Read Saluan YOSUA 5 Bible Online

YOSUA 5 - Saluan bible

YOSUA 5

¹Iwi-iwi' na tomundo nu aha Amori i sasu kinsoban Kaunyo nu Yordan, ka' iwi-iwi' na tomundo nu aha Kana'an i sonibi nu Ambai Totonga'nyo nohongomo tukoonyo Kaunyo nu Yordan pinoti'imo nu Tumpu salatan mian nu aha Israel notaapmo i kaunyo aijo'. Sahingga aha nabuhukmo hi mian nu aha Israel ka' i lakatnyomo.

²Tempo'nyo aitu Tumpu notataemo hi Yosua, “Ala na batu ka' obau piso', ka' baumo mule' na adat ponsunatan hi aha mian nu Israel.”

³Sahingga binaumo i Yosua na palentah nu Tumpu ka' nonsunatmo aha mian nu Israel haha aijo' i tampat anu sinanggohanmo Bungkutnyo nu Pinonsunatan.

⁴ Tempo'nyo aha mian nu Israel haha aijo' nosabatmo mae lengkat i Mesir, to momo'ane iwi-iwi' polo'mo sinunat. Panyo salatan aha lewa'mo jinojoong ka' nonsongkohimo tampat anu ewa hondo na bone'nyo pinatompulu' na taun na kinopinnyo, to ana-anak mo'ane nu aha mau samian ma'isa ko anu sinunat. Ka' salatan pinatompulu'mo na taun aijo', to momo'ane anu tempo'nyo nosabatmo mae lengkat i Mesir umunnyo anu timbalimo minsoop suludadu iwi-iwi' sinilakamo, kalana madi' mombatuki palentah nu Tumpu. Sahingga susumo anu sinumpa'akonmo nu Tumpu aha madi'mo timbali opobee' montoa lipu' anu pohumpakan ka'ima'an ka' ma'omuk anu jinanji'-Nyomo hi Mompolee' nu aha.

⁷Mokonyo aijo' iwi-iwi' na anak mo'ane nu aha ma'isa sinunat. Aha anu i salapisan aijo' na sinunat i Yosua.

⁸Salatan aha pinoko sunatmo iwi-iwi' aha jinojoongmo i kemah nu aha sampe bela nu aha na'alinmo.

⁹Tumpu notataemo hi Yosua, “Sinaa aiya ka'ambangan nu belemiu salaku to posa-posaihon kiijo' mae i Mesir ingalinakon-Kumo.” Mokonyo aijo' sinanggohanmo Gilgal na tampat aijo' sampe sinaa aiya.

¹⁰ Hau-haunyo aha binakemahmo i hatanyo nu Gilgal madi'mo majo'on lengkat i Yerikho, aha mian nu Israel nolame'akonmo Paskah mamalom tanggal sampulu' ka' opat i bitu'on aijo'.

¹¹Dodododopnyo anu ai-aituje na aha nongkaanmo kaanon isinyo nu ale' nu lipu' Kana'an aijo'mo: roti anu madi' ko raginyo ka' gandum anu pinanggang.

¹² I sinaa aijo' suele manna' madi'mo daagi' nanabu' lengkat mae i langit, ka' aha mian nu Israel madi'mo nongkaan manna'. I sinaamo aijo' na aha nontampu'uni nongkaan isi nu ale' nu Kana'an.

¹³Daagi' kino sansinaan i Yosua kiijo' mae madi' majo'on lengkat i Yerikho. Monti-montik ia nontoamo samian na mo'ane tinuminjo i ahopnyo ka' bajaknyo kineatnyomo. I Yosua nongohanimo mian aijo', ka' nompokilawa, “Beleyum aiya sangalu, kabai sampobali'?”

¹⁴“Misa sangalu, ka' mule' misa' sampobali',” tinaaman nu mian aijo'. “Aku mo'uuka mae salaku kapala nu suludadu nu Tumpu.” Nohongo aijo' i Yosua nalia-lia' tinolodadupu ka' nonsombah mian aijo'. I Yosua notataemo, “Aku aiya posaihon nu Tumpu. Apaa na anu timbali ku bau hi belento Tumpu?”

¹⁵Kapala nu suludadu nu Tumpu aijo' nontaami, “Ukatakon na sapatu nu beleyum; tano kinatinjoan nu beleyum atina' tano' anu susi'.” Sahingga i Yosua nongukatakonmo sapatunyo.