Read Saluan KOLOSE 4 Bible Online

KOLOSE 4 - Saluan bible

KOLOSE 4

¹ To Utu-utus anu tinimbali tuan! O palentah ahi' adi-adin ka' obau hodi-hodi' na kinyonyoa hi to posa-posaihon miu. Soba tutugi kalana komiu suele daagi' ko samian na tuan i suluga'.

²Tionyo ahi' komiu saja' tapakun na balado'a ka' saja' sadia ka' montalima kase hi Tumpu.

³Odo'akon suele na kami, da Tumpu mombee'i mae kami kasampatan anu ma'ima' na mombebakon lele mongkona lahasia i Kristus. Kalana han aijo', sahingga aku uuka aiya pinosoopmo i uno nu talungku'.

⁴Balado'a da aku moko ala montalangkan lahasia aijo' sahingga manasa hondo susumo anu memang sahondo-hondonyo.

⁵ I uno nu poboboan miu tiba to mia-mian anu madi' palesaya pande-pande ahi' na komiu tumuu', ka' opake iwi-iwi' na kasampatan ma'i-ma'ima'.

⁶Hahan anu otaloakon miu aijo' tionyo ahi' saja' momposanang kinyonyoa ka' nu ka'ima'i nu mian. Tionyo ahi' osumbu' miu mosia na sabenannyo komiu montaami hahan anu nu pokilawa nu mian.

⁷ I Tikhikus, Utusto anu oka-okalibosi momposumbu'je hi komiu iwi-iwi na apaa anu tinimbalimo hi belengku. Ia tulu-tulutan na nokalajamo, nosangalu tiba kami nombau kapentingan nu Tumpu.

⁸Aku nonsaimo ia namba hi komiu, da komiu monsumbu' han mami, sahingga komiu madi'mo molibos.

⁹ I Onesimus mambaje hingga-hinggat tiba i Tikhikus; ia samian anu nolengkat mae atina' i gampa miu. Ia mian anu tulu-tulutan, sahingga kami mongkalibosi ia. Ia ka' i Tikhikus mompoto'ije hi komiu iwi-iwi na anu tinimbalimo i tampatku aiya.

¹⁰ I Aritarkhus, anu i uno nu talungku' hingga-hinggat tiba aku, nompakatu salan do'a hi komiu. Sumo aitu mule' na i Markus mototominsan ka' i Barnabas. (Pinotuunmo na kaleba hi komiu da o labot na ia, de ia tokamo itina' hi komiu.)

¹¹Salan do'a suele lengkat mae hi Yesus anu osa-osanggohi Yustus. Lengkat mae hi to mia-mian nu Yahudi anu pinalesayamo hi Tumpu Yesus, ola aha totolu' na anu uuka aiya mokalaja tiba aku mompojalan kalaja anu lengkat mae hi Tumpu. Aha nontulungimo mae aku totu-totu'u.

¹² Salan do'a lengkat mae hi Epafras. Ia suele lengkat mae atina' i gampa miu. Ia posaihon i Kristus Yesus anu saja' tapakun mondo'akon komiu. Ia nompoitamo hi Tumpu sabole-bole da kapalesaya'an miu timbali mahoson ka' komiu totu-totu'u timbalimo otaha'imani, da sahondo-hondonyo na kinyonyoa miu tulu-tulutan i pongka'oho' nu Tumpu.

¹³Pinosi toangkumo memang na ia nokalajamo totu-totu'u kalana kapentingan miu, ka' bau kapentingan nu to mia-mian i Laodikia ka' i Hierapolis.

¹⁴ I Dokoten Lukas, anu oka-okalibosinto, ka' i Demas nompakatu salan do'a hi belemiu.

¹⁵Potokakon na salan do'a mami hi to Utu-utus Kristen i Laodikia; ka' hi Nimfa, ka' hi jama'at anu mogreja i laigannyo.

¹⁶Opoko basa' na sulat aiya hi komiu o usahakon da suele aijo' obasa'akon hi jama'at Laodikia. Sumo aitu mule' komiu tionyo ahi' mombasa' sulat aiya anu opakatuje mae lengkat i Laodikia toka hi komiu.

¹⁷ Ka' poto'i hi Arkhipus, “Sabole-bole obau na kalaja anu binee'mo hi komiu salaku bau pontuluti palentah nu Tumpu.”

¹⁸Salan do'a lengkat hi belengku, i Paulus. Posi aku na nontulis bagian aiya. Boli okolilimi mae na aku, daagi' i uno nu talungku'! O'amalakon da Tumpu mombalakati komiu. Tabea' mami, I Paulus 12