Read Saluan YOSUA 15 Bible Online

YOSUA 15 - Saluan bible

YOSUA 15

¹To utu-utus tulunan nu bansa Yehuda nohumpak pombahagian tano, lantas potempasannyo sumo uuka: Sasu selatan, da'erah aijo' toka-toka i puusnyo hondo nu selatan da'erah padang bolaa Zin motempas tiba Edom.

²Lengkat pe'e mae i puusnyo nu selatan i Ambai Mate,

³lau-laus sasu selatan motulu sohipi' nu bungkutnyo i Akrabim toka-toka i Zin. Ka' mule' motulu sasu selatan Kades-Barnea, lau-laus motulu Hezron, mokiita' i Adar, lapas aijo' moselemo mompatui Karka.

⁴Lengkat ikiijo' mokiijo' mule' i Azmon, lantas montuusakonmo gimpangnyo nu uee anu motempas tiba Mesir, lantas tinokamo i Ambai anu Totonga'nyo. Sumo aijo' na potempasan sasu selatan nu da'erah kona hi tulunan nu bansa Yehuda. Ka' potempasan aijo' salakumo potempasan sasu selatan songko-songko na lipu' nu aha Israel.

⁵I sasu kabetean potempasannyo aijo'mo Ambai Mate, lau-laus sasu utara ka' toka-toka i minanganyo nu Kaunyo Yordan. I sasu utara, potempasannyo otampu'uni lengkat mae i minanganyo nu Kaunyo Yordan aijo',

⁶mokiita' i Bet-Hogla, lantas lau-laus i potempasan tiba Bangka'nyo nu Yordan. Lengkat ikiijo' potempasan sasu utara aijo' mokiita'mo lau-laus i utara toka-toka i Batu Bohan (i Bohan aijo' anak i Ruben),

⁷lapas aijo' i lau-lausmo nokiijo' i Bangka'nyo Kasusa'an toka-toka i Debir, lantas nosele mule' mompanjolongi utara mongahopimo Gilgal i tampat anu mompaha ahop tiba sohipi' nu bungkutnyo anu kiijo' mae i Adumin sasu selatan bangka'nyo aijo'. Lengkat ikiijo' i lau-laus mule' i mata nu uee En-Semes, lantas nokiijo'mo i En-Rogel,

⁸lapas aijo' nokiita'mo motulu Bangka'nyo nu Hinom ka' nokiijo'mo i sasu selatan nu puge'nyo, kiijo'mo na Yerusalem kota nu aha mian Yebus. Lengkat ikiijo' potempasannyo aijo' mokiita'mo i bawo nu puge'nyo sasu kinsoban Bangka'nyo nu Hinom, i puusnyo nu sasu utara Bangka'nyo nu Refaim,

⁹lapas aijo' i lau-lausmo nokiijo' imata nu uee Me-Neftoah, toka-toka mokiijo' i kota-kota koko Bungkutnyo nu Efron. Lengkat ikiijo' potempasan nu da'erah aijo' noselemo mokiijo' mongahopi Baala (aijo'mo Kiryat-Yearim),

¹⁰ka' nontikubimo sasu kinsoban Baala mokiijo' mompatuimo Bungkutnyo nu Edom, lantas i lau-lausmo nokiijo' sasu utara Bungkutnyo nu Yearim (aijo'mo Bungkutnyo Kesalon), ka' nokaiyongmo i Bet-Semes, lapas aijo' i lau-lausmo nokiijo' i Timna.

¹¹Lengkat mae i Timna potempasan aijo' nambamo nokiijo' nompanjolongimo sasu utara Bungkutnyo nu Ekron, lantas noselemo nokiijo'mo nongahopimo Sikron, monsahak Bungkutnyo nu Baala i lau-laus mokiijo'mo i Yabneel, lantas puusnyo i ambai anu i Totonga'nyo,

¹²anu salakumo potempasan sasu kinsoban da'erah nu aha tulunan nu bansa Yehuda. I da'erahmo haha aijo' na kinajojoongan nu to utu-utus mae nu tulunan nu bansa Yehuda.

¹³ Susumo anu pinalentahkonmo nu Tumpu hi Yosua, sambahagian na da'erah nu Yehuda binee'mo hi Kaleb anak i Yefune aha tulunan mae nu bansa Yehuda. Binee'mo hi ia na Hebron, aijo'mo na kota anu nu aha Arba, tuuma i Enak.

¹⁴Lee' mae i Enak aijo'mo aha mian nu Sesai, Ahiman tiba Talmai. I Kaleb nolaa'mo aha iwi-iwi' da madi'mo jojoong i Hebron.

¹⁵Lengkat ikiijo' inambamo nontumbuhi aha mian anu jojoong kiijo' i Debir. (Kota aijo' naipuan mae talasanggo salakumo Kiryat-Sefer.)

¹⁶I Kaleb notatae, “Ihe na moko ala mompatundu' Kiryat-Sefer, ia na mongosoai anaku boune, i Akhsa.”

