Read Saluan IBRANI 1 Bible Online

IBRANI 1 - Saluan bible

IBRANI 1

¹Tempo'nyo naipuan mae Tumpu ola saja' basisik hi mompolee'to nupotoka nu to nabi-nabi ka' mompake ngangahan nu anu obau.

²Panyo tempo' uuka Ia basisik hi kita, Anak-Nyomo na mompotoka hi kita. Anak-Nyomo aiya na nombau pakalaja'an nu Tumpu nompotimbali dunia aiya songko-songko. Ka' suele Tumpu nontantukanmo tukoonyo Anak-Nyomo aiya na mohaki iwi-iwi'.

³Iamo na mompotoa katalasanggoan nu Tumpu anu talalo hondo ko angga'nyo; Iamo na gambalan nu butong nu Tumpu anu manasa hondo. Iamo suele na mompotuu' kahosonan nu songko-songko na dunia aiya nu potatae-Nyo anu talalo hondo matangkas na kuasanyo. Noko lapas na Ia nontokong mian da madi'mo nukona nu hukuman nu dosa' na aha, Ia sinumuhangmo i kasuhangan kiita' i suluga' hingga-hinggat tiba Tumpu Anu Matangkas na kuasanyo.

⁴Anak aijo' nohumpakmo pangkat anu lebe matangkas molingkudui malaikat ka' sanggo anu binee' nu Tumpu hi Ia suele lebe o'angga'i molingkudui sanggo anu binee' hi malaikat.

⁵ Madi' toho' Tumpu notatae sumo uuka hi samian pe'e na malaikat; “Beleyumo na Anak-Ku; sinaa aiya Aku timbalimo Tuuma nu beleyum.” Ka' mule' madi' toho' Tumpu notatae sumo uuka mau mule' kona hi malaikat anu pa' iyamae, “Akumo na timbali Tuumanyo, ka' ia timbalimo Anakku.”

⁶ Panyo tempo'nyo Tumpu nonsai mae Anak-Nyo tumpe-tumpe toka i dunia aiya, Tumpu notataemo sumo uuka, “Iwi-iwi' na malaikat nu Tumpu patut monsombah Anak aijo'.”

⁷ Kona hi aha to mala-malaikat, Tumpu notataemo sumo uuka, “Tumpu mompotimbali to mala-malaikat-Nyo sumo mombuun, ka' to posa-posaihon-Nyo moak sumo apu.”

⁸ Panyo hi Anak aijo', Tumpu notatae, “Kalaja'an nu Belento, o Tumpu, sangkutnyo sampe toka sidu-sidutu'! Kapalentahan nu Belento atina'mo na kapalentahan anu adin.

⁹Belento mongka'ima'i ka'adilan ka' mongka'ideki anu tageo; mokonyo aijo' Tumpu, Tumpu nu Belento, nompile'imo Belento ka' nombee'imo Belento da o'adati anu mompodaagi' kabilahian, molingkudui to sanga-sangalu nu Belento.”

¹⁰ Tumpu notatae mule', “Belento, Tumpu, momonanyo nompotimbalimo dunia, ka' posi Belento na nompotimbalimo langit.

¹¹Iwi-iwi' aijo' tionyo lanyap, ka' timbali mahude sumo baju'; panyo Belento madi' mongabali'.

¹²Songko-songko na dunia aiya nu tapi' sumo baju', ka' sangga'atje na bau pombolosi nu Belento. Panyo Belento madi' toho' mongabali', ka' kantumuu'an nu Belento madi' ko kamingkotannyo.”

¹³ Tumpu madi' toho' notatae hi samian pe'e na malaikat sumo uuka: “Suhangmo i sasu koanan-Ku, sahingga anu mompaha bali' belento Ku popatundu'mo hi belento.”

¹⁴Desumo aijo', to mala-malaikat haha aijo' ihe ahi' na sabenannyo na aha? Aha aijo'mo na to roh-roh anu mombau apaa na anu nu pokauhakon nu Tumpu, ka' anu nu palentah nu Tumpu Allah, da montulungi to mia-mian anu mohumpak kasalamatan.