalesaya na komiu madi'mo ahi' montoongi pikilan sangga'at, kalana kita nosa'angu'mo tiba i Kristus. Ka' kupalesaya totu-totu'u saba' mau mule' pa' ihe na mompokalangkabut pikilan miu, nuhukum nu Tumpu.

¹¹Mongkona aku, to Utu-utus, kadaka' aku saja' oka'ideki de aku daagi' mompolele tukoongku atulan nu sunat aijo' daagi' ahi' palalu? De aku memang mompolele sumo aijo', saba' anu ku polele mongkona salib i Kristus madi'mo timbali monsaduakon painggagan.

¹²Lebe ma'ima' to mia-mian anu mompokalangkabut pikilan miu aijo' mosabatmo bolimo minsoop i jama'at!

¹³Kita Utus ilagamo da timbali mian anu bebas. Panyo boli mompake kabebasan miu aijo' da saja' mombau mau mule' pa' apaa na anu oka'oho' obau miu. Ola ahi' komiu tionyo mompaha kali-kalibosi ka' mompaha toa-toa anu kakulangan.

¹⁴ Iwi-iwi' na atulan nu agama pinosa'angu'mo i uno nu palentah anu sa'a-sa'angu'nyomo aiya, “Tionyo beleyum mongkalibosi sangko manusia susumo beleyum mongkalibosi posi butongum.”

¹⁵Panyo de komiu mompaha pisa-pisala'i, jaga dumo saidi' mae komiu hingga-hinggat mongoa'i kasusa'an.

¹⁶Makisutku sumo uuka: Sahanyo Roh nu Tumpu na mompotiju' komiu, ka' boli tumuu' mombatuki pongka'oho' nu sipat nu manusia.

¹⁷ Kalana pongka'oho' nu manusia mompahasala' tiba pongka'oho' nu Roh nu Tumpu, ka' pongka'oho' nu Roh nu Tumpu mompahasala' tiba pongka'oho' nu manusia. Ohu-ohua' aijo' madi' mompaha kona, sahingga komiu madi' moko ala mombau apaa na anu okahanda'i miu.

¹⁸Panyo de Roh nu Tumpu na mompotiju' komiu, saba' komiu madi'mo nukuasai nu atulan nu agama.

¹⁹Anu nu kahanda'i nu sipat nu manusia onyata' i palabuatan masala', pahengas ka' madi' halus obau;

²⁰i uno nu han monsombah pilogot ka' ilimu' ponsumbu'an; da nu ka'ima'i nu mian ka' opake de mompaha idekmo, mahantuda', minsihip, sampa' motambuha', ka' mosi ulus posi butong; mosubali ka' mosi pintu-pintuus,

²¹ka' madi' sanang hi samian, saja' malangu, saja' mombau bau-bauon, ka' sangga-sangga'atnyo. Mongkona iwi-iwi' aijo' ku pokinde'i na komiu uuka aiya susumo aku nompokinde'imo komiu u'utu mae, tukoongku to mia-mian anu nombaumo hahan anu sumo aijo', madi'mo timbali oposoop mian anu palesayamo hi Tumpu.

²²Sumo aitu mule' de to mia-mian nupotiju'mo nu Roh nu Tumpu Allah, kasawe'annyo aijo'mo: Aha mompaha kali-kalibosimo, aha lame'mo, aha madi'mo lewa' mombau apa-apaa; aha sabaanmo ka' monginau' sangalu, aha mongkanonongi mian sangga'at, aha tulu-tulutan,

²³aha madi' takabun, ka' saja' moko ala mongkuasai anu nu ka'ima'i nu butong. Madi' ko atulan nu agama anu montewa' hahan anu sumo aijo'.

²⁴To mia-mian anu i Kristus Yesusmo na tumpunyo, mian haha aijo' nompateimo sipatnyo salaku manusia tiba iwi-iwi' na napisunyo ka' apaa na anu nu ka'ima'i.

²⁵Roh nu Tumpu nombee'imo kita kantumuu'an anu bu'ou; mokonyo aijo' Ia suele mongkuasaimo ahi' kantumuu'anto.

²⁶Kita madi'mo timbali takabun, ka' mompaha saki-sakiti kinyonyoa, ka' mongka'ideki samian ka' samian.