Read Saluan YOSUA 21 Bible Online

YOSUA 21 - Saluan bible

YOSUA 21

¹ Daagi' kino sansinaan to tu'a-tu'anyo nu auwan nu aha tulunan nu bansa Lewi nambamo i Silo i lipu' Kana'an, ka' nangadap hi Imam Eleazar, i Yosua anak i Nun, ka' to tu'a-tu'anyo nu auwan iwi-iwi' na tulunan nu bansa Israel. Aha notatae, “Tumpu nompalentahmo i Musa da kami, to mia-mian nu Lewi, obee'i mae kota-kota da bau tampat kajojoongan mami ka' tano' haha aijo' anu ko padangnyo anu sinangkupmo nu kota haha aijo' da bau pompo'ototan potu'on mami.”

³Sahingga aha mian nu Israel nombatukimo palentah nu Tumpu. Posi tano'mo nu aha na binee'mo nu aha hi mian nu Lewi aijo'mo to pia-piangkuka na kota tibamo tano'nyo haha aijo' anu ko padangnyo.

⁴Anu momona nohumpak kota'nyo aijo'mo to utu-utus lee' mae i Kehat anu ninsoop tulunan mae nu bansa Lewi. To utu-utus lee' mae i Imam Harun binee'an sampulu' ka' totolu' na kota anu ingala i da'erah tulunan mae nu bansa Yehuda, Simeon ka' Benyamin.

⁵To utu-utus sangga'at anu lengkat mae hi lee' i Kehat binee'an sampulu' na kota anu ingala i da'erah tulunan mae nu bansa Efraim, tulunan mae nu bansa Dan tiba tulunan nu bansa Manasye anu i sasu kinsoban Kaunyo nu Yordan.

⁶Lee' i Gerson nohumpak sampulu' ka' totolu' na kota anu ingala i da'erah tulunan mae nu bansa Isakhar, Asyer, Naftali ka' tulunan nu bansa Manasye anu i sasu kabete'an Kaunyo nu Yordan.

⁷To utu-utus anu lee' mae i Merari nohumpak sampulu' ka' ohua' na kota anu ingala i da'erah tulunan nu bansa Ruben, Gad tiba Zebulon.

⁸Sumo aijo' na aha mian nu Israel nombagi kota-kota anu sinanggomo aijo' tibamo tano'nyo iwi-iwi' anu ko padangnyo; nombagi aijo' binauakon onde hi aha mian nu Lewi susumo anu pinalentahkonmo nu Tumpu hi Musa.

⁹Lengkat mae hi lee' i Kehat anu ninsoop tulunan mae nu bansa Lewi, to ima-imamo lee' mae i Harun na anu momona nohumpak kota'nyo: aha binee'an sampulu' ka' totolu' na kota tibamo tano' anu ko padangnyo. Lengkat mae hi tulunan nu bansa Yehuda ka' i Simeon, aha nohumpak osio' na kota, aijo'mo: Libna, Yetir, Estemoa, Holon, Debir, Ain, Yuta, Bet-Semes tiba Arba, anu sinanggohan susumo sanggo nu tuumanyo i Enak. Kota aijo', tempo' uuka sinanggohanmo Hebron sa'angu' na kota palaihan i bungkutnyo nu Yehuda. Iwi-iwi' na ale' ka' to kampu-kampung anu ninsoopmo i kota aijo' binee'mo hi Kaleb anak i Yefune da tano' aijo' timbalimo anunyo. Lengkat mae hi tulunan nu bansa Benyamin nohumpak opat na kota aijo'mo: Gibeon, Geba, Anatot tiba Almon.

²⁰To utu-utus sangga'at anu lengkat mae hi lee' i Kehat binee'an sampulu' na kota ka' tano' anu ko padangnyo. Lengkat mae hi tulunan nu bansa Efraim nohumpak opat na kota aijo'mo: Bet-Horon, Kibzaim, Gezer tiba Sikhem, sa'angu' na kota palaihan i bungkutnyo nu Efraim. Lengkat mae hi tulunan nu bansa Dan nohumpak opat na kota aijo'mo: Elteke, Gibeton, Ayalon tiba Gat-Rimon. Lengkat mae hi tulunan nu bansa Manasye anu sasu kinsoban nohumpak ohua' na kota, aijo'mo: Taanakh tiba Gat-Rimon.

²⁷Aha lee' mae sangga'at hi tulunan nu bansa Lewi aijo'mo lee' mae i Gerson. To utu-utus anu ninsoop lee' mae i Gerson aijo' binee'an sampulu' ka' totolu' na kota tibamo tano' anu ko padangnyo. Lengkat mae hi tulunan nu bansa Manasye anu i sasu kabete'an nohumpak ohua' na kota, aijo'mo: Beestera tiba Golan, sa'angu' na kota palaihan anu minsoop da'erah Basan. Lengkat mae hi tulunan nu bansa Isakhar nohumpak opat na kota aijo'mo: Kisyon, Dobrat, Yarmut tiba En-Ganim. Lengkat mae hi tulunan nu bansa Asyer nohumpak opat na kota aijo'mo: Misal, Abdon, Helkat tiba Rehob. Lengkat mae hi tulunan nu bansa Naftali nohumpak totolu' na kota, aijo'mo: Hamat-Dor, Kartan tiba Kedes, sa'angu' na kota palaihan i da'erah Galilea.

³⁴Lee' anu ninsoop tulunan nu bansa Lewi, anu ma'isa nohumpak bagi aijo'mo: lee' mae i Merari binee'an sampulu' ka' ohua' na kota tibamo tano' anu ko padangnyo. Lengkat mae hi tulunan nu bansa Zebulon nohumpak opat na kota aijo'mo: Yokneam, Karta, Dimna tiba Nahalal. Lengkat mae hi tulunan nu bansa Ruben nohumpak opat na kota aijo'mo: Bezer, Yahas, Kedemot tiba Mefaat. Lengkat mae hi tulunan nu bansa Gad nohumpak opat na kota aijo'mo: Mahanaim, Hesybon, Yaezer tiba Ramot, sa'angu' na kota palaihan i da'erah Gilead.

⁴¹Jadi tano' haha aijo' anu ingalamo nu bansa Israel iwi-iwi' konjoo'nyo patompulu' ka' ualu' na kota tibamo iwi-iwi' na tano' anu ko padangnyo anu sinangkupmo ka' anu binee'mo hi aha mian nu Lewi.

⁴³Sumo aijo' na Tumpu nombee' hi aha mian nu Israel songko-songko na tano' anu sinumpa'akonmo na jinanji' hi mompolee' nu aha. Salatan aha jinojoongmo i lipu' aijo' aha mian nu Israel tinataapmo ikiijo'.

⁴⁴Jadi susumo apaa na anu jinanji'mo nu Tumpu hi mompolee' nu aha, lipu' aijo' madi'mo ko anu mompoposia kalana saja'mo nujagai nu Tumpu. Sampobali' nu aha iwi-iwi' madi' ko samian pe'e na moko ala mongewa aha, kalana Tumpu na mombee'i ka'untungan mahampate hi aha mian nu Israel de ihe na aha iwi-iwi' anu monsampobali' aha Israel.

⁴⁵Tumpu saja' mongganapi apaa na anu jinanji'-Nyomo hi aha mian nu Israel; madi' ko sa'angu' pe'e na anu madi' Nu ganapi.