Read Saluan 1 TESALONIKA 4 Bible Online

1 TESALONIKA 4 - Saluan bible

1 TESALONIKA 4

¹Ahennyo to Utu-utus kami nombee'imo sonto' hi komiu, mosia na komiu tionyo tumuu' da momposanang kinyonyoa nu Tumpu. Memang komiu tinumuu'mo sumo aijo'. Panyo uuka aiya kalana kuasa nu Tumpu Yesus opoita mami totu-totu'u hi komiu da mompaka bala usaha mule' i han anu sumo aijo'!

²Kalana komiu nonsumbu'mo pompotiju' anu binee'mo mami hi komiu kalana kuasa nu Tumpu Yesus.

³Aiyamo na kahanda' nu Tumpu: Da komiu tumuu' samata-mata hi Ia, susi' mati kojo'on hi iwi-iwi' palabuatan masala'.

⁴Toto samian na mo'ane itina' hi komiu tionyo monsumbu' mosia na tumuu' tiba bengkele'nyo i han anu momposanang kinyonyoa nu Tumpu ka' mule' mian.

⁵Boli tumuu' mombatuki kahanda' nu napisu hi bengkele'um, sumo anu nu bau nu to mia-mian anu madi' monsumbu' Tumpu.

⁶I uno nu han anu sumo aijo' boli ko samian na mombau kasala'an hi utusnyo kabai mongakali ia. U'utu mae kami nompo'ingatmo totu-totu'u hi komiu, kalana Tumpu mohukumo to mia-mian anu mombau kasala'an-kasala'an anu sumo aijo'.

⁷Tumpu nolagamo kita misa' da kita tumuu' masala', panyo da kita tumuu' ihan momposanang kinyonyoa-Nyo.

⁸Mian anu madi' montalima pangajalan aiya misa' madi' montalima mian, panyo madi' montalima Tumpu anu nombee'imo Roh-Nyo anu susi' hi komiu.

⁹Madi'mo daagi' palalu na kami montulis sulat toka hi komiu mosia na komiu tionyo mongkalibosi to Utu-utus anu sa'a-sa'angu' na kapalesaya'an. Komiu suele ingajanmo nu Tumpu da mompaha kali-kalibosi.

¹⁰Ka' han aiya pinotoamo miu hi aha iwi-iwi' na to utu-utus anu sa'a-sa'angu' na kapalesaya'an i songko-songko na Makedonia. Panyo, to Utu-utus, opoita mami totu-totu'u da kantumuu'an miu timbali lebe ma'ima' mule'.

¹¹Bala usaha da tumuu' sabaan, ka' boli monggalo'i ulusan nu mian sangga'at. Tionyo ahi' komiu mokalaja mosi lio anu okaan, susumo anu pinalentahkonmo mami u'utu mae.

¹²De komiu tumuu' sumo aijo', komiu madi' ola taha'iman maumo pa'hihe, ka' to mia-mian anu madi' palesaya hi Kristus, mongadatimo komiu.

¹³To Utu-utus, okahanda'i mami na komiu da monsumbu' anu sahondo-hondonyo kona hi aha to mia-mian anu sinilakamo; da komiu boli susa' na kinyonyoa sumo to mia-mian sangga'at anu madi' ko anu otaha'imani.

¹⁴Kita palesaya i Yesus sinilakamo ka' nompo'ule'mo tinumuu'. Aijo' na sababnyo kita palesaya suele, saba' Tumpu mompo'ule'je mompotumuu' iwi-iwi' na mian anu pinalesayamo hi Yesus ka' anu sinilakamo, da aha tumuu'mo tiba Ia.

¹⁵ Mongkona han aijo', aiyamo na ajalan nu Tumpu anu kahanda' opotokakon mami hi komiu: Salatan i Tumpu Yesus tokamo, misa' kita anu daagi' tumuu' na opopohimonakon lantas to mia-mian anu sinilakamo na imihije.

¹⁶Malaikatje anu talasanggo hondo atina'je na motatae daka-daka', ka' tolompet nu Tumpu opo onyi'mo salaku bau sa'angu' na tanda. Lantas i Tumpu Yesus mintatau'mo lengkat mae i suluga', ka' to mia-mian Kristen anu sinilakamo na po'ule' opotumuu' momona.

¹⁷Lapas aijo' kita anu daagi' tumuu' tempo'nyo aitu, hingga-hinggat o hangkat tiba aha i uno nu kundom da mompahakabot tiba Tumpu i langa. Lantas kita jojoongmo hingga-hinggat tiba Tumpu sampe toka sidu-sidutu'.

¹⁸Kalana aijo' tionyo ahi' komiu mompaha poho-pohoson kinyonyoa ka' mompake potatae haha aijo' sumo uuka.