Read Saluan YOSUA 19 Bible Online

YOSUA 19 - Saluan bible

YOSUA 19

¹Pombahagian ko ohua'nyo aijo'mo tano' anu obee' hi to utu-utus tulunan nu bansa Simeon. Tano' nu aha motempas toka-toka i potempasan nu tano', anu nu aha tulunan nu bansa Yehuda.

² Aha binee'an suele sampulu' ka' totolu' na kota tibamo kampu-kampungnyo anu kiijo' i da'erahnyo: Bersyeba, Syeba, Molada, Hazar-Sual, Bala, Ezem, Eltolad, Betul, Horma, Ziklag, Bet-Hamarkabot, Hazar-Susa, Bet-Lebaot, tiba Saruhen.

⁴

⁵

⁶

⁷Ka' suele opat na kota tibamo kampu-kampungnyo anu kiijo' i da'erahnyo: Ain, Rimon, Eter, tiba Asan.

⁸Ka' suele ninsoopmo na kampung iwi-iwi' anu kiijo' i kota haha aijo', kojo'onnyo toka-toka i Baalat-Beer (aijo'mo Rama) i tano' sasu selatan. Aijo'mo na tano' anu binee'mo hi to utu-utus, tulunan nu bansa Simeon da ahamo na tumpunyo.

⁹Kalana tano' anu binee' hi tulunan nu bansa Yehuda talalo ewa, sahingga sambahagian na tano' aijo' binee'mo hi tulunan nu bansa Simeon.

¹⁰Pombahagian tano' anu ko totolu'nyo, aijo'mo tano' anu obee' hi to utu-utus tulunan nu bansa Zebulon. Potempasan nu tano' anu binee'mo hi aha toka-toka i Sarid.

¹¹Lengkat mae i Sarid, potempasannyo sasu kinsoban mambamo mompanjolongi Marala, ka' monsahak Dabeset tiba panga'nyo nu kaunyo sasu kabete'an nu Yokneam.

¹²Potempasan sasu kabete'an lengkat pe'e mae i Sarid mambamo mompanjolongi potempasan nu Khislot-Tabor, lau-laus mamba i Dobrat lantas mokiita'mo i Yafia.

¹³Lengkat mae i kiita' potempasannyo aijo' lau-lausmo mamba mompanjolongi sasu kabete'an ka' mambamo i Gat-Hefer tiba Et-Kazin, lantas noselemo mamba mompanjolongi sasu Nea ka' mambamo i Rimon.

¹⁴I sasu utara potempasan nu tano' aijo' mosele mamba mompanjolongi sasu Hanaton ka' puusnyo toka-toka i Bangka'nyo nu Yiftah-El.

¹⁵I da'erah nu aha tulunan nu bansa Zebulon aijo' suele ninsoop: Kalat, Nahalal, Simron, Yidala tiba Betlehem. Da'erah nu aha aijo' kiijo'mo i unonyo na sampulu' ka' ohua' na kota tibamo kampu-kampungnyo anu sinangkupmo.

¹⁶Kota haha aijo' tibamo kampu-kampungnyo kiijo'mo i uno nu da'erah anu binee'mo hi to utu-utus tulunan nu bansa Zebulon da tano aijo' timbalimo anu nu aha.

¹⁷Pombahagian tano' anu ko opatnyo anu obee' hi to utu-utus tulunan nu bansa Isakhar.

¹⁸I uno nu da'erah nu aha minsoopmo: na Yizreel, Khesulot, Sunem,

¹⁹Hafaraim, Sion, Anaharat,

²⁰Rabir, Kisyon, Ebes.

²¹Remet, En-Ganim, En-Hada, tiba Bet-Pazes.

²²Potempasan tano' nu aha mompadis Tabor, Sahazima, Bet-Semes, puusnyo i Kaunyo nu Yordan. Dae'rah nu aha aitu monsangkup sampulu' ka' anom na kota tiba kampung-kampung ti-tikupnyo.

²³Kota haha aijo' tibamo kampu-kampungnyo kiijo'mo i uno nu da'erah aijo' anu binee'mo hi to utu-utus tulunan nu bansa Isakhar da tano' aijo' timbalimo anu nu aha.

²⁴Pombahagian tano' anu ko olima'nyo, anu obee' hi to utu-utus tulunan nu bansa Asyer.

²⁵Da'erah nu aha kiijo'mo i unonyo: na Helkat, Hali, Beten, Akhsaf,

²⁶Alamelekh, Amad, tiba Misal. Potempasan nu tano' nu aha sasu kinsoban monsahak Bungkutnyo nu Karmel tiba Kaunyo nu Libnat.

²⁷Lengkat ikiijo' potempasan nu aha aijo' moselemo sasu kabete'an mambamo mompanjolongi Bet-Dagon ka' monsahak potempasan nu Zebulon tiba Bangka'nyo nu Yiftah-El lantas mompatuimo sasu utara mambamo mompanjolongi Bet-Emek tiba Nehiel. Lantas potempasan aijo' lau-laus mule' mamba mompanjolongi sasu utara mompatuimo Kabul,

²⁸Ebron, Rehob, Hamon, tiba Kana, kojo'onnyo toka-toka i Sidon.

²⁹Lengkat ikiijo' potempasan aijo' noselemo mambamo mompanjolongi Rama lantas toka-toka i kota Tirus, aijo'mo sa'angu' na kota anu ko bentengnyo: lapas aitu potempasan aijo' noselemo mule' mamba mompanjolongi Hosa lantas puusnyo i Ambaimo anu Totonga'nyo. I Potempasan haha aijo' minsoopmo na Mahalab, Akhzib,

³⁰Uma, Afek tiba Rehob. Songko-songko na da'erah nu aha kiijo'mo i unonyo na uampulu' ka' ohua' na kota tibamo kampu-kampung anu sinangkupnyo.

³¹Kota-kota'nyo tibamo kampu-kampungnyo haha aijo' kiijo'mo i uno nu da'erah anu binee'mo hi aha to utu-utusnyo tulunan nu bansa Asyer da tano' aijo' timbalimo anu nu aha.

³²Pombahagian tano' anu ko anomnyo anu obee' hi to utu-utus tulunan nu bansa Naftali.

³³Tano' nu aha motempas otampu'uni lengkat mae i Helef, toka-toka mamba i kau' ek anu kiijo' i Zaananim lau-laus mamba mompanjolongi Adami-Nekeb, lantas nompatuimo Yabneel toka-toka i Lakum, lapas aijo' puusnyo i Kaunyo nu Yordan.

³⁴Lengkat ikiijo' potempasan nu tano' aijo' noselemo sasu kinsoban mambamo mompanjolongi Arnot-Tabor, ka' lengkat mae ikiijo' mompatuimo Hukok. I sasu selatan da'erah aiya motempas tiba da'erah Zebulon sasu kinsoban tiba Asyer, ka' sasu kabete'an tiba Kaunyo nu Yordan.

³⁵To kota-kota anu ko bentengnyo aijo'mo: Zidim, Zer, Hamat, Rakat, Kineret,

³⁶Adama, Rama, Hazor,

³⁷Kedes, Edrei, En-Hazor,

³⁸Yiron, Migdal-El, Horem, Bet-Anat, tiba Bet-Semes. Songko-songko na da'erah nu aha kiijo'mo i unonyo na sampulu' ka' osio' na kota tibamo kampu-kampungnyo anu sinangkupmo.

³⁹Kota-kota aijo' tibamo kampungnyo anu ikiijo', i unomo nu da'erah anu binee'mo hi to utu-utus tulunan nu bansa Naftali da tano' aijo' timbalimo anu nu aha.

⁴⁰Pombahagian tano' anu ko popitu'nyo, anu obee' hi to utu-utus tulunan nu bansa Dan.

⁴¹Da'erah nu aha aiya kiijo'mo i unonyo na Zora, Esytaol, Ir-Semes,

⁴²Saalbin, Ayalon, Yitla,

⁴³Elon, Timna, Ekron,

⁴⁴Elteke, Gibeton, Baalat.

⁴⁵Yehud, Beneberak, Gat-Rimon,

⁴⁶Me-Yarkon, Rakon ka' suele da'erah anu nusangkup nu Yope.

⁴⁷ Aha mian tulunan nu bansa Dan, da'erah nu aha sambagian ningkotmo, jadi aha nambamo i Lesem ka' nontumbuhimo kota aijo'. Pinatundu'mo nu aha, ka' nompatei anu jojoong ikiijo', ka' nongkuasaimo kota aijo'. Sahingga jinojoongmo na aha ikiijo' ka' nombali'imo sanggo nu kota Lezem aijo' tinimbalimo kota Dan susumo sanggo nu mompolee' nu aha.

⁴⁸Kota-kota tibamo kampungnyo anu ikiijo' i unomo nu da'erah anu binee'mo hi to utu-utus tulunan nu bansa Dan da ahamo na tumpunyo.

⁴⁹Noko lapas na mian nu Israel nombagi-bagi tano' i lipu' aijo', aha nombee'imo tano' sambahagian hi Yosua anak i Nun da tano' aijo' timbalimo anunyomo.

⁵⁰Susumo anu pinalentahkonmo nu Tumpu, aha nombee'imo ia kota anu pinoitanyomo, aijo'mo: Timnat-Serah i bungkutnyo nu Efraim. Po'ule' binau i Yosua na kota aijo' lantas jinojoongmo ikiijo'.

⁵¹Sumo aijo' na i Imam Eleazar, i Yosua anak i Nun, ka' to tu'a-tu'anyo nu auwan hi aha tulunan nu bansa Israel nombagi-bagimo tano' i lipu' aijo' binauakon onde, nompoita pokinde' pa' mosia na koonyo nu Tumpu. Binau nu aha na aijo' i Silo i ahop nu sabatan nu Kemah nu Tumpu. Sumo aijo' na nombagi tano' haha aijo'.