Read Saluan IBRANI 4 Bible Online

IBRANI 4 - Saluan bible

IBRANI 4

¹Yo, janji' nu Tumpu daagi' ahi' sabole-bole opake, ka' kita mohumpakje pingkainan anu jinanji'nyomo. Jadi, sabole-bole ahi' obala'ingati da boli ko samian anu itina' hi komiu na madi' mohumpak pingkainan anu jinanji'nyomo aijo'.

²Kalana Lele Ma'ima' aijo', pinolelemo hi kita pokakana sumo hi aha. Panyo hi aha lele aijo' madi' kino kaliangannyo. Kalana mau mule' i hongomo nu aha, aha madi' ahi' palesaya.

³ Panyo kita anu pinalesayamo mohumpakmo pingkainan anu jinanji'mo nu Tumpu aijo'. Aijo' madi' sala' sumo anu tinaloakonmo nu Tumpu, sumