Read Saluan 2 TIMOTIUS 3 Bible Online

2 TIMOTIUS 3 - Saluan bible

2 TIMOTIUS 3

¹O inau' na aiya: I sinaa anu imihinyo mae manjoo'mo hondo na kasusa'annyo.

²Mian mosi pentingkanmo butongnyo, me saja' mongkamata doi, kobubuun ka' mongka'ima'i sisik anu madi' kogunanyo. Aha mongka'ima'i mompopo'ise' mian, panggaga hi tuumanyo, madi' monsumbu' montalima kase ka' mongka'ideki hahan rohani.

³Aha madi' mongkalibosi sangko mian, madi' mongka'ima'i mongampuni, aha mongka'ima'i mombusi-busiki sanggo nu mian sangga'at, mongka'ima'i mompakisa, aha masigo ka' madi' mongka'ima'i ka'ima'an.

⁴Aha lebe mongka'ima'i mongkabisa'i, mohangka-hangkat posi butong, ka' madi' mimpikilan mantan. Aha lebe ma'ima' mongka'ima'i kasanangan nu dunia, panyo aha madi' montuluti Tumpu.

⁵Mau mule' otoa aha tulu-tulutan mompojalan apaa na koonyo nu agama panyo madi' montalima isinyo nu agama anu sahondo-hondonyo aijo'. Opimpali na to mia-mian anu sumo aijo'.

⁶Daagi' ko anu kiijo' hi aha anu ninsoopmo i to lai-laigan, lantas nonggodamo to bou-boune anu ma'isa talalo palesaya ka' manjoo' hondo na dosa', ka' kinuasanmo nu ngangahan na anu oka'ima'i.

⁷To bou-boune haha aijo' sapoi-poitanyo da o ajan, panyo madi' moko ala monsumbu' ajalan anu totu'u, anu lengkat mae hi Tumpu.

⁸ Susumo i Yanes ka' i Yambres nongewa' i Musa naipuan mae, sumo aitu mule' na mian haha aijo' mombahakon ajalan anu lengkat mae hi Tumpu. Pikilan nu aha na'idekanmo, ka' palesaya nu aha madi'mo nintuus.

⁹Panyo madi' ko anu nu pihumpa-humpak nu aha, kalana kaponga'an nu aha nu sumbu'mo nu mian iwi-iwi', sumomo anu ingoa'an i Yanes tiba i Yambres suele.

¹⁰Panyo beleyum nontulutimo to aja-ajalanku, kalakuanku, ka' patuju nu kantumuu'anku. Beleyum nosi toamo mosia na aku totu-totu'u palesaya hi Yesus Kristus ka' mongkalibosi sangko mian. Beleyum mule' monsumbu' kasabalan ka' kahosonan nu kinyonyoangku.

¹¹ Beleyum nontoamo aku kinabisa'anmo ka' aku sinansalamo. Beleyum nonsumbu'mo iwi-iwi' apaa na anu jinadimo hi butongku i Antiokhia, i Ikonium, ka' i Listra; ka' beleyum nonsumbu'mo iwi-iwi' anu ingoa'ankumo! Panyo Tumpu nomposalamatmo aku i han iwi-iwi' aijo'.

¹²Memang iwi-iwi' mian anu mongka'oho' tumuu' monsombah ka' tumuu' mosa'angu' tiba i Kristus Yesus saidi' mae okabisa'i,

¹³sadangkan to mia-mian anu ma'idek ka' to mia-mian anu mongakali mompaka pa'idekmo. Aha mongakali mian sangga'at padahan posi aha suele o akali.

¹⁴Panyo mongkona beleyum Timotius, tionyo ahi' beleyum tataap mintoong i aja-ajalan anu totu'u anu ingajanakonmo hi beleyum ka' nu palesaya totu-totu'u; kalana beleyum nonsumbu'mo ihe na to gulu-gulu' nu beleyum.

¹⁵Beleyum tionyo ahi' monginau', saba' daagi' pe'e ise' beleyum nonsumbu'mo Kitab nu Tumpu. Kitab nu Tumpu aijo' timbali mombee'i beleyum pangalati'an da mohumpak kasalamatan montului jalan palesaya hi Kristus Yesus.

¹⁶Iwi-iwi' anu tinulismo i uno nu Kitab nu Tumpu anu binee'mo nu Tumpu da ogunakon mongajan anu totu'u, da mompokinde'i ka' mompoko'ima'i anu sala', ka' mongajan mian da tumuu' montuluti pongka'oho' nu Tumpu.

¹⁷Tiba Kitab nu Tumpu aijo' mian anu mombau palentah nu Tumpu aijo' mohumpakmo ilimu' anu sukup anu ogunakon ingangahan nu pakalaja'an anu ma'ima'.