Read Saluan FILIPI 2 Bible Online

FILIPI 2 - Saluan bible

FILIPI 2

¹Komiu nahosonmo kalana komiu nosa'angu'mo tiba i Kristus. Ka' komiu sinanangmo kalana i Kristus nongkalibosimo komiu! Komiu pinotiju'mo nu Roh nu Tumpu, ka' komiu suele nompaha kali-kalibosimo, ka' nompaha ina-inau'mo kalibosan nu samian ka' samian.

²Jadi, soba da komiu totu-totu'u momposanang kinyonyoangku tiba jalan anu sumo aiya: Tumuu'mo mosa'angu' nu kalibosan anu pokakana tiba pikilan ka' tanga'an anu pokakana.

³Boli mombau apa-apaa ola kalana kapalaluan nu posi butong, kabai da bau pombuulakon butong. Ola ahi' tionyo komiu toto samian mati aluk na kinyonyoa, ka' monsangka mian sangga'at na lebe talakana' molingkudui butong miu.

⁴Opalahatikan na kapentingan nu mian sangga'at; boli ola kapentingan nu posi butong.

⁵Tionyo ahi' komiu mingkinyonyoa sumo i Yesus Kristus:

⁶Sabenannyo Ia pokakana tiba Tumpu, panyo Ia madi' ko kinyonyoa sabole-bole mompotoa sipat-Nyo susumo Tumpu na pagala nu toongi.

⁷Panyo ola ahi' ilapasakon-Nyomo iwi-iwi' aijo' lantas tinimbalimo pokakana sumo posaihon. Ia tinimbalimo sumo mian, ka' otoa tumuu' sumo mian.

⁸Ia nompati alukakonmo butong-Nyo, ka' tinumuu'mo nontuluti Tumpu sangkutnyo sinilaka — aijo'mo sinilaka sinalib.

⁹Mokonyo aijo' Tumpu nohangkatmo Ia mata-matangkas, ka' nombee'imo Ia kakuasa'an kuasa anu lebe daka' molingkudui kakuasa'an iwi-iwi' sangga'at.

¹⁰ Jadi bau pongadati i Yesus, iwi-iwi' na malaikat kiita' i suluga' ka' anu i dunia, tiba anu i aluk nu dunia, monsombahmo Ia.

¹¹Aha iwi-iwi' mongakuimo taalu' i Yesus Kristusmo na Tumpu; tiba jalan anu sumo aijo' Tumpu Tuumanto opopodaka'mo.

¹²Mokonyo aijo', to Utu-utus anu okanonongi, susumo komiu saja' montuluti aku tempo'nyo aku daagi' itina' hi komiu, saba' lebe-lebe mule' uuka aiya tempo'nyo to majo'onanmo, tionyo ahi' komiu tataap montuluti aku. Komiu pinosalamatmo nu Tumpu Allah, jadi saja' ahi' o usahakon da kabilahian miu mompaka pa'ima'. Obau na aijo' bau pongadati ka' tulu-tulutan hi Tumpu,

¹³kalana Tumpu na mokalaja i uno nu butong miu da mompotimbali komiu halala' ka' moko ala momposanang kinyonyoa nu Tumpu.

¹⁴Obau na iwi-iwi' aijo', ka' boli motusa' kabai painggaga.

¹⁵ Tiba jalan anu sumo aijo', komiu mompotoamo saba' komiu to ana-anak nu Tumpu anu madi' ko alunyo, anu tumuu' madi' baleko' ka' madi' geguan hi aha mian anu ma'idek ka' baladosa'. Ka' de komiu monsisikmo hi aha lele anu mombee'i kantumuu'an, tionyo ahi' komiu toka hi aha timbali sumo jingka anu jongkilaban monjingkai dunia. De komiu tumuu' sumo aijo', atina'je ka' aku mongoa'i sanang hi komiu de tempo'nyomo i Yesus Kristus mompo'ule'mo toka. Aijo' na bukuti'nyo saba' usahangku madi' pinalasuma ka' usahangku kino hasinnyomo.

¹⁷Ugaat aku saidi' mae opateimo ka' baso'ku timbalimo sumo kuluban anu obubusakon i bawo nu anu osombahkon komiu hi Tumpu Allah salaku sa'angu' na tanda saba' komiu pinalesayamo hi Ia. De memang aijo' tionyo sumo aijo', aku montalima kase i han aijo' ka' lame'mo hingga-hinggat tiba komiu.

¹⁸Sumo aitu mule' na komiu tionyo suele mongoa'i sanang ka' hingga-hinggat lame' tiba aku.

¹⁹Ku palesaya i Tumpu Yesus na nontulungi sahingga aku nalia' na nonsai i Timotius namba hi komiu, da aku sanang na mohongo lele mongkona komiu.

²⁰Ola sami-samiannyo i Timotius na mian anu pokakana na kinyonyoa tiba aku, ka' totu-totu'u mompopikilakon ka'ima'an miu.

²¹Anu iwi-iwi' sangga'at ola mongkalesang kapentingan nu posi butong nu aha, misa' kapentingan i Yesus Kristus.

²²Posi komiu nontoamo bukuti'nyo taalu' i Timotius ko gunanyo. Ia nokalajamo juku-jukut tiba aku mompolele Lele Ma'ima' lengkat mae hi Tumpu. Kami ohua' sumomo ahi' anak tiba tuuma.

²³Mokonyo aijo', malia-lia'je kusai na ia mamba hi komiu salatan kusumbu'mo mosia na palakalangku mingahen saidi' mae.

²⁴Ku palesaya saba' kalana pontulungi nu Tumpu, aku suele madi'mo daagi' pin na mamba molenga komiu.

²⁵Mongkona utusto i Epafroditus anu sinai miu mae da montulungi aku, ku oa'i palalu monsai ia da po'ule' minsusule' hi komiu. Ia nonsangaluimo aku i uno nu kalajangku ka' usahangku.

²⁶Ia molibos hondo hi komiu to Utu-utus iwi-iwi', ka' sinusa'mo na kinyonyoanyo kalana komiu nohongomo lele ia masakit.

²⁷Memang totu'u ia nasakit kiniboli' sinilakamo. Panyo Tumpu Allah nongkalibosimo ia; ka' misa' ola ia, panyo hi belengku suele da boli aku mompaka susa' mule'.

²⁸Mokonyo aijo' lebe daka' mule' na kahanda'ku monsai ia minsusule' hi komiu da komiu po'ule' lame' de komiu singkabotmo tiba ia, ka' kinyonyoangku suele madi'mo guaon.

²⁹Jadi, talimamo na ia nu kinyonyoa sanang sumo samian na utus anu sampo palesaya. O'angga'i na mian iwi-iwi' anu sumo ia.

³⁰Bau kapalaluan nu kalaja i Kristus, ia kiniboli' sinilakamo; ia nombatoniakonmo nyawanyo bakasmo da silaka asan montulungi aku salaku mowakini mae komiu.