Read Saluan IBRANI 12 Bible Online

IBRANI 12 - Saluan bible

IBRANI 12

¹Yo de hi kita, manjoo' hondo aiya hi kita na sakisi! Kalana aijo', imbo' da o'alintomo iwi-iwi' na anu mompiboati ka' dosa' anu saja' maningkampit hi kita. Ka' imbo' na kita da sabaan na mombatuki baku lebee anu aiyamo i ahopto.

²Anu otoanto tionyo saja' hi Yesus, kalana Ia na mompodaagi' imanto, ka' monjagai ka salatan pe'e i moonanyo toka-toka i mihinyo. I Yesus nongintimmo sakisa i kau' salib! Madi' pinajulannyo na Ia silaka i kau' salib aijo' salaku sa'angu' na han anu mongambangi. Ia ola monginau' kalame'an anu nu oa'ije i mihinyo mae. Uuka aiya Ia sinumuhangmo i sasu koanan nu kasuhangan nu Tumpu ka' mompalentahmo hingga-hinggat tiba Ia.

³Soba potutugakon mosia na kosakisanyo na i Yesus nongahopimo to mia-mian baladosa' anu nongka'idekimo hondo ka' nongewamo Ia. Kalana aijo' boli ise-ise' na kinyonyoa ka' boli bata-bata.

⁴Kalana i uno nu usaha nu beleyum mongewa dosa', komiu ma'isa toho' kino iman sumo aijo' sampe baso' tionyo jinujuhakonmo.

⁵ Ka' boli mongkolilimi pokinde' nu Tumpu aiya, anu binee'mo hi beleyum salaku to ana-anak-Nyo: “Anak-Ku, o intomakon ima-ima' na pangajalan nu Tumpu, ka' boli ise-ise' na kinyonyoa de Ia montambuha'imo beleyum.

⁶Kalana Tumpu mompokinde'i, batu-batu mian anu Nu kalibosi, ka' Nu pohos na batu-batu mian anu Nu akui salaku anak-Nyo.”

⁷Komiu tionyo ahi' montalima pompohos nu Tumpu salaku sa'angu' na pangajalan anu lengkat mae hi samian na tuuma. Kalana te madi' toho' samian na anak nu hukum nu tuumanyo?

⁸De komiu madi' o hukum suele susumo anak-Nyo iwi-iwi' sangga'at aiya, aijo' nyata'mo saba' komiu misa' anak-Nyo totu-totu'u, panyo anak bule anu madi' o akui salaku anak-Nyo totu-totu'u.

⁹Kita ko tuuma i dunia. Ia mompokinde'i kita, da kita mongangga'i ia. Jadi sumo aitu mule' kona hi Tuuma nu rohaninto anu i suluga', tantu kita tionyo lebe mule' tulu-tulutan hi Ia da kita tumuu'.

¹⁰Tu'anyonto i dunia mompokinde'i kita madi' sampe toka sidu-sidutu', ola iya na anu nu oa'i nu aha ma'ima'. Panyo Tumpu Allah mompokinde'i kita da bau ka'ima'anto da kita timbali susi' hingga-hinggat tiba Ia.

¹¹Memang tempo'nyo kita pinokinde'an hukuman aijo' madi' momposanang kinyonyoanto, panyo ola monsakiti kinyonyoa. Panyo lapas mae na aijo', kona hi kita anu pinokinde'anmo hukumanmo aijo' na monsabapi kita da tumuu' mombatuki pongka'oho' nu Tumpu Allah, ka' monta'upje ka'ima'an na kita.

¹² Kalana aijo', pohoson na limaum anu i lundengmo ka' buku nu beleyum anu i langkakatanmo aijo'!

¹³ Saja' lumajang i jalan anu mahata, da tengkeum anu pinengko'mo atina' madi' tonsubali, panyo ola da ma'alin.

¹⁴Bala usaha da tumuu' simbulu tiba to mia-mian. Ka' Bala usaha mule' da tumuu' susi', na palesaya hi Tumpu. Kalana madi' ko samian pe'e na moko ala montoa Tumpu de madi' ia tumuu' sumo aijo'.

¹⁵ Obala'ingati da boli ko samian na anu mosabat mompala'imo kalibosan nu Tumpu, da boli ko samian na anu timbalimo sumo hemput anu ko lasungnyo itina' hi komiu, sahingga monsaduakonmo kasusa'an ka' mongideimo mian da'isan nu lasungnyo.

¹⁶ Obala'ingati da boli ko anu tumuu' lewa' masala' kabai madi' mongangga'i hahan rohani, susumo anu binaumo i Esau. Pinobaluknyomo na haknyo salaku anak tumpe, ola kalana samangko' na anu o kaan.

¹⁷ Osumbu' miu saba' ilapas mae i Esau kino kahanda'mo da mohumpak balakat aijo' hi tuumanyo, panyo ia madi'mo tinalima. Kalana maumo i humaang na ia nolio jalan mompokopiani kasala'annyo, madi'mo daagi' ko kasampatan da mohumpak han aijo'.

¹⁸ To utu-utus madi' tinoka nangadap hi apa-apaa susumo anu pinangadapanmo nu bansa Israel naipuan mae. Aha nangadapmo hi apa-apaa anu timbali okanyang, aijo'mo Bungkutnyo nu Sinai tiba apunyo anu saja' moak, aha nangadapmo i kapintungan, hondomi' ka' antong;

¹⁹aha nangadapmo i onyi' nu tolompet, ka' lewo' nu potatae anu daka' hondo. Salatan to mia-mian nu Israel nohongomo potatae aijo', pinoitamo nu aha sabole-bole da potatae aijo' bolimo daagi' motatae mae hi aha.

²⁰ Kalana aha madi'mo moko ala montahan mohongo palentah anu pinotoka mae nu potatae aijo'. Kalana potatae aijo' nontaloakonmo, “Iwi-iwi' na anu mompeja' bungkutnyo aiya, madi' opajuli pa' aijo' binatang kabai pa' ihe, tionyo opahambunu'akon nu batu sampe ia silaka.”

²¹ Apaa na anu tinoamo nu mian Israel haha aijo', talalo ahi' hondo okabangangi sahingga i Musa notataemo, “Aku nabuhukmo ka' i lakatnyomo!”

²²Panyo mule', komiu tinokamo i Bungkutnyo nu Sion, ka' kota' nu Tumpu anu tumuu', aijo'mo Yerusalem anu i suluga', anu ko malaikatnyo momada-madala na konjoo'nyo.

²³Komiu mongatuhimo tampat kasingkabotan anu lame' hondo — kasingkabotan nu to ana-anak tumpe nu Tumpu, anu tinulismo na sanggonyo i uno nu kitab kiita' i suluga'. Komiu tokamo mangadap hi Tumpu, Mian Kopian nu mian iwi-iwi'. Komiu mongahopimo to roh-roh nu to mia-mian ma'ima', anu pinotimbalimo da na'ima'mo.

²⁴ Komiu tokamo mangadap hi Yesus anu Nonjambatanimo da montalimamo palajanjian anu sala'je aijo'; komiu mangadapmo i baso' anu pinipi'akonmo, anu mompokopianimo hahan da lebe ma'ima' molingkuduimo anu pinokopiananmo nu baso' i Habel aijo'.

²⁵ Kalana aijo', balajaga-jaga da boli komiu madi' mongka'oho' mohongo Ia anu notataemo aijo'. Aha anu madi' mongka'oho' mohongo Ia anu tinokamo i dunia ka' nompotokamo lele lengkat mae hi Tumpu Allah, madi' timbali da madi' palesaya hi Ia. Apaa mule' kita aiya anu nohongomo Ia, anu notataemo lengkat mae i suluga'! De kita madi' mongka'oho' mohongo Ia, iya na kita timbali o ampuni i kasala'an!

²⁶ Tempo'nyo aitu tano' tinasiagamamo kalana kahosonan nu potatae-Nyo. Panyo uuka aiya Ia binalajanji'mo, “Daagi' minsan na Aku po'ule' mompotasiaga, misa'mo ola tano', panyo mule' singkonamo langit.”

²⁷Potatae “daagi' minsan” mompoto'i saba' songko-songko na dunia anu pinotimbalimo, o gegut ka' o alini, da anu daagi' tontuha' ola anu madi' opoko ala o gegut.

²⁸Kalana aijo', kita tionyo ahi' montalima kase hi Tumpu, kalana kita montalimamo hi Ia sa'angu' na kalaja'an anu madi' tonggegut. Kita tionyo ahi' montalima kase ka' monsombah Tumpu, o angga'i ka' okabuhuk susumo anu pinoto'i-Nyomo ka' anu nu ka'ima'i.

²⁹ Kalana Tumpunto sumo apu anu montoyo'i.