Read Saluan YOSUA 2 Bible Online

YOSUA 2 - Saluan bible

YOSUA 2

¹ Lapas aijo' lengkat mae i Kemah nu aha kiijo' mae i Sitim, i Yosua nonsaimo ua'aha na mian anu mamba mondoyoni Kana'an. Ua'aha na mian aijo' pinalentah da mamba montoa pa' mosia na lipu' Kana'an panyo matikohowini da boli nusumbu' nu aha, ka' anu talalo penting hondo kota Yerikho. Sahingga nambamo na aha i kota aijo' ka' nompoita da jojoong pe'e i laigan nu samian na boune anu biasa masala', sanggonyo i Rahab.

²Tomundo nu kota Yerikho nohongomo pihi-pihi aijo' daagi' ko mian nu Israel anu tinokamo mondoyoni da'erah nu Yerikho.

³Sahingga i Tomundo nonsaimo mian namba hi Rahab da mompoto'i palentah sumo uuka, “Sabatakon mae na mian haha itina' anu nompoita jojoong pe'e i laigan nu beleyum itina'. Aha mian anu mondoyoni toka mae montoa pa' mosia na da'erah nu Yerikho songko-songko!”

⁴“Memang daagi' ko mian anu tinoka i laiganku,” na koonyo i Rahab, “panyo madi' ku sumbu' pa' lengkat mae iya na aha. Aha nambamo u'uka salatan sinaa nalomo ma'isa pe'e sabatan daka' nu kota tinumban. Ka' madi'mo pinokilawangku pa' moyamo na aha, panyo de aha sampa ololoi' ku gantang daagi' osampa.” (Padahan pinosulukmo i Rahab na aha mondoyoni ua'aha aijo' i aluk nu tambulan nu kilit nu kau' anu bau kahohon anu pinotambun kiita' i bangkala'.)

⁷Sahingga nambamo na aha anu sinai i tomundo aijo' nompala'i kota. Salatan aha tinokamo i sambiha'nyo, sabatan daka' nu kota tinumbanmo. Aha noliomo ua'aha na mian anu namba mae nondoyoni aijo' anu montoa pa' mosia na kota aijo', tinoka-toka i tampat potaapan Kaunyo nu Yordan.

⁸Pihi-pihi aitu ma'isa pe'e i hoyot na ua'aha na mian anu tinoka mae mondoyoni Israel anu montoa pa' mosia na kota aijo', i Rahab nokiita'mo i bangkala',

⁹ka' notatae hi aha, “Ku sumbu' Tumpu nombee'mo lipu' aiya hi belemiu. Iwi-iwi' na mian aiya nabuhukmo hi belemiu.

¹⁰ Ihongomo mami na lelenyo mosia na Tumpu nompoti'i Ambai Gelagah i ahop nu belemiu, tempo'nyo belemiu nompala'imo mae Mesir. Kami mule' nohongomo mosia na belemiu nompateimo i Sihon ka' i Og, ua'aha na tomundo nu aha bansa Amori aijo' i sasu kabete'an Kaunyo nu Yordan.

¹¹Salatan ihongomo mami na lele haha aijo' kami nabuhukmo hondo. Iwi-iwi' na mian aiya hi kami madi'mo ko anu binaani kalana nohongomo belemiu. Tumpu Allah nu belemiu totu-totu'u Tumpu Allah Anu Daka' na Kuasanyo aita' i langit ka' aiya i dunia.

¹²Ku poita sabole-bole da belemiu basumpa' i sanggo-Nyo salaku bau pomponyata', belemiu madi' mompoposia kami sambonua susumo anu binaungkumo hi belemiu. Bajanji' da tuuma ka' tinangku, ka' to utu-utusku, ka' iwi-iwi' na aha sambonua madi' opatei nu belemiu, panyo opotuu' ahi' nu belemiu. Ka' han aijo' bee'i mae sa'angu' na tanda da otoongi mami ka' da ku palesayamo na belemiu!”

¹⁴Sahingga ua'aha na mian haha aijo' nontaamimo “Ojanji' mami de lipu' aiya nubee'mo nu Tumpu hi kami, madi' opoposia mami na belemiu, asan beleyum boli monsisik kami mau mule' pa' hi he. Nukutuki nu Tumpu na kami de kami madi' mongganapi janji' aijo'.”

¹⁵Kalana laigan i Rahab pinotinjo naninjakit i mesen nu kota sahingga i Rahab nonguluakon ua' aha aijo nu kahohon nontulu i tolongan.

¹⁶“Lako' pontulu aita' mae i da'erah nu bungkutnyo,” na koonyo i Rahab hi aha, “Da to mia-mian anu sinai i tomundo madi' bisa mohakop belemiu. Paninsuluk itina' tolun sinaa na kopinnyo sahingga aha minsusule'mo mae atina'je ka' belemiu timbali molausakon lajang miu.”

¹⁷Ua'aha na mian anu namba mae nondoyoni aijo' notatae hi Rahab, “Sumo itina'mo, ototu'uije mami na janji' anu pinoitamo nu beleyum hi kami.

¹⁸Ola uuka na anu tionyo ahi' nu bau. De kami montumbuhimo lipu' nu belemiu aiya, sabole-bole kahohon mea-mea' aiya nu posegot i tolongan aiya, tampat pinonguluakonanmo nu beleyum kami. Tuuma ka' tina nu beleyum, to utu-utus nu beleyum, iwi-iwi' na aha sa'anakan nu tuuma nu beleyum tionyo ahi' sihuk i laigan nu beleyum aiya.

¹⁹De sala'samian anu aijo' hi aha mosabat i laigan aiya ka' opatei, ia i nate aijo' kalana posi sala'nyo; han aijo' misa' ponsumbu'an mami. Kami madi' montanggung kasala'annyo. Panyo de daagi' ko anu silaka i laigan aiya ponsumbu'anmo mami na montanggung kasala'annyo.

²⁰Panyo mule' de belemiu monsisik kami hi toto samian, saba' kami madi'mo daagi' montoongi janji' anu pinoitamo nu beleyum hi kami.”

²¹Han aijo' sinetujuanmo i Rahab lantas pinobee'nyomo na aha namba. Lapas aijo' pinosegotnyomo na kahohon anu mea-mea' aijo' i tolongan.

²²Lantas ua'aha na mian anu namba nondoyoni aijo' nambamo nokiita' mae i da'erah nu bungkutnyo ka' naninsulukmo. Tinolun sinaa na kopinnyo na aha anu sinai mae i tomundo nolio aha iyaya mae sinongko na da'erah aijo', panyo madi' kinabot na aha. Ahennyo aha anu sinai aijo' ninsusule'mo mae i Yerikho.

²³Lantas ua'aha na mian nu Israel anu nondoyoni aijo' nintudunmo lengkat mae i bungkutnyo ka' notaap i kaunyo, ka' aha ninsusule'mo hi Yosua. Iwi-iwi' na anu jinadimo ka' anu ingoa'anmo nu aha pinotokamo nu aha hi Yosua.

²⁴Lapas aijo' aha notataemo, “Memang matantumo na Tumpu mombee'mo iwi-iwi' na lipu' aijo' hi kita, iwi-iwi' na mian anu kiijo' mae nongkabuhukmo kita.”