Read Saluan 1 TESALONIKA 2 Bible Online

1 TESALONIKA 2 - Saluan bible

1 TESALONIKA 2

¹To utu-utus! Posi komiu monsumbu'mo saba' kami toka hi komiu madi' palasuma.

² Komiu monsumbu' saba' ma'isa pe'e kami tinoka hi komiu i Tesalonika, kami po'ule'mo kinabisa'an ka' pinopo'ambang kiijo' mae i Filipi. Panyo mau mule' manjoo' na mian mombahakon kami, Tumpunto nombee'imo kami kabaanian da mompolele hi komiu Lele Ma'ima' anu lengkat mae hi Ia.

³Kami monsale'i komiu misa' pa' sinangkalinga; ka' misa' mule' ko kahanda' anu madi' ma'ima' kabai ola mongakali.

⁴Madi'! Kami madi' motatae da momposanang kinyonyoa nu mian, panyo momposanang kinyonyoa nu Tumpu, anu monguji' kinyonyoa mami. Kalana kami nutaha'imani nu Tumpu timbali mompolele Lele Ma'ima' aijo'.

⁵Posi komiumo na monsumbu' saba' madi' kami motatae anu to tami-tami', kabai mongakali ko kahanda' da momposuluk to nia-niat mangoa. Tumpu na sakisi!

⁶Kami madi' mule' mompagala da mohumpak pompuji' lengkat hi mian — kabai hi komiu kabai hi mian sangga'at. Anu sahondo-hondonyo salaku rasul i Kristus, kami timbali ahi' montuntut apa-apaa lengkat hi komiu.

⁷Panyo sipat mami manonong de kami itina' hi komiu, sumo samian na tina mongkalesang to ana-anaknyo.

⁸Kalana pongkalibosi mami, kami sanang na mombee' hi komiu misa' ola Lele Ma'ima' anu lengkat mae hi Tumpu aijo', panyo mule' kantumuu'an mami. Kalana mami talalo hondo mongkalibosi komiu.

⁹Tantu komiu daagi' tonginau' mosia na kosigonyo na kami bala usaha ka' bakalaja. Sinaa ka' pihi kami mokalaja da kami madi' monsusa'i mau ola samian anu itina' hi komiu, tempo'nyo kami nompolele Lele Ma'ima' anu lengkat mae hi Tumpu aijo' toka hi komiu.

¹⁰Kami tumuu' susi', totu'u ka' madi' ko kasala'an hi komiu anu pinalesayamo hi Kristus. Komiumo na to saki-sakisi mami, ka' suele mule' Tumpu.

¹¹Komiu monsumbu' saba' kami mombau apa-apaa hi komiu sumomo samian na tuuma kona hi to ana-anaknyo.

¹²Kami mompokinde'i komiu, ka' kami mongkakeha'i komiu, ka' kami mompakisa da komiu tumuu' sumo aijo' sahingga momposanang kinyonyoa nu Tumpu. Kalana Tumpu nolagamo komiu da timbali mian i Dunia Bu'ou nu Tumpu ka' mongoa'i Kasanangan-Nyo.

¹³Daagi' mule' ko sa'angu' na han anu sangga'at, anu mombau kami saja' montalima kase hi Tumpu. Han aijo' aitumo, saaba' tempo'nyo kami nompotokakon lele lengkat mae hi Tumpu Allah toka hi komiu, komiu nohongomo ka' montalimamo lele aijo' misa' sumo lele lengkat hi mian, panyo sumo lele anu totu-totu'u lengkat mae hi Tumpu. Iamo na anu mokalaja i uno nu butong miu anu pinalesayamo hi Kristus.

¹⁴ To utu-utus, han anu ingoa'anmo miu ingoa'anmo suele nu jama'at nu Tumpu i Yudea anu tinimbalimo i Kristus Yesus na tumpu-Nyo. Komiu nongoa'i kasansala'an lengkat i posi bansa miu, sumomo anu ingoa'an nu to jama-jama'at nu Tumpu i Yudea, aijo' lengkat mae hi to mia-mian nu Yahudi.

¹⁵ To mia-mian haha aijo'mo na anu nompateimo i Tumpu Yesus, ka' to nabi-nabi, ka' nongkabisa'imo kami. Aha nompo'uwaliakonmo iwi-iwi' na mian, ka' Tumpu madi'mo hondo sinanang hi aha.

¹⁶Ka' aha nontewa'mo kami mompolele hi aha to bansa-bansa anu misa' Yahudi, lele anu timbali momposalamat bansa haha aijo'. Tiba jalan anu sumo aijo' komiu mian nu Yahudi aijo' saja'mo montuangi to dosa-dosa' nu aha sampe konjoo'nyo sampa'mo. Ahennyo uuka aiya aha nu konaimo nu tambuha' nu Tumpu.

¹⁷Panyo to utu-utus, tempo'nyo pe'e kami noga'a-ga'atmo madi' talalo pinin komiu — noga'at i mata, panyo misa' i kinyonyoa — kami saja'mo hondo nolibos hi komiu ka' nongusahakonmo totu-totu'u da mompahakabot mule' tiba komiu.

¹⁸Kami ko tanga'an mamba molenga komiu; ka' aku nonsobamo ninsan ka' pininduanmo, panyo kami nugologo'i nu Ibilis.

¹⁹Komiumo na anu otaha'imani mami ka' okalame'akon mami. Kalana de Tumpu Yesus tokamo, ka' kita mangadapmo hi Ia, saba' komiumo na anu timbali obuulakon mami!

²⁰Totu-totu'u komiumo na anu timbali obuulakon mami ka' kalame'an mami!