Read Saluan YOSUA 3 Bible Online

YOSUA 3 - Saluan bible

YOSUA 3

¹Dodododopnyo, i Yosua ka' iwi-iwi' na mian nu aha Israel daagi' subu-subu hondo aha nobulamo, lantas nompala'imo tampat pinombauan nu aha kemah kiijo' i Sitim, ka' nambamo nokiijo' i Kaunyo nu Yordan. Tinoka ikiijo' aha nombaumo kemah polalanuan hipian na motaap.

²Salatan tinolun sinaamo to pola-polaya' nambamo nompaha poto'i i kemah nu aha iwi-iwi',

³ka' nompalentahmo mian nu aha Israel, “De otoa nu belemiu to ima-imam molembanmo Peti' Palajanjian nu Tumpu Allah nu belemiu, belemiu suele mambamo ahi' mompala'i tampat pinombauan kemah aiya. Batuki na Peti' aijo',

⁴panyo lumajang boli talalo ohani hi Peti' aijo'; batuki aiya mae i mihi sa'angu' na kilometen na kojo'onnyo. Tiba jalan anu sumo aijo' da osumbu' nu belemiu na jalan anu tionyo ahi' otului nu belemiu, kalana belemiu ma'isa toho' notulu i da'erah aiya.”

⁵I Yosua notataemo hi aha mian nu Israel, “Tionyo ahi' belemiu mompokolonde butong, kalana dodop Tumpu mompotoamo anu okabangangi aiya hi belemiu.”

⁶Lantas i Yosua nompalentahmo to ima-imam da mohangkatmo Peti Palajanjian aijo' lantas mambamo momona, aha mian nu Israel na imihije mae. Lantas palentah i Yosua aijo' binaumo nu aha.

⁷Tumpu notataemo hi Yosua, “Otampu'uni sinaa aiya beleyum Ku potimbalimo mian daka', sahingga iwi-iwi' na mian nu Israel mongadatimo beleyum ka' nusumbu'mo nu aha na Aku aiya saja' monsangalui beleyum susumo Aku nonsangaluimo mae i Musa.

⁸Uuka aiya palentahmo na to ima-imam anu molemban Peti' Palajanjian aijo', da salatan tokamo na aha i kaunyo aha lumolongmo i kaunyo aijo' ka' tuminjo koko sonibinyo.”

⁹Lantas i Yosua nolagamo mian nu Israel haha aijo', ka' notatae, “Po'uuka mae ka 'potombihing apaa na anu pinalentahkonmo nu Tumpu nu belemiu hi belemiu.

¹⁰De belemiu mokiijo'mo mongahopimo aha, matantumo na Tumpu molaa'mo aha mian nu Kana'an, Het, Hewi, Feris, Gergasi, Amori tiba Yebus. Ka' salatan Peti' Palajanjian nu Tumpu hau-haunyomo motaap i Kaunyo nu Yordan mamba momona, lantas belemiu imihi-mihije otoamo nu belemiu na Tumpu Allah anu tumuu' atina' hi belemiu.

¹²Uuka aiya pompile'imo na belemiu sampulu' ka' ohua' na mian toto samian anu o ala hi tulunan nu bansa Israel.

¹³Jadi de saidi' mae to ima-imam anu molemban Peti' Palajanjian nu Tumpu mompeja'mo na tengkenyo Kaunyo nu Yordan aijo', ueenyo madi'mo mo'ili, uee anu lengkat mae i matanyo tongompomo i sa'angu' na tampat.”

¹⁴Tempo'nyo aitu hau-haunyo pongalapanmo isi nu ale', ka' susumo anu saja'mo jadi Kaunyo nu Yordan mosawe'mo. Salatan aha mian nu Israel nompala'imo pinombauan nu aha kemah ka' motaapmo i Kaunyo nu Yordan, to ima-imam na i lumajang namba momona nomboa Peti' Palajanjian. Ka' salatan to ima-imam mompopeja'mo tengkenyo i kaunyo,

¹⁶tempo'nyo aijo' uee aijo' madi'mo mo'ili. Majo'on hondo aita' mae i sasu matanyo, ueenyo nosa'angu'mo i Adam sa'angu' na kota anu i sasu kota Sartan. Uee anu sasu tuntulannyo anu mo'ili mokaiyong i Ambai Mate suele madi'mo ahi' no'ili, sahingga aha mian nu Israel notaapmo i tano' anu notismo anu mompaha ahop kota nu aha Yerikho. To ima-imam anu nolemban Peti Palajanjian aijo' tataap tinuminjo i totonga' nu kaunyo sahingga iwi-iwi' na aha mian nu Israel tinokamo aijo' mae i santoanyo.