Read Saluan IBRANI 3 Bible Online

IBRANI 3 - Saluan bible

IBRANI 3

¹To utu-utus bubuu' mian Kristen anu i lagamo suele nu Tumpu Allah! Soba popikilakon hondo-hondo na i Yesus aiya! Tumpu nonsaimo mae Ia samata-mata da timbali Imam Daka' i agama anu otoonginto.

² Ia tulu-tulutan hondo hi Tumpu anu nompile'imo Ia da mombau pakalaja'an aijo' susumo i Musa naipuan mae tinulu-tulutanmo apaa na anu pinokauhakon nu Tumpu obau i Laigan nu Tumpu.

³Panyo i Yesus pantas mohumpak pongangga'i anu lebe daka' molingkudui i Musa. Kalana mian anu mompotinjo laigan na tionyo lebe o'angga'i molingkudui laigan aijo'.

⁴Memang iwi-iwi' na laigan daagi' ko anu nompotinjo, panyo anu mompotinjo iwi-iwi na apaa atina'mo samata-mata Tumpu.

⁵I Musa tulu-tulutan hondo salaku posaihon i uno nu Laigan nu Tumpu ka' mompotokakon hahan anu nu poto'ije nu Tumpu Allah aiyamae i ahop.

⁶Panyo i Kristus tinulu-tulutanmo salaku Anak anu mompangakui kalajanyo i uno nu Laigan nu Tumpu. Ka' kita aiya atina'mo na Laigan nu Tumpu, de kita tataap daka-daka' na kinyonyoa ka' tataap palesaya totu-totu'u da mohumpak apaa na anu otaha'imaninto.

⁷ Kalana aijo', susumo koo-Nyo nu Roh nu Tumpu, “De sinaa aiya komiu mohongomo potatae nu Tumpu, bolimo komiu panggaga, susumo mompolee' miu, tempo'nyo aha notomuhukmo hi Tumpu, ka' nonsobaimo Tumpu i padang bone'.

⁹‘Kiijo' mae mompolee' miu nonsobaimo Aku, ka' nonguji'mo Aku’, na koo-Nyo nu Tumpu, ‘padahan aha nontoamo anu binaung-Ku patompulu' na taun na kinopinnyo.’

¹⁰Mokonyo aijo' Aku pinusamo hi aha ka' tinaloakon-Kumo, ‘Aha saja' madi' tulu-tulutan, ka' madi' mongka'oho' montuluti apaa na anu Kupalentahkon.’

¹¹Aku pinusamo ka' binasumpa'mo, ‘Aha madi' timbali minsoop i lipu' aijo' da mohumpak kajojoongan tiba Aku.’ ”

¹²To utu-utus, obala'ingati boli-boli daagi' ko anu itina' hi komiu samian na anu ko kinyonyoa ma'idek sumo aijo', ka' madi' palesaya totu-totu'u, sahingga ia po'ule'mo mobalik ka' matijo'onmo hi Tumpu anu tumuu'!

¹³Jadi, da madi' ko samian pe'e anu itina' hi komiu na nu akali nu dosa' sahingga panggagamo hi Tumpu, tionyo ahi' komiu mompaha poki-pokinde'i sansina-sinaa de kita daagi' tumuu' i uno nu tempo' anu sinanggo-Nyo “Sinaa Aiya” i uno nu Kitab nu Tumpu.

¹⁴Kita iwi-iwi' mosangalumo tiba i Kristus, i sa'angu' na tanga'an asan kita sampe toka imihinyo na montoongi hoso-hoson kapalesaya'an anu totu-totu'u anu daagi'mo hi kita salatanmo pe'e imoonanyo.

¹⁵ Aiyamo na anu tinulis i uno nu Kitab nu Tumpu, “De sinaa aiya komiu mohongomo potatae nu Tumpu, boli komiu panggaga, susumo mompolee' miu, tempo'nyo aha notomuhukmo hi Tumpu.”

¹⁶ Yoh, ihemo na to mia-mian anu nohongomo potatae nu Tumpu Allah lantas notomuhukmo hi Ia? Aijo'mo iwi-iwi' na mian anu i laya'mo i Musa nosabat lengkat mae i Mesir, kabai misa'o?

¹⁷Ka' ihe na tinambuha'anmo nu Tumpu patompulu' na taun na kinopinnyo? Kona hi aha anu binala dosa'mo, anu i hukummo mate i padang bone', kabai misa'o?

¹⁸Tempo'nyo Tumpu binasumpa'mo sumo uuka, “Aha madi' timbali minsoop i lipu' aijo' da timbali mingkain tiba aku” — ihe mule' na anu kokoonyo nu Tumpu? Anu nunu patui aijo'mo to mia-mian anu notomuhukmo hi Tumpu, kabai misa'o?

¹⁹Uuka aiya sinumbu'tomo, saba' aha madi' timbali minsoop, kalana aha madi' palesaya hi Tumpu.