Read Saluan YOSUA 18 Bible Online

YOSUA 18 - Saluan bible

YOSUA 18

¹Noko lapas na nompatundu' lipu' anu jinanji'mo nu Tumpu, aha mian nu Israel iwi-iwi' sinihukmo i Silo, lantas aha nompaha pokonamo Kemah da bau katokaan nu Tumpu.

²Daagi' popitu' na tulunan nu bansa Israel anu ma'isa nohumpak pombahagian tano'.

³Jadi, i Yosua notataemo hi mian nu Israel, “Belemiu daagi' montada'i hipianje, lantas mambaje monjojoongi da'erah anu binee'mo nu Tumpu, Tumpu Allah nu mompolee' miu hi belemiu?

⁴Toto sa'angu' na tulunan nu bansa pile'i aha totolu' na mian. Da ku pokau na aha mamba montoa songko-songko na lipu' aiya ka' otulis mae na potempasan nu da'erah anu nuka'ima'i nu ala nu aha. Lapas aijo' aha tionyo ahi' mamba mae hi belengku.

⁵Tano' aijo' tionyo ahi' obagi popitu' na bahagian. I Yehuda tataapmo i da'erahnyo sasu selatan, ka' i Yusuf i da'erahnyomo sasu utara.

⁶Gambalan nu potempasan anu popitu' na bahagian nu tano' aijo' tionyo ahi' obau ka' obee' mae hi belengku. Ku bauakonje onde da osumbu' pa' mosia na koonyo nu Tumpu Allah hi belemiu.

⁷Ola tulunan nu bansa Lewi na madi' mohumpak bahagian tano' susumo belemiu, kalana bahagian nu aha aijo'mo timbali to ima-imam mombau apaa na anu nu palentahkon nu Tumpu. Ka' aha tulunan nu bansa Gad, Ruben ka' sambagian tulunan nu bansa Manasye memang aha nohumpakmo bahagiannyo i sasu kabete'an Kaunyo nu Yordan. I Musa posaihon nu Tumpu nombee'mo tano' aijo' hi aha.”

⁸Jadi i Yosua nompokinde'imo sumo uuka hi mian haha aijo' “Lako'mo mamba toa mae na lipu' aiya ka' gambalan nu potempasannyo obau mae; lapas aijo' pinsusule'mo mae hi belengku. Ku bauakonje onde aiya i Silo da osumbu' pa' mosia na koonyo nu Tumpu hi belemiu.” Noko humpak na aha pokinde' haha aijo' hi Yosua nambamo na aha nontoa tano' aijo'.

⁹Songko-songko na lipu' aijo' i lajangan nu aha, ka' potempasan nu tano' anu popitu' na bahagiannyo aijo' tinulis mae nu aha iwi-iwi' na kota anu kiijo' mae suele tinulis nu aha. Lapas aijo' aha ninsusule'mo mae hi Yosua i kemahnyo kiijo' i Silo.

¹⁰Lantas i Yosua nombaumo onde da bau ponsumbu'an mosia na koonyo nu Tumpu hi aha. Lapas aijo' i Yosua nombee'mo tano' pombahagian hi toto sa'angu' na tulunan nu bansa Israel anu ma'isa nohumpak pombahagian tano'.

¹¹Pombahagian momona aijo'mo tano' anu obee' hi to utu-utus tulunan nu bansa Benyamin. Bahagian nu aha aijo' tampatnyo i olot nu aha tulunan nu bansa Yehuda tiba tano' lee' mae nu aha tulunan nu bansa Yusuf.

¹²I sasu utara potempasan nu tano' nu aha, otampu'uni lengkat mae i Kaunyo nu Yordan, lantas mokiita'mo i sohipi' nu bungkutnyo sasu utara Yerikho, lapas aijo' mompanjolongimo sasu kinsoban motulu da'erah anu ko bungkutnyo kojo'onnyo toka-toka i da'erah nu padang bolaa Bet-Awen.

¹³Potempasan aijo' i lau-laus mule' namba i sohipi' nu bungkutnyo sasu selatan Lus (aijo'mo na anu osanggohi Betel), lantas nokaiyongmo i Atarot-Adar i bungkutnyo sasu selatan Bet-Horon-sasu Po'iliannyo.

¹⁴Lengkat mae i bungkutnyo aijo' sasu kinsoban potempasan nu tano' aijo' noselemo sasu selatan mompanjolongimo Kiryat-Baal (aijo'mo Kiryat-Yearim). Kiryat-Baal anu nu aha tulunan nu bansa Yehuda. Aijo'mo na potempasan nu tano' sasu kinsoban.

¹⁵Potempasannyo sasu selatan tinampu'unan lengkat mae i sohipi' nu Kiryat Yearim lau-laus namba i mata nu uee Me-Neftoah,

¹⁶lantas nokaiyongmo i tengke nu bungkutnyo anu mompaha timbang bangka'nyo nu-Hinom anu i puusnyomo sasu utara Bangka'nyo nu Refaim. Lapas aijo' potempasannyo nambamo sasu selatan motulu Bangka'nyo nu-Hinom sasu selatan sohipi' nu bungkutnyo i lipu' Yebus lantas lau-lausmo namba i En-Rogel,

¹⁷noselemo mompanjolongi sasu utara En-Semes, lantas nompatuimo Gelilot i santoanyo nu Pindakoan Adumim. Lapas aijo' potempasannyo nokaiyongmo i Batu Bohan (Bohan anak i Ruben),

¹⁸lantas motulumo sasu utara i sohipi' nu bungkutnyo mompaha timbang tiba bangka'nyo nu Yordan, lapas aijo' nokaiyongmo i bangka'nyo aijo',

¹⁹motulu sasu utara i sohipi' nu bungkutnyo Bet-Hogla, ka' puusnyo, i sasu utara Ambai-Mate minanganyo nu Kaunyo Yordan. Aijo'mo na potempasan sasu selatan.

²⁰Kaunyo nu Yordan salakumo potempasan sasu kabete'an. Sumo aijo' na potempasan nu tano' haha aijo' anu binee'mo hi to utu-utus tulunan nu bansa Benyamin da timbalimo anu nu aha.

²¹Kota-kota anu nu to utu-utus tulunan mae nu bansa Benyamin iwi-iwi' sampulu' ka' ohua' na kota tibamo kampu-kampung anu kiijo' i da'erahnyo aijo'mo: Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Kefar-Haamonai, Ofni tiba Geba.

²⁵Ka' suele sampulu' ka' opat na kota aiya tibamo kampu-kampung anu kiijo' i da'erahnyo: Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (aijo'mo Yerusalem), Gibea tiba Kiryat-Yearim. Aijo'mo na tano' iwi-iwi' anu binee'mo hi to utu-utus tulunan nu bansa Benyamin da timbalimo anu nu aha.