¹⁷I Otniel anak nu utus i Kaleb anu sinanggohan i Kenas, na nompatundu'mo kota aijo'; sahingga i Kaleb nombee'mo i Akhsa, anaknyo da baumo bengkele' i Otniel.

¹⁸I sinaanyo pinonika'anmo aha, i Otniel sabole-bolemo nompoto'i hi Akhsa da mompoita tano' hi tuumanyo. Jadi nalalobosmo na i Akhsa i keledainyo, lantas i Kaleb nompokilawamo hi ia apaa na anu nu kahanda'i.

¹⁹Tinaaman i Akhsa, “Anu ku kahanda'i tano anu daagi ko to pia-piangkuka na mata nu uee, kalana tano' anu binee' nu belento tuumangku hi belengku aijo' da'erah anu madi' ko ueenyo.” Sahingga binee'anmo i Kaleb na ia anu ko matanyo nu uee i sasu sandakannyo ka' mata nu uee i sasu po'iliannyo.

²⁰Uuka aiya tano'mo anu obee' hi to utu-utus nu aha tulunan nu bansa Yehuda da ahamo na tumpunyo.

²¹Kota-kota anu talalo hondo majo'on i sasu selatan na anu ingalamo nu aha Yehuda, aijo'mo anu i potempasan tiba Edom, iwi-iwi' uampulu' ka' osio' na kota, tibamo kampu-kampung anu kiijo' i da'erahnyo. Kota haha aijo' aijo'mo: Kabzeel, Eder, Yagur, Kina, Dimona, Adada, Kedes, Hazor, Yitnan, Zif, Telem, Bealot, Hasor-Hadata, Keriot-Hezron (aijo'mo Hazor), Amam Sema, Molada, Hazar-Gada, Hesmon, Bet-Pelet, Ziklag, Madmana, Sansala, Lebaot, Silhim, Ain ka' Rimon.

³³Kota-kota tibamo kampu-kampung anu kiijo i da'erahnyo anu singkap i tengke nu puge'nyo iwi-iwi' sampulu' ka' opat na kota aijo'mo: Esytaol, Zora, Asna, Zanoha, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera, Gederotaim.

³⁷Ka' suele sampulu' ka' anom na kota aiya tibamo kampu-kampung anu kiijo' i da'erahnyo: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama tiba Makeda.

⁴²Ka' suele osio' na kota aiya tibamo kampu-kampung anu kiijo i da'erah nyo': Libna, Eter, Asan, Yiftah, Asna, Nesib, Kehila, Akhsib tiba Maresa.

⁴⁵Ka' suele Ekron tibamo kota anu toto ise-ise' tiba kampu-kampungnyo.

⁴⁶Tiba iwi-iwi'mo na kota'nyo tiba kampu-kampungnyo koko Asdod, lengkat mae i Ekron toka-toka mokiijo' i Ambai anu Totonga'nyo.

⁴⁷Sumo aitu mule' na Asdod ka' Gaza tiba kota-kota anu toto ise-ise' ka' kampu-kampungnyo anu sinongkomo toka-tokamo koko panga'nyo nu uee i potempasan tiba Mesir ka' biwi nu bone' i Ambai anu i Totonga'nyo.

⁴⁸I da'erah anu aita' i bungkutnyo ko kota'nyo uampulu' ka' sa'angu' tibamo kampu-kampung anu ikiijo'; Samir, Yatir, Sokho, Dana, Kiryat-Sana (aijo'mo Debir), Anab, Estemoa, Anim, Gosyen, Holon tiba Gilon.

⁵²Ka' suele osio' na kota aiya tibamo kampu-kampung anu kiijo' i daerahnyo; Arab, Duma, Esan, Yanum, Bet-Tapuah, Afeka, Humta, Kiryat-Arba (aijo'mo Hebron) tiba Zior.

⁵⁵Ka' suele sampulu' na kota aiya tibamo kampu-kampung anu kiijo' i daerahnyo; Maon, Karmel, Zif, Yuta, Yizreel, Yokdeam, Zanoah, Kaim, Gibea tiba Timna.

⁵⁸Ka' anom na kota aiya suele tibamo kampu-kampung anu kiijo' i daerahnyo; Halhul, Bet-Zur, Gedor, Maarat, Bet-Anot tiba Eltekon.

⁶⁰Ka' suele ohua' na kota aiya tibamo kampu-kampung anu kiijo' i daerahnyo; Kota Kiryat-Baal (aijo'mo Kiryat-Yearim) tiba kota Raba.

⁶¹I da'erah nu padang bola, daagi' ko kota'nyo anom tibamo kampu-kampung anu kiijo' i daerahnyo; Bet-Araba, Midin, Sekhakha, Nibson, Kota Garam, ka' En-Gedi.

⁶³ Kota Yerusalem ninsoopmo suele anu nu aha Yehuda, panyo aha mian nu Yehuda madi' noko ala nolaa' aha mian nu Yebus anu jojoong ikiijo'. Sangkutnyo tempo' uuka aiya aha mian nu Yebus daagi' hingga-hinggat kiijo' jojoong tiba aha mian nu Yehuda i kota aijo'.