Read Saluan YOSUA 8 Bible Online

YOSUA 8 - Saluan bible

YOSUA 8

¹Tumpu notataemo hi Yosua, “Posihuk mae na suludadu nu beleyum iwi-iwi', ka' lako'mo tiba aha mamba i Ai. Boli hente na kinyonyoa ka' boli mabuhuk! Ku bee'mo hi belemiu na tomundo nu Ai, kalana opatundu'mo nu belemiu na aha. Layatnyo, kota'nyo, lipu' nu aha opatundu'mo nu belemiu.

²Ai ka' tomundo'nyo tionyo ahi' nu bau susumo beleyum nombaumo Yerikho ka' tomundo'nyo u'utu mae. Panyo uuka aiya to bala-balang nu aha ka' potuu'onnyo timbalimo o ala nu belemiu, belemiumo na tumpunyo. Paha potoukamo da mambamo montumbuhi kota aijo' opotolokengkeng lengkat mae i hikunyo nu kota aijo'.”

³Sahingga i Yosua nompotoukamo mamba i Ai hingga-hinggat tiba suludadunyo iwi-iwi'. Ia nompile'imo 30.000 na suludadu anu makolit na mahampate, lantas nonsaimo aha mamba pihi-pihi,

⁴ka' nombee'imo palentah hi aha sumo uuka, “Paninsuluk pe'e i sambiha' nu kota aijo', panyo boli talalo majo'on; ka' potoukamo na montumbuhi.

⁵Aku ka' suludadu anu monsangalui aku na mongohanije kota aijo'. De aha mian nu Ai mosabatmo mae mongewa kami, kami tolosule'mo ka' mopalai susumo u'utu mae.

⁶Aha tantu mololoi'mo mae kami sampe majo'onmo lengkat i kota aijo', ka' tantu kokoonyo nu aha kami mopalaimo susumo u'utu mae.

⁷Ikiijo'je na tempo'nyo belemiu tionyo ahi' mosabatmo mae i paninsulukan nu belemiu, ka' otumbuhimo sampe kota aijo' ohungku'imo. Tumpu Allah nu belemiu mombee'mo hi belemiu.

⁸De opoko hungku'imo papuimo na kota aijo', susumo anu pinalentahkonmo nu Tumpu. Sumo aijo' na beleyum mombau.”

⁹Lapas aijo' i Yosua nonsaimo aha ka' aha nambamo natisuluk i sasu kinsoban nu Ai olotnyo nu Ai ka' Betel, lantas nompopea'mo ikiijo'. Panyo i Yosua daagi' nale i kemah nu aha mian Israel.

¹⁰Daagi' subu-subu hondo i Yosua nobulamo ka' nompalentahmo suludadunyo da sihukmo mae. Lapas aijo' ia ka' to pola-polaya' nu aha mian Israel nomboamo suludadu haha aijo' namba i Ai.

¹¹Suludadu haha aijo' tiba i Yosua i lumajang nompatui sabatan daka' kota Ai, lantas binakemahmo i sasu utara, ikiijo' daagi' ko bangka'nyo mongoloti aha tiba kota aijo'.

¹²Konjoo'nyo kila-kila 5.000 na mian anu pinokaunyomo natisuluk i sasu kinsoban kota aijo' olotnyo nu Ai ka' Betel.

¹³Jadi pinongatun suludadu anu montumbuhi aijo' binau sumo uuka: gombuan nu suludadu anu otaha'imani hondo pino'una' i sasu utara kota aijo' ka' gombuannyo sangga'at pino'una' i sasu kinsoban lantas i Yosua namba i bangka'nyo pihi-pihimo aitu.

¹⁴Salatan i tomundo Ai nontoamo suludadu anu monsangalui i Yosua, ia sampamo lia-lia' nogogia'. Ia ka' iwi-iwi' na mian nosabatmo ka' nambamo i bangka'nyo nu Yordan da montumbuhimo aha mian nu Israel i tampat anu u'utu mae. Ia madi' monsumbu' saba' gagana' uuka ia otumbuhimo lengkat mae i hiku nu kota.

¹⁵I Yosua ka' suludadunyo anu monsangalui ia nombaumo susumo au'aitu aha tolosule'mo; aha nalaimo namba i da'erah anu padangnyo mateges hondo.

¹⁶Iwi-iwi' na to momo'ane i kota Ai pinalentahmo da mololoi' i Yosua ka' suludadunyo aijo'. Panyo aha salolo-loloi'nyo i Yosua, ola ahi' mompaka pajo'on mo na aha i kota nu aha.

¹⁷Iwi-iwi' na aha mian nu Ai nosabatmo mololoi' aha mian nu Israel sahingga kota aijo' pinobakasmo tuhe-tuhea' madi'mo ko anu nontamongi.

¹⁸Lapas aijo' Tumpu notataemo hi Yosua, “Tangkakonmo na talombo'um ka' popatu mokiijo' i Ai; kota aijo' Ku bee'mo uuka aiya hi beleyum.” I Yosua nombaumo palentah nu Tumpu aijo'.

¹⁹Salatan tinangkakonmo i Yosua na limanyo, suludadu anu natisuluk aijo' sampamo lako' nontumbuhi kota aijo', lantas pinatundu'mo nu aha. Ka' balomo pinapuan nu aha na kota aijo'.

²⁰Mian nu Ai haha aijo' nosiloi i hiku, ka' nontoamo tibuk kinopuha-puhamo nokiita' i langit. I Yosua ka' gombuan nu suludadunyo suele nontoamo tibuk ka' nonsumbu'mo taalu' gombuan nu suludadu sangga'at nompatundu'mo ka' nongalamo kota aijo'. Jadi ninsusule'mo na i Yosua tiba gombuan nu suludadunyo montumbuhi ka' mompateimo aha mian nu Ai. Aha mian nu Israel anu ikiijo'mo i kota Ai suele tinokamo mae ka' nompahampateakonmo sahingga mian nu Ai kinalimpunganmo nu aha ka' madi'mo noko popalai, iwi-iwi' i nate pinatean nu aha mian Israel,

²³ola i tomundo nu aha Ai yo madi' pinatean. Ia i hakop ka' binoa nangadap hi Yosua.

²⁴Noko lapas na gombuan nu aha suludadu Israel nompatei ingko-ingkot suludadu nu sampobali' anu nololoi' aha i padang mateges, ninsusule'mo na aha nokiijo' i Ai, ka' nompatei iwi-iwi' na mian anu kiijo' mae.

²⁵I Yosua sabole-bolemo saja' nontangkakon talombo'nyo sasu mokiijo' i Ai, ka' madi'mo nontau'akon limanyo sampe mian haha aijo' i Ai pinateanmo iwi-iwi'. I sinaamo aitu na i nate iwi-iwi' na anu jojoong i Ai konjoo'nyo 12.000 na mian, to momo'ane ka' to bou-boune.

²⁷Potuu'on ka' to bala-balang anu i humpak i kota aijo' ingalamo nu aha mian Israel baumo anu nu aha, susumo anu pinoto'imo nu Tumpu hi Yosua.

²⁸I Yosua nompapuimo Ai ka' nompojohokmo tinimbalimo tambulan nu abu' sampe tempo' uuka aiya.

²⁹Tomundo nu kota aijo' sinegot ka' pinokalayo'mo i kau' anu pinototon ka' pinojohokmo ikiijo' sampe mamalom. Salatan sinaa nakakinsapmo, i Yosua nompokaumo mian da mongala bangke'nyo aijo' ka' ingalinmo i ahop nu sabatan daka' nu kota. Lapas mae aijo' tinambulanmo nu batu manjo-manjoo' hondo. Batu haha aijo' daagi' kiijo' sampe tempo' uuka aiya.

³⁰ Lapas aijo' i Yosua nompotinjomo sa'angu' na mezbah i Bungkutnyo nu Ebal bau ponsomban Tumpu Allah nu Israel.

³¹ Mezbah aijo' binaunyo susumo anu pinotiju'mo i uno nu Kitab i Musa, posaihon nu Tumpu aijo', hi aha mian nu Israel; “Sa'angu' na mezbah kaho batu na binau anu ma'isa toho' binau pa' apaa nompake pakakas besak.” I mezbah aijo' aha mian nu Israel nonsombahkonmo hi Tumpu; koloban anu opotunu ka' suele koloban bau pompodame aha.

³²Ikiijo' mae, sinakisian nu aha mian Israel i Yosua nontulismo i batu mezbah aijo' anu tinihonyo i atulan iwi-iwi' nu Tumpu anu daagi' i uno nu Kitab i Musa.

³³ Aha mian nu Israel tiba to pola-polaya', to kapa-kapala nu suludadu, to mia-mian kopian, ka' suele to mia-mian anu lengkat mae i salipu'an anu jojoong ikiijo' hi aha, tinuminjomo i sambiha' ka' sambiha' nu Peti' Palajanjian nu Tumpu mongahopi to ima-imam Lewi anu molemban Peti' Palajanjian aijo'. Sambagian na mian haha aijo' mongahopi Bungkutnyo nu Gerizim, ka' sambagian mule' mongahopi Bungkutnyo nu Ebal. I Musa posaihon nu Tumpu aijo', nompalentahkonmo da aha mombau han anu sumo aijo' de tokamo na tempo'nyo aha mohumpakmo balakat anu jinanji'mo nu Tumpu.

³⁴Lapas aijo' binasa'mo i Yosua daka-daka' na atulan iwi-iwi' susumo anu tuli-tulis i Kitab nu Atulan, tibamo iwi-iwi' na balakat ka' iwi-iwi' na pongkutuki.

³⁵Batu-batu palentah i Musa binasa'akonmo i Yosua hi aha iwi-iwi' mian Israel anu sinihuk ikiijo' tibamo to bou-boune, to ana-anak, ka' to mia-mian anu lengkat mae i salipu'an anu jojoong kiijo' hi aha.