Read Saluan FILEMON 1 Bible Online

FILEMON 1 - Saluan bible

FILEMON 1

¹Utusku i Filemon, sangalu sampo kanaya mami! Aku, i Paulus mian anu tinalungku'mo kalana i Kristus Yesus, tiba Utusto i Timotius, nontulismo sulat aiya toka hi beleyum

² ka' hi jama'at anu silimu' i laiganum; ka' suele hi utusto boune, i Apfia ka' sangalu sampo usahanto, i Arkhipus.

³Kami montaha'imani ka' mongamalakon da Tumpu Tuumanto ka' Tumpunto i Yesus Kristus mombee'i balakat ka' ka'ima'an hi beleyum.

⁴De aku balado'amo ku sanggo na sanggo nu kita Utus ka' montalima kase hi Tumpu.

⁵Kalana i hongongkumo, taalu' kita Utus totu-totu'u pinalesayamo hi Tumpu Yesus ka' mongkalibosi iwi-iwi' mian anu pinalesayamo hi Tumpu.

⁶Aku balado'a mongamalakon da poto utusanto salaku to mia-mian anu pinalesayamo mohasinakon pangalati'an lebe daka' i iwi-iwi na balakat anu daagi'mo hi kita kalana nosa'angu'mo tiba i Kristus.

⁷Utusku i Filemon, kalibosanum kona hi iwi-iwi' mian anu palesaya hi Tumpu nompolame'mo aku, ka' nongkakeha'imo aku! Iwi-iwi' mian anu pinalesayamo hi Tumpu i lame'mo kalana kita Utus.

⁸Mokonyo aijo', salaku mian anu moto utus anu sa'a-sa'angu' na kapalesaya'an, aku timbali ahi' mompalentah kita Utus da mombau apaa na anu tionyo obau nu kita Utus.

⁹Panyo kalana aku mongkalibosi kita Utus, aku ola ahi' momoita. Aku aiya samian na tu'anyo ka' uuka aiya hau-haunyo i unomo nu talungku', kalana i Kristus Yesus.

¹⁰ Aku, i Paulus, mompotoka sa'angu' na poitaon hi beleyum mongkona i Onesimus, anakku kalana i Kristus. Kalana i uno nu talungku' aiya, aku tinimbalimo tuuma nu rohaninyo.

¹¹U'utu mae ia madi'mo kino gunanyo hi beleyum, panyo uuka aiya ia kino gunanyomo, misa' ola hi beleyum, panyo suele hi belengku.

¹²Uuka aiya mian anu ku kukalibosi aijo' po'ule'mo sinaingku mamba hi beleyum.

¹³Sabenannyo kahanda'mo ku tewa'na ia da jojoongmo tiba aku salaku pombolosi beleyum da ia timbali montulungi aku, hau-haunyo daagi' i uno nu talungku' aiya kalana mompolele Lele Ma'ima' anu lengkat mae hi Tumpu.

¹⁴Panyo aku madi' mongka'oho' mombau apa-apaa de kita Utus ma'isa monsitujui mae. Aku lebe mongka'ima'i de kita Utus montalima ia ka' halata' ahi' na kinyonyoaum; aku madi' mongka'oho' mompakisa beleyum.

¹⁵Kugantang i Onesimus madi'mo jinojoong hi kita Utus tino pia-pian tempo' da kita Utus timbali po'ule' mule' mohumpak ia minsusule'mo ka' jojoonganmo sidu-sidutu'.

¹⁶Uuka aiya ia misa'mo ola timbali posaihon nu kita Utus; ia misa'mo ola sumo aijo'. Ia atina' sangko mian Kristen anu okanonongi. Ia kinogunanyo hondo hi belengku, lebe-lebe mule' hi beleyum! Tantu ia ko gunanyo hondo salaku posaihon ka' mule' salaku mian anu noto utusmo hi Tumpu!

¹⁷Mokonyo aijo', kalana kita Utus monganggapmo aku sangalu sangko kita Kristen, po'ule'mo talimakon na i Onesimus pokakana sumo kita Utus montalima aku.

¹⁸De ia ko kasala'an kabai ko samaya' hi beleyum, bakas akuje na montanggungiakon iwi-iwi' aijo'.

¹⁹Jadi, akumo na montulis i aiya: Aku, i Paulus mombayalije bau polunasi iwi-iwi'. (Tantu madi'mo palalu ku po'ingat, na kita Utus ko samaya' hi belengku, aijo'mo kantumuu'anum anu bu'ou salaku mian Kristen.)

²⁰Mokonyo aijo', i uno nu sanggo nu Tumpu soba tulungi mae na aku, polame'akon mae na kinyonyoangku salaku anu moto utus hi Kristus.

²¹Aku nontulis sulat aiya kalana ku palesaya hondo na kita Utus tantu mombauje apaa na anu pinoitangkumo. Ka' kusumbu' tantu kita Utus mombauje anu lebe molingkudui aijo'.

²²Ka' mule', tulungi posadiai salipi' na aku i laiganum, kalana kutaha'imani Tumpu montalimakonmo iwi-iwi' na do'a nu to Utu-utus ka' po'ule'mo momboa aku minsusule' hi belemiu.

²³ I Epafras, anu aiya sama-sama tiba aku i uno nu talungku' kalana i Kristus Yesus, nompakatu salan do'anyo hi beleyum.

²⁴ Talimakon suele na salan do'a nu to sanga-sangalungku: i Markus, i Aristarkhus, i Demas ka' i Lukas.

²⁵O'amalakon da Tumpunto i Yesus Kristus mombalakati komiu. Tabea' mami, I Paulus 1