Read Saluan KOLOSE 3 Bible Online

KOLOSE 3 - Saluan bible

KOLOSE 3

¹ Komiu po'ule'mo pinotumuu' hingga-hinggat tiba i Kristus. Mokonyo aijo' tionyo ahi' komiu bala usaha da mohumpak hahan anu i suluga', anu kiita' mae na i Kristus mompalentah hingga-hinggat tiba Tumpu.

²Oposa'angu' na pikilan miu i hahan anu i kiijo' boli i hahan anu i dunia aiya.

³Kalana komiu sinilakamo, ka' kantumuu'an miu madi'mo kantoan tiba i Kristus hi Tumpu.

⁴Jadi, pinolengkatan nu kantumuu'an miu anu totu-totu'u atina'mo hi Kristus, ka' de Ia po'ule'mo otoa, komiu suele tokamo mae hingga-hinggat tiba Ia ka' opopodaka'mo suele tiba Ia!

⁵Mokonyo aijo' bolimo monginde'i hahan anu nu kamilui nu dunia anu mompigalapi butong miu, sumo masala', hahan anu madi' pantas, napisu nu kinyonyoa, mongkamilui anu ma'idek, ka' mangaluk, (kalana mangaluk sumomo palesaya hi pilogot).

⁶Hahan anu sumo aijo' na monsaduakon tambuha' nu Tumpu kona hi to mia-mian anu madi' montuluti Ia.

⁷Naipuan mae komiu suele nombatukimo hahan anu o kamilui susumo aijo', tempo'nyo komiu kinuasannyomo.

⁸Panyo uuka aiya komiu tionyo ahi' mongalinmo hahan anu ma'idek anu daagi' itina' i butong miu: bolimo daagi' pusa, kabai moto idek, kabai kokinyonyoa mongka'ideki mian sangga'at. Boli hondo-hondo mosabat mae atina' i nganga' miu na potatae anu lewa' monguduli, kabai potatae anu mahumimi'.

⁹ Boli mompaha aka-akali samian ka' samian, kalana kantumuu'an anu nanau'mo tiba sipatnyo iwi-iwi' ilapasakonmo miu.

¹⁰ Komiu uuka aiya binee'anmo kantumuu'an anu bu'ou. Komiu mian anu binu'oumo anu hau-haunyo saja' opotimbali bu'ou nu anu Nompotimbali, aijo'mo Tumpu, montiho tuladan nu butongnyo. Kahanda'nyo aijo'mo da komiu monsumbu' Tumpu anu sahondo-hondonyo.

¹¹Salaku kasawe'annyo, aijo'mo iwi-iwi' na anu sangalasan hi mian Yahudi ka' misa' Yahudi, mian basunat ka' mian anu madi' basunat, pinokakanamo mian anu i salipu'an ka' mian anu madi' monsumbu' adat, posaihon ka' mian bebas, kalana iwi-iwi' kiijo'mo hi Kristus, ka' Ia nosa'angu'mo tiba aha iwi-iwi'.

¹² Kita Utus mian anu palesayamo hi Tumpu. Tumpu nongkalibosimo komiu ka' nompile'imo da timbali iamo samata-mata na tumpu-Nyo. Mokonyo aijo' komiu tionyo ahi' mompotoa kalibosan, komiu tionyo ahi' manonong, boli kobubuun, motatae madi' ko pesa-pesa, ka' sabaan na mongoa'i sansala.

¹³ Komiu tionyo ahi' mompaha saba-sabalakon samian ka' samian ka' mompaha ampu-ampuni de daagi' ko anu mongingu sangga'at. Sanang na kinyonyoa nu Tumpu mongampuni komiu, jadi komiu suele tionyo ahi' mongka'oho' mongampuni samian ka' samian.

¹⁴Ka' anu talalo hondo penting, aijo'mo: Komiu tionyo ahi' mompaha kali-kalibosi, kalana kalibosan aijo' na momposa'angu' to Utu-utus iwi-iwi' sahingga timbali mian anu sahondo-hondonyo.

¹⁵Anu oputusi miu, tionyo ahi' anu otantukan nu dame anu binee'mo i Kristus i uno nu kinyonyoa miu. Kalana Tumpu nolagamo komiu da timbali sa'angu' na butong, da komiu tumuu' i uno nu kadamean lengkat mae hi Kristus aijo'. Komiu tionyo ahi' montalima kase.

¹⁶ To panga-pangajalan i Kristus anu nobuke'mo nu balakat tionyo ahi' oposoop i uno nu kinyonyoa miu. Komiu sabole-bole ahi' mompaha pogu-pogulu' ka' mompaha bebee'i pokinde' da pande. O nyanyi na mazmur ka' anu bau pompuji-puji' tiba to elo-elok nu rohani; o nyanyiakon hi Tumpu bau pontalima kase i uno nu kinyonyoa miu.

¹⁷Apaa na anu obau miu iwi-iwi' kabai otaloakon, aijo' obau ka' otaloakon, samata-mata kalana sanggo nu Tumpu Yesus. Montalima kase ahi' hi Tumpu Tuumanto, kalana apaa na anu binaumo i Yesus hi komiu.

¹⁸ To Utu-utus anu tinimbalimo bengkele' nu mian! O tuluti na langkai' miu kalana sumo aijo' sabenanyo na kalakuan miu mian Kristen.

¹⁹ To Utu-utus anu tinimbalimo langkai' nu mian! Kalibosi na bengkele' miu. Boli olaloasai na aha.

²⁰ To ana-anak! Anu halus obau miu salaku mian Kristen, saja' montuluti tuuma ka' tina, kalana atina' na momposanang kinyonyoa nu Tumpu.

²¹ To Utu-utus anu tinimbalimo tuuma! Boli monsakiti kinyonyoa nu to ana-anak miu, sahingga aha maha polibosanmo.

²² To Utu-utus anu tinimbalimo posaihon. I uno nu han iwi-iwi', tionyo ahi' tulu-tulutan hi tuan miu anu i dunia aiya. Boli tulu-tulutan hi aha ola de aha hau-haunyo monjagai komiu, kalana komiu mongka'oho' da o puji'. Otuluti na aha nu kinyonyoa anu halala', kalana komiu mongadati Tumpu.

²³Maumo pa' apaa na kalaja anu obee' hi komiu, tionyo ahi' okalaja miu nu kinyonyoa totu-totu'u, susumo au'aitu Tumpu na tinulutan, ka' misa' ola mian.

²⁴Soba tutugi kalana komiu montalimaje tambonyo lengkat mae hi Tumpu. Apaa na anu pinotoukamo nu Tumpu bau bagi nu mian anu palesaya hi Ia, aijo'mo na anu obee' hi komiu. Kalana tuan anu sahondo-hondonyo hau-haunyo otuluti miu, aijo'mo i Kristus.

²⁵ Ka' mau mule' ihe na anu mombau kasala'an, tionyo ahi' monsimbu iwi-iwi' na kasala'annyo aijo'; kalana Tumpu madi' mompile'i ohup nu mian.