Read Saluan YOSUA 10 Bible Online

YOSUA 10 - Saluan bible

YOSUA 10

¹I Adoni-Zedek, tomundo nu Yerusalem, nohongomo lele i Yosua nompatundu'mo ka' nongideimo kota Ai, ka' nompateimo tomundo'nyo susumo anu binaunyomo i Yerikho tiba tomundo'nyo. Ia nohongo suele aha mian nu Gibeon nombaumo palajanjian da mobela'mo tiba aha mian nu Israel ka' jinojoongmo hi aha.

²Mian anu jojoong i Yerusalem nabuhukmo hondo, kalana Gibeon sa'angu' na kota anu daka'; kodaka'nyo pokakanamo susumo kota-kota anu ko tomundo'nyo ka' lebe daka' molingkudui Ai. To mia-miannyo mule' manjoo na suludadunyo anu pande na mahampate.

³Kalana aijo' i Adoni Zedek nonsaimo mian mamba hi Tomundo Hoham anu kiijo' i Hebron, Tomundo Piream anu ikiijo' i Yarmut, Tomundo Yafia anu kiijo' i Lakhis, ka' i Tomundo Debir anu kiijo' i Eglon, nomboa potunon sumo uuka,

⁴“Mamba mae montulungi aku montumbuhimo Gibeon, kalana aha to mia-miannyo nombaumo palajanjian da mobela'mo tiba i Yosua ka' aha mian nu Israel.”

⁵Sahingga aha olima' na tomundo nu Amori aijo', aijo'mo tomundo nu Yerusalem, Hebron, Yarmut, Lakhis ka' Eglon nosa'angu'mo lantas iwi-iwi' na suludadu nu aha nontikumo ka' nontumbuhimo Gibeon.

⁶Aha mian nu Gibeon nompolelemo lele aiya hi Yosua kiijo' i kemah nu aha i Gilgal, “Boli opojohok nu belento na kami ola sausa' Tuumangku! Lia-lia' toka mae montulungi kami, kalana suludadu lengkat mae hi tomundo nu aha Amori iwi-iwi' i da'erah anu i bungkutnyo nosa'angu'mo mongewa kami!”

⁷Lantas i Yosua ka' suludadunyo iwi-iwi' tiba gombuan nu suludadunyo anu pande mahampate, nambamo lengkat mae i Gilgal da mambamo mahampate.

⁸Tumpu notataemo hi Yosua, “Boli mabuhuk hi aha. Ka'untungan mahampate Ku bee'mo hi belemiu, kalana aijo' samian pe'e na aha madi' moko ala totahan mongewa belemiu.”

⁹Sinampahu na i Yosua tiba gombuan nu suludadunyo lengkat mae i Gilgal nokiijo' i Gibeon lantas nontumbuhimo aha mian nu Amori pinotolokengkeng nu aha.

¹⁰Pinotimbalimo nu Tumpu na aha mian nu Amori madi' noko ala gawe salatan nontoamo suludadu nu Israel. Manjoo' na aha mian nu Amori pinatean kiijo' i Gibeon, ka' anu daagi' tutuu' i loloi'mo nokaiyong i tengke nu bungkutnyo nu Bet-Heron kojo'onnyo tinoka-toka i Azeka ka' Makeda i sasu selatan.

¹¹Tempo'nyo aha mian nu Amori nokaiyongmo i tengke nu bungkutnyo aijo' kalana nopalaimo da boli nukabot nu aha suludadu nu Israel, Tumpu nontudunakonmo mae ujan eis anu toto daka-daka' lengkat mae i langit nongkona aha tutuus jalan kojo'onnyo tinoka-toka i Azeka. Anu sinilaka kinona nu ujan eis aijo' lebe manjoo' molingkudui anu pinatean nu aha mian nu Israel.

¹²I sinaa aijo' salatan Tumpu nombee'imo ka'untungan nahampate hi aha mian nu Israel nongewa aha mian nu Amori, i Yosua notataemo hi Tumpu. Ka' i ahop nu aha mian nu Israel, i Yosua notataemo, “O batu nu sinaa! Sainjoongmo aita' i buan nu Gibeon. Ka' beleyum bituon! Bolimo molalin mompala'i Bangka'nyo nu Ayalon.”

¹³ Sahingga batu nu sinaa madi'mo nodensu' ka' bitu'on madi'mo nolalin sampe aha mian nu Israel lapasmo na nompatundu' sampobali'nyo iwi-iwi'. Anu jinadimo aiya tinulis i Kitab Yasir. Sinansinaa hondo-hondo na batu nu sinaa madi' nodensu' itotonga' nu Langit ka' pinin hondo nakakinsapje.

¹⁴Madi' toho' jinadi' ka' mule' madi'mo daagi' jadi na sinaa susumo aijo', aijo'mo Tumpu nombatukimo pongka'oho' nu manusia. Tumpu nahampatemo nonsangalui Israel.

¹⁵Noko pahampate aijo' i Yosua hingga-hinggat tiba suludadunyo ninsusule'mo i kemah nu aha kiijo' mae i Gilgal.

¹⁶Panyo aha olima' na tomundo nu aha Amori aijo' noko ala nopalai ka' natisuluk i sa'angu' na liang nu batu kiijo' i Makeda.

¹⁷Tinoa nu mian na aha, ka' sinisikmo nu aha na tampat pinatisulukan nu aha hi Yosua.

¹⁸“Lingginakon mokiijo' na batu anu toto daka-baka' i sabatan nu liang aijo', ka' pojoong na anu monjagai ikiijo',” na koonyo i Yosua,

¹⁹“Panyo belemiu boli ola toka ikiijo'. Sabole-bole ololoi' ka' otumbuhi lengkat mae i hiku; boli opobee' na aha minsoop i kota-kota nu aha! Tumpu Allah nu belemiu nombee'mo ka'untungan mahampate hi belemiu mompatundu' aha.”

²⁰I Yosua ka' aha mian nu Israel nompateimo aha mian nu Amori haha aijo', panyo aha daagi' ahi' ko anu nopalai i kota nu aha natisuluk sahingga madi' pinatean.

²¹Lapas aijo' iwi-iwi' na suludadu i Yosua ninsusule'mo ma'i-ma'ima' hi Yosua i kemah nu aha i Makeda. Madi'mo ko samian anu i lipu' aijo' baani' montaloakon pa' mosia na mongewa aha mian nu Israel.

²²Lapas aijo' i Yosua notataemo, “Uuka aiya bukaimo na sabatan nu liang aijo' ka' boa mae na tomundo anu aha olima' itina'.”

²³Liang aijo' binukaanmo, lantas to tomu-tomundo nu Yerusalem, Hebron, Yarmut, Laghis ka' Eglon sinabatakonmo mae,

²⁴ka' binoamo hi Yosua. Lantas i lagamo i Yosua iwi-iwi' na aha mian nu Israel da sihuk, lapas aijo' nompalentahkonmo da iwi-iwi' na kapala nu suludadu anu namba nahampate tiba ia toka mae mompahampeja'akon gogohong nu tomundo haha aijo'.

²⁵Lapas aijo' i Yosua notataemo hi to kapa-kapala nu suludadunyo, “Boli bata-bata ka' boli mabuhuk. Tionyo ahi' belemiu palesaya totu-totu'u ka' baani' kalana sumo aiya na Tumpu mombau sampobali' miu iwi-iwi'.”

²⁶Lantas pinateanmo i Yosua na tomundo haha aijo' ka' nompokalayo'mo aha i olima' na kau' anu pinotinjo. Bangke' nu aha pinobakasmo ikiijo' sampe mamalom.

²⁷Salatan batu nu sinaa nakakinsapmo, pinalentahmo i Yosua da bangke' haha aijo' otau'akonmo, lantas otuamo i liang anu uuka mae pinatisulukan nu tomundo haha aijo'. Lapas mae batu anu toto daka-daka' haha aijo' opaha tuamo i sabatan nu liang aijo'. Sampe tempo' uuka aiya batu haha aijo' daagi' ikiijo'.

²⁸Sinaa aijo' i Yosua nontumbuhimo Makeda, ka' nompatundu'mo kota aijo' tiba tomundo'nyo. Iwi-iwi' na anu jojoong i kota aijo' pinateannyomo; mau pe'e ola samian madi' pinotumuu'. Pinombau i Yosua tomundo nu Makeda sumomo ia nombau tomundo nu Yerikho.

²⁹Lapas aijo' i Yosua tiba suludadunyo nambamo lau-laus lengkat mae i Makeda, namba i Libna ka' nontumbuhimo Libna.

³⁰Tumpu suele nombee'imo ka'untungan nahampate hi aha mian nu Israel nongewa kota aijo' tiba tomundo'nyo. Mau mule' ola samian madi' pinotumuu'; iwi-iwi' na mian i kota aijo' pinatean. Binau i Yosua na tomundo nu kota aijo' sumo ia nombau tomundo nu Yerikho.

³¹Lapas aijo' i Yosua ka' suludadunyo nambamo lengkat mae i Libna nokiijo'mo i Lakhis. Aha nontikumo kota aijo' ka' nontumbuhimo.

³²Tumpu nombee'imo ka'untungan nahampate hi aha mian nu Israel nohungku'imo Lakhis tempo'nyo nahampate i sinaa ko ohua'nyo. Apaa na anu binaumo nu aha i Libna, suele binaumo nu aha kiijo' i Lakhis; mau pe'e ola samian madi' daagi' ko anu pinotumuu', iwi-iwi' pinateanmo.

³³I Horam, tomundo nu Gezer tinokamo mae nontulungi Lakhis, panyo pinatundu'mo i Yosua na ia tiba suludadunyo; mau pe' ola samian madi'mo daagi' ko anu pinotumuu' iwi-iwi' pinateanmo.

³⁴Lapas mule' i Yosua tiba suludadunyo lengkat mae i Lakhis nambamo i Eglon lantas nontikumo ka' nontumbuhimo kota aijo'.

³⁵I sinaa aijo' mule' aha nompatundu'mo Eglon ka' nompateimo miannyo iwi-iwi' anu ikiijo' susumo pinombau nu aha Lakhis.

³⁶Lengkat mae kiijo' i Eglon i Yosua ka' suludadunyo nindakomo i bungkutnyo ka' nambamo i kota Hebron lantas nontumbuhimo,

³⁷ka' nompatundu'mo kota aijo'. Tomundo'nyo ka' batu-batu mian i kota aijo' ka' i kota-kota sangga'at anu mompaha ohani kiijo' iwi-iwi' pinateanmo. Ingidean i Yosua iwi-iwi' na kota aijo' susumo pinombaunyomo kota Eglon. Mau pe'e ola samian anu ikiijo' madi'mo daagi' ko anu pinotumuu'.

³⁸Lapas aijo' i Yosua ka' suludadunyo ninsusule'mo ka' nontumbuhimo Debir.

³⁹Kota aijo' tiba tomundo'nyo tiba iwi-iwi' na kota sangga'at anu mompaha ohani ikiijo' pinatundu'mo i Yosua. Iwi-iwi' na mian anu ikiijo' pinateanmo. I Yosua nombau Debir ka' tomundo'nyo sumomo ia nombau Hebron tiba Libna ka' tomundo'nyo.

⁴⁰Songko-songko na lipu' haha aijo' pinatundu'mo i Yosua. Ia nompatundu'mo tomundo haha aijo' anu i da'erah nu bungkutnyo, i tengkenyo nu bungkutnyo haha aijo' i sasu kabete'an, i tengke nu bungkutnyo haha aijo' sasu kinsoban ka' songko-songko na padang sasu selatan. Mau pe'e ola samian madi'mo daagi' ko anu pinotumuu'; iwi-iwi' pinateanmo. Aijo' binau susumo anu pinalentahkonmo nu Tumpu, Tumpu Allah nu aha Israel.

⁴¹I Yosua nohungku'imo da'erah haha aijo' lengkat mae i Kades-Banea sasu selatan toka-toka i Gaza koko da'erah sonibi nu ambai tibamo da'erah Gosyen songko-songko toka-toka i Gibeon sasu utara.

⁴²Ola minsan na nahampate, i Yosua nohungku'imo tomundo haha aijo' iwi-iwi' ka' nompatundu'mo da'erah iwi-iwi' anu nu kuasai nu aha, kalana Tumpu, Tumpu Allah nu Israel nahampatemo nonsangalui Israel.

⁴³Lapas aijo', i Yosua ninsusule'mo tiba suludadunyo nambamo i kemah nu aha kiijo' mae i Gilgal.