Read Saluan YOSUA 23 Bible Online

YOSUA 23 - Saluan bible

YOSUA 23

¹Pinin hondo na Tumpu nonjagai mian nu Israel sahingga madi'mo ko anu nompoposia; aha madi'mo saja' opoposia nu sampobali' nu aha. Tempo'nyo aitu i Yosua i langkai'mo hondo.

²Sahingga ia nolagamo iwi-iwi' na aha mian nu Israel, ka' suele to tu'a-tu'anyo, to pola-polaya', to mia-mian kopian ka' to kapa-kapala nu suludadu, lantas notataemo, “Aku aiya i langkai'mo.

³Belemiu nontoamo iwi-iwi' apaa na anu binaumo nu Tumpu Allah nu belemiu kona hi bansa iwi-iwi' i aiya kalana montutugi belemiu. Aha nahampate monsangaja'i belemiu aijo'mo Tumpu Allah nu belemiu.

⁴Tano' nu to bansa-bansa anu daagi' tinontuha', sumo aijo' mule' tano' iwi-iwi' nu bansa anu i hungku'ankumo, aijo'mo tano' anu i sasu kabete'an i Kaunyo nu Yordan lau-laus nokiijo' i sasu kinsoban toka-toka mokiijo' i Ambai anu Totonga'nyo, iwi-iwi' aijo' binagiakonkumo da timbalimo anu miu.

⁵Tumpu Allah nu belemiu na nompotimbalimo bansa haha aijo' namba ka' nopalai nompala'i belemiu de belemiu mambamo mompahampateakon aha. Ingalamo nu belemiu na lipu' nu aha, susumo anu jinanji'mo nu Tumpu Allah nu belemiu hi belemiu.

⁶Kalana aijo', opokopiani da belemiu saja' montuluti ka' mombau iwi-iwi' apaa na anu tinulismo i uno nu Kitab Atulan i Musa. Mau ola sa'angu' madi' timbali olanggai na atulan haha aijo'.

⁷Tiba jalan anu sumo aitu belemiu madi'mo maninggalo' tiba to bansa-bansa anu daagi' atina' hi belemiu. Belemiu madi' timbali monsanggo sanggo nu to pilo-pilogot nu aha kabai basumpa' i sanggo aijo'. Ka' suele belemiu madi timbali monsombah kabai tolodadupu i ahop nu to pilo-pilogot haha aijo'.

⁸Ola ahi' tionyo belemiu sabole-bole montuluti Tumpu, susumo anu binaumo nu belemiu sangkutnyo uuka aiya.

⁹Bansa anu toto daka-daka' ka' mahoson i laa'mo nu Tumpu da mompala'i belemiu; aha aijo' madi' ko anu moko ala mongewa belemiu.

¹⁰ Toto samian atina' hi belemiu moko ala mompatundu' momada-madala na mian, kalana Tumpu Allah nu belemiu na mahampate monsangaja'i belemiu susumo anu jinanji'-Nyomo.

¹¹Kalana aijo', o inau' ka' saja' mongkalibosi Tumpu Allah nu belemiu.

¹²De belemiu madi' mohongo-hongo ka' belemiu maninggalo'mo tiba to bansa-bansa anu daagi' jojoong atina' hi belemiu, ka' belemiu mongosoaimo aha,

¹³bala'ingati, kalana Tumpu Allah nu belemiu totu-totu'u madi'mo molaa' bansa haha aijo' de mompala'imo belemiu. Panyo ola ahi', ahamo na monsilakai belemiu, kalana aha timbalimo susumo so'o kabai bau pohakop belemiu. Ahamo na monsaduakon belemiu da sansala hondo; kalana aha timbalimo susumo bau pondoke i tundun miu kabai susumo hii' i uno nu mata miu. Belemiu saja'mo mongoa'i sansala sahingga maumo ola samian anu atina' hi belemiu madi'mo ko anu jojoong i lipu' anu ma'ima' aiya anu binee'mo nu Tumpu Allah nu belemiu hi belemiu.

¹⁴Uuka aiya tempo'nyomo na aku silakamo. Belemiu iwi-iwi' toto samian nonsumbu'mo hondo Tumpu Allah nu belemiu anu nombee'mo hi belemiu iwi-iwi' na anu ma'ima' apaa na anu jinanji'-Nyomo. Batu-batu anu toho'mo jinanji'-Nyo binau-Nyomo madi' ko anu madi' binau-Nyo.

¹⁵Panyo susumo Ia nombaumo batu-batu anu jinanji'-Nyomo hi belemiu, sumo aitu mule' na Ia sabole-bole mombau batu-batu anu tinanga'an-Nyomo mombaya'i belemiu.

¹⁶De belemiu molanggai anu jinanji'mo ka' anu pinalentahkon-Nyomo hi belemiu, nu Tumpu Allah nu belemiu da otuluti, panyo belemiu mambamo monsombah to pilo-pilogot sangga'at ka' montulutimo pilogot haha aijo' nutambuha'imo nu Tumpu ka' mohukumo belemiu. I uno nu tempo' anu madi' pin belemiu iwi-iwi' mohopu'mo i lipu' anu ma'ima' aiya, anu binee'mo nu Tumpu hi belemiu.”