Read Saluan 2 TESALONIKA 1 Bible Online

2 TESALONIKA 1 - Saluan bible

2 TESALONIKA 1

¹ To Utu-utus jama'at i Tesalonika, anu tinimbalimo mian anu pinalesayamo hi Tumpu Tuumanto ka' hi Tumpu Yesus Kristus! Kami, aitumo i Paulus, i Silas ka' i Timotius

²montaha'imani ka' mongamalakon hi Tumpu Tuumanto, ka' hi Tumpu Yesus Kristus mombee'ije balakat ka' ka'ima'an hi komiu.

³To Utu-utus, kami saja' tionyo montaloakon talima kase hi Tumpu kalana komiu. Ka' konanyomo na kami mombau sumo aijo', kalana komiu nompaka palesayamo hi Kristus, ka' komiu lebemo nompaha kali-kalibosimo samian ka' samian.

⁴Mokonyo aijo' kadaka' kami saja' monsisik komiu, de kami mambamo molenga to jama-jama'at nu Tumpu. Obuulakon kami na monsisik mosia na komiu tataap mahoson na palesaya hi Kristus i uno nu ponsakisa'an ka' kasansala'an anu ingoa'anmo miu.

⁵Ka' aiyamo na kanyata'annyo mosia na ko adinnyo na Tumpu Allah momputusi: Komiu nongoa'imo kasansala'an kalana Dunia Bu'ou nu Tumpu, ka' kalana aijo' komiu timbalimo pantas minsoop i unonyo.

⁶Ia mombaumo apaa na anu adin, ka' tionyo mombalosakonmo kasansala'an hi mian anu nonsansalamo komiu.

⁷Ka' hi komiu anu uuka aiya nongoa'imo kasansala'an — sumo aitu mule' hi kami — Tumpu mombee'je kasanangan de Sinaanyomo nu Tumpu Yesus minsusule'mo mae lengkat i suluga' ka' mompotoamo butong-Nyo tiba to mala-malaikat-Nyo anu to babaani

⁸ka' ko apunyo anu balea-leak. Ia mintau' da mohukum to mia-mian anu madi' mompajuli Tumpu, ka' anu madi' ka'oho' tumuu' sosok tiba Lele Ma'ima' mongkona i Yesus Tumpunto.

⁹ Mian haha aijo' montalimamo hukuman kapatean anu sampe toka sidu-sidutu', nu alinmo nu Tumpu i sambiha'nyo ka' nusabatakonmo i kuasa-Nyo anu talasanggo;

¹⁰iwi-iwi' aijo' timbalimo de sinaa katokaannyomo da Ia opopodaka'mo nu mian-Nyo anu palesayamo, ka' o'angga'imo nu iwi-iwi' mian anu pinale sayamo. Komiu suele pinonsoopmo i kiijo' hi mian anu palesayamo hi Tumpu aijo', kalana komiu pinalesayamo i lele anu pinotokamo mami hi komiu.

¹¹Mokonyo aijo' kami saja' mondo'akon komiu. Kami balado'a da Tumpu mompotimbali komiu moko ala tumuu' mombatuki pongka'oho'-Nyo, kalana makisut aijo' sahingga Ia nolagamo komiu. O amalakon da Tumpu mongkuasai komiu mombatuki pongka'oho'nyo da mombau anu ma'ima' ka' mompokopiani iwi-iwi' na kalajanyo anu binaumo miu kalana pinalesayamo hi Kristus.

¹²Tiba jalan anu sumo aijo' Tumpunto i Yesus opopodaka'mo miu, ka' komiu mule' nupopodaka'mo i Yesus kalana kanonongan nu kinyonyoa nu Tumpunto ka' Tumpu Yesus Kristus.