Read Saluan 1 TESALONIKA 3 Bible Online

1 TESALONIKA 3 - Saluan bible

1 TESALONIKA 3

¹ Ahennyo kalibosan mami madi'mo pinoko tahan. Kalana aijo' kami binapikinmo lebe ma'ima', pinala'ianmo maumo me kami i Atena,

²hau-haunyo aijo' kami nonsaimo utusto i Timotius. Ia samian na posaihon nu Tumpu anu bakalaja tiba kami, da mompolele Lele Ma'ima' mongkona i Kristus. Kami nonsai i Timotius hi komiu, da ia mompohosonakon komiu ka' mongkakeha' komiu da lebe palesaya mule' hi Kristus.

³Tiba jalan anu sumo aijo' madi' ko samian pe'e itina' hi komiu na anu tolo sule' kalana saja' mongoa'i kasansala'an-kasansala'anto anu sumo aiya. Posi komiu monsumbu'mo saba' kasansala'an-kasansala'an anu sumo, aijo' ninsoopmo i uno nu tanga'an nu Tumpu kona hi kita.

⁴Tempo'nyo kami daagi' hingga-hinggat tiba komiu, kami nompoto'imo hi komiu momonanyo, saba' kita tionyo mongoa'i sansala. Ka' aijo' totu-totu'u tinimbalimo; posi komiu nonsumbu'mo.

⁵Mokonyo aijo' aku nonsaimo i Timotius, kalana aku mongka'oho' hondo monsumbu' mosia na kamajuan miu i uno nu han palesaya hi Kristus. Aku bata-bata dumo Ibilis lako' monggoda komiu, sahingga iwi-iwi' na lawe mami ola palasuma.

⁶ Uuka i Timotius ninsusule'mo mae ka' nompotokamo hi kami lele anu moko lame' mongkona mosia na komiu palesaya hi Kristus, ka' mompaha kali-kalibosi. Ia nompoto'imo hi kami tukoonyo komiu saja' montutugi hahan anu ma'ima' mongkona kami i kinyonyoa miu. Ka' komiu ko kahanda' mompahakabot tiba kami, pokakanamo sumo kami mule' ko kahanda' mompahakabot tiba komiu.

⁷Aijo' na sababnyo to utu-utus i uno nu kasusa'an iwi-iwi' ka' kasansala'an mami, kami ingindeeke'mo nu lele anu lengkat mae hi komiu. Palesaya miu hi Kristus nomposanangmo kinyonyoa mami,

⁸sahingga uuka kami nongoa'imo totu-totu'u daagi' tutuu', asan komiu tataap tuminjo mahoson mosa'angu' tiba Tumpu.

⁹Palias na kodaka'nyo na kami montalima kase hi Tumpu, kalana iwi-iwi' na kalame'an anu ingoa'anmo mami i ahop-Nyo kalana komiu.

¹⁰Sinaa ka' pihi okakase mami hi Ia nu kinyonyoa anu totu-totu'u da posi kami na singkabot tiba komiu da mompahaposampa' apaa na anu okahanda'i miu da palesayamo hi Kristus susumo anu sahondo-hondonyo.

¹¹O amalakon hi Tumpu Tuumanto ka' Tumpunto, i Yesus mombee'i kasampatan hi kami da singkabot tiba komiu!

¹²O amalakon hi Tumpu da mompotimbali komiu lebe saja' mongkalibosi samian ka' samian, sahingga kalibosanum ko pintu-pintuangnyo, pokakana sumo kalibosan mami hi komiu.

¹³Tiba jalan anu sumo aijo' Tumpu mompohosonje kinyonyoa miu, sahingga komiu susi'mo ka' madi' ko alunyo i ahop nu Tumpu Tuumanto, de Tumpunto i Yesus tokamo hingga-hinggat tiba iwi-iwi' na mian anu Iamo na tumpu-Nyo.