Read Saluan FILIPI 1 Bible Online

FILIPI 1 - Saluan bible

FILIPI 1

¹ To Utu-utus mian anu palesayamo hi Tumpu iwi-iwi' anu jojoong i Filipi, ka' anu nosa'angu'mo tiba i Kristus Yesus. Tiba suele to Utu-utus polaya' ka' pabantun nu jama'at! Aku, i Paulus, tiba i Timotius to posa-posaihon i Kristus Yesus,

²mongamalakon hi Tumpu Tuumanto ka' Tumpunto i Yesus Kristus mombee'i balakat ka' ka'ima'an hi komiu.

³De aku tonginau'mo hi komiu, aku montalima kase hi Tumpu Allah.

⁴Ka' de aku mondo'akonmo komiu Utus iwi-iwi', sanang na kinyonyoangku balado'a.

⁵Aku montalima kase hi Tumpu kalana salatanmo pe'e i sinaa momonanyo sangkutnyo uuka aiya, komiu nontulungimo aku nombebakon Lele Ma'ima' lengkat mae hi Tumpu.

⁶Posi Tumpu na nontampu'uni kalaja anu ma'ima' aijo' hi belemiu, ka' kupalesaya totu-totu'u Ia na molausakon kalaja aijo' sahingga toka i Sinaanyo de i Kristus mompo'ule'mo toka.

⁷Memang nukonamo de aku ko kinyonyoa sumo aijo' hi komiu, kalana komiu Utus iwi-iwi' saja' i uno nu kinyonyoangku. Ka' mule' komiu singkona montalima hingga-hinggat ka' aku balakat anu binee'mo nu Tumpu hi belengku; mau uuka aiya aku hau-haunyo i uno nu talungku', mau pe'e aku i sambiha'nyomo mompototu'u ka' montinjohakon Lele Ma'ima' aijo'.

⁸Tumpu na monsumbu', saba' aku totu-totu'u molibos hondo hi komiu, kalana kalibosan anu tahahumo lengkat mae hi Kristus Yesus.

⁹Aiyamo na do'angku toka hi komiu: o'amalakon da komiu mompaka kalibosi Tumpu ka' sangko gampa, ka' ko pintu-pintuangnyo na monsumbu' anu totu'u ka' mimpikilan pande.

¹⁰Tiba jalan anu sumo aijo' komiu monsumbu'mo mompile'i apaa na anu talalo ma'ima', ka' kantumuu'an miu belesi'mo i kasala'an kabai maumo pa'apaa na posala' opokona hi komiu, i sinaanyo de i Kristus mompo'ule'mo toka.

¹¹Molabi-labije na gau' anu totu-totu'u ma'ima' i kantumuu'an miu, anu ola hi Yesus Kristus na timbali pohumpakan; sahingga Tumpu opopodaka' ka' saja' o puji'.

¹²Ku kahanda'i da komiu monsumbu', hahan anu tinimbalimo hi belengku panyo nonsaduakonmo lebe manjoo' na mian nohongo ka' pinalesayamo i Lele Ma'ima' aijo'.

¹³ Ahennyo iwi-iwi' na anu monjagai laigan nu Tomundo tiba to mia-mian sangga'at i kota aiya nonsumbu'mo taalu' aku tinalungku' kalana aku mompojalan apaa na koonyo i Kristus.

¹⁴Ka' aku tinalungku' nonsaduakonmo manjoo' na to mia-mian Kristen i kota aiya nompaka palesayamo mule' hi Tumpu, sahingga aha nompaka baanimo na mombebakon potuunon nu Tumpu, ka' madi'mo maha pabuhukan.

¹⁵Memang daagi' ko to pia-piangkuka anu kiijo' hi aha mompolele i Kristus kalana kinyonyoa madi' sanang hi sangalu ka' mongka'oho' painggaga, panyo sangga'at mompolele i Kristus kalana ko kahanda' anu sahondo-hondonyo.

¹⁶Mian haha aiya mompojalan aijo' kalana aha mongkalibosi Tumpu Allah tiba aku, kalana aha monsumbu', Tumpu nompalentahmo aku da mompotiju'akon saba' Lele Ma'ima' aijo' memang totu'u.

¹⁷Panyo mian sangga'at mompolele i Kristus ko kahanda' anu madi' ma'ima'; aha mompolele da bau kapalaluan nu posi butong. Gagalan nu aha da tiba jalan aijo' aha mompotimbali aku lebe susa' i uno nu talungku'.

¹⁸Panyo madi' mongkuka! Kalana mau mule' pa' mosiamo, pa' aijo' obau ko kahanda' anu ma'ima' kabai ko kahanda' anu sala', manau' i Kristus opolele ahi'; jadi aku sanang. Ka' aku tataap mongoa'i sumo aijo',

¹⁹kalana kusumbu' saba' do'a miu tiba mule' tulungan lengkat mae hi Roh i Yesus Kristus, aku opobebasje.

²⁰Anu talalo ku ka'ima'i ka' kugagan aijo'mo da boli hondo-hondo aku madi' mingkaliangan i uno nu kalajangku. Panyo ahi' kugagan da iwi-iwi' na tempo' lebe-lebe mule' uuka aiya, aku timbali baani sahingga i uno nu kantumuu'anku — pa' aku tumuu' kabai silaka — i Kristus na opopodaka'.

²¹Kalana hi belengku, kantumuu'anku olamo samata-mata hi Kristus! Ka' de silakamo alati'nyo ka'untunganku.

²²Panyo de tumuu' i dunia aiya, aku moko ala mombau kalaja anu lebe mingguna, saba' madi' kusumbu' iya na anu tionyo ku pile'i.

²³Ohua' na jalan na mohela' aku. Ku ka'ima'imo hondo na mompala'i dunia aiya da mamba jojoong tiba i Kristus, kalana aijo' na anu talalo ma'ima';

²⁴panyo, da bau kapentingan miu daagi' lebe ma'ima' de aku tataap jojoong i dunia aiya.

²⁵Ku palesaya hondo na han aijo'. Mokonyo aijo' kusumbu' aku tataap jojoong tiba to Utu-utus iwi-iwi', da timbali montulungi komiu da mompaka pahoson ka' mompaka sanang na palesaya hi Tumpu.

²⁶Mokonyo aijo', de aku minsusule'mo mae hi komiu, komiu anu nosa'angu'mo tiba i Kristus Yesus lebe manjoo' mule' na katalangan mombuulakon butongku.

²⁷Jadi, anu penting uuka aiya aijo'mo da komiu tumuu' pokakana tiba apaa na anu nukahanda'i nu Lele Ma'ima' mongkona i Kristus aijo'. Tiba jalan anu sumo aijo' pa' aku moko ala singkabot tiba komiu, kabai madi'mo, ku hongoje na kahosonan nu posa'angu'an miu ka' mogogia' hingga-hinggat i sa'angu' na kahanda' ka' sa'angu' na tanga'an; aijo'mo kapalesaya'an anu pokakana tiba Lele Ma'ima' anu lengkat mae hi Tumpu aijo'.

²⁸Tionyo ahi' komiu saja' baani; boli mabuhuk hi sampo bali' miu, tiba jalan anu sumo aijo' komiu momponyata'mo saba' aha tantu saidi' mae mahungku'mo, ka' komiu na saidi' mae untungmo, kalana posi Tumpu Allah na mombee'i ka'untungan hi komiu.

²⁹Kalana Tumpu nombee'imo balakat hi komiu, misa' ola da palesaya hi Kristus, panyo singkona da mongoa'i sansala kalana i Kristus.

³⁰ Uuka aiya komiu singkona hingga-hinggat tiba aku i uno nu usaha anu pokakana; aijo'mo anu toho'mo tinoa miu ingusahakonku u'utu mae, ka' anu daagi' saja' ku usahakon sampe tempo' uuka aiya, sumo anu uuka aiya i hongomo miu.