Read Saluan EFESUS 4 Bible Online

EFESUS 4 - Saluan bible

EFESUS 4

¹Aijo' na sababnyo aku — mian anu tinalungku'mo, anu tinalungku'mo kalana nombaumo anu pinalentahkon nu Tumpu — momoita sabole-bole hi belemiu: da kantumuu'anum sumo ahi' mian anu i lagamo nu Tumpu mo'imboa tiba apaa na makisutnyo komiu i lagamo.

² Tionyo ahi' komiu saja' mati aluk na kinyonyoa, motatae madi' ko pesa-pesa ka' sabaan. Potoa na kalibosanum montulungi samian ka' samian.

³O'usahakon totu-totu'u da tumuu' saja' dame, da posa'angu'an anu pinodaagi'mo nu Roh nu Tumpu tataap ma'ima'.

⁴Ola sa'angu' na butong ka' sa'angu' na Roh. Sumo aitumo mule' na komiu i laga da ola sa'angu' na anu otaha'imani ka' mule' pokakana.

⁵Ola sa'angu' na Tumpu, sa'angu' na kapalesaya'an, sa'angu' na palamandian,

⁶ka' sa'angu' na Tumpu anu timbali Tuuma nu iwi-iwi' mian. Iamo na Tumpu nu songko-songko na langa, anu nompotimbalimo iwi-iwi' ka' mongkuasai iwi-iwi'.

⁷Kita toto samian mohumpakmo pa' apaa na nukahanda'i nubee' i Kristus.

⁸ I uno nu Kitab nu Tumpu tinulismo, “Salatan Ia noliba'mo i tampat anu matangkas hondo, Ia nomboamo manjoo' na anu i hakop-Nyo; ka' Ia nombee'imo palasen-palasen hi mian.”

⁹Jadi, de otaloakon “Ia noliba'mo” alati'nyo Ia momonanyo nintau'mo tinoka i tampat anu talalo i aluknyo i dunia aiya.

¹⁰Ka' Ia anu ninintau'mo aijo', Ia-iamo aijo' na noliba' tinoka i tampat anu lebe matangkas molingkudui langit iwi-iwi', sahingga songko-songko na dunia ingisian-Nyomo.

¹¹Iamo na anu “mombee'i palasen-palasen hi mian”; sambagian i hangkat-Nyo tinimbali rasul, sangga'at tinimbali nabi; sangga'at mule' tinimbali pompolele Lele Ma'ima' aijo', ka' sangga'at mule' i hangkat-Nyo tinimbali to gulu-gulu' ka' pongatun jama'at.

¹²Aiya binau-Nyo da mian anu palesayamo hi Tumpu obee'i pangalati'an hondo-hondo da timbali mohongo-hongo apaa na nu pinokauhakon nu Tumpu ka' mombau posa'angu'an salaku butong i Kristus.

¹³Tiba jalan anu sumo aijo' kita iwi-iwi' mosa'angu'mo i kapalesaya'an anu pokakana ka' pangalati'an anu pokakana mongkona Anak nu Tumpu. Ka' kita timbalimo to mia-mian anu motu'amo na pikilan ka' kopipinnyo ko pintu-pintuangnyomo talakana' sumo i Kristus.

¹⁴Sahingga kita madi'mo po'ule' mingana-anak anu sumo nupuuhi nu mombun oboa mokiijo' mo'uuka mae nu ngangahan nu solok nu pangajalan lengkat hi to mia-mian anu pande na mongakali. Aha mompotimbali mian ponga' nu kapandean nu aha mongakali.

¹⁵Madi' sumo aijo'! Panyo ola ahi' kita tionyo momponyata' hahan anu totu'u nu kinyonyoa anu mongkalibosi hondo, sahingga i uno nu iwi-iwi' na han kita kopipinnyo timbalimo talakana' pokakana sumo i Kristus anu timbalimo kapalanto.

¹⁶ I uno nu kapalentahan-Nyo, iwi-iwi' na bagian nu butong aijo' matopos hondo na nongatun, ka' pinaha pogantum nu to losu-losuan toto sa'angu'. Ka' de toto sa'angu' na bagian aijo' bakalaja sumo anu sahondo-hondonyo, saba' songko-songko na butong aijo', tumuu' modensu' timbali motu'a ka' mahoson kalana kalibosan.

¹⁷Mokonyo aijo' tiba sanggo nu Tumpu, aiyamo na anu ka'oho' kutaloakon ka' kupokeman: bolimo daagi' tumuu' sumo to mia-mian anu madi' monsumbu' Tumpu, ka' mompopikilakon anu madi' mingkaliangan.

¹⁸Pikilan nu aha pinintungmo. Aha madi'mo monsumbu' kantumuu'an anu binee' nu Tumpu. Kalana aha madi' ko anu nu pisumbu-sumbu' nu aha mongkona Tumpu. Aha sumo aijo' kalana bangilan.

¹⁹Aha madi'mo daagi' ko kinyonyoa ma'ambang, sahingga iwi-iwi' na napisu nubau nu aha, ka' tumuu' mombau anu ma'idek yayamo pongka'oho' nu kinyonyoanyo.

²⁰Panyo i Kristus Yesus anu sinumbu'mo miu misa' sumo aitu!

²¹Komiu nohongomo mongkona Ia! Ka' salaku anu saja' mombatuki Ia, komiu pinogulu'mo singkona mongkona sipat-sipat nu Tumpu anu daagi' hi Ia!

²² Mokonyo aijo', ukatakonmo na mian anu nanau'mo tiba jalan pikilan nu kantumuu'an anu nanau'mo anu hau-haunyo ingide'anmo han anu oka'ima'i anu mompoponga'.

²³Tionyo ahi' kinyonyoa ka' pikilanum opotimbali bu'ou iwi-iwi'.

²⁴ Tionyo ahi' komiu tumuu' salaku mian bu'ou anu pinotimbalimo nombatuki jalan pikilan nu Tumpu; aijo'mo, tabiat anu totu'u, hodi' ka' susi'.

²⁵ Kalana aijo' to Utu-utus iwi-iwi' bolimo baleko'. Pombaumo gau' anu hodi' hi samian ka' hi samian, kalana kita iwi-iwi' bubuu'mo ninsoop bagian butong i Kristus.

²⁶ De komiu pusa, boli mompobee' pusaum aijo' monsaduakon komiu baladosa'. Boli sansinaamo na pusa,

²⁷da Ibilis madi' mohumpak kasampatan.

²⁸Mian anu biasa mombuling, bolimo daagi' ia mombuling. Sahanyo ia mokalaja keke-keke, da hasin nu kalajanyo ia mohumpak kaanon ka' timbali montulungi anu kakulangan.

²⁹De komiu basisik, boli montaeyakon potatae anu mahenyu. Anu otaeyakon potatae anu mompokopiani ka' anu montulungi mian sangga'at. Potatae sumo aijo' mompodaagi' ka'ima'an hi to mia-mian anu mohongo.

³⁰Boli momposusa' kinyonyoa nu Roh nu Tumpu. Komiu nohumpakmo tanda sap nu Roh da timbali anu nu Tumpu. Roh aijo' mule' salaku sa'angu' na tanda matantu saba' Sinaa Pompobebasan tokamo mae hi komiu.

³¹Alinakon na anu o'oa'i moko pasakit na kinyonyoa mongingu ka' pusa. Bolimo daagi' mahaloboo'an ka' solaa' monguduli. Bolimo daagi' ko kinyonyoa mongka'ideki kabai ko kinyonyoa sangga'at anu sumo aijo'.

³² Ola ahi' kinyonyoa na obau mano-manonong ka' mompahakali-kalibosi samian ka' samian, ka' mompaha ampu-ampuni pokakana sumo Tumpu singkona nongampunimo komiu hi Kristus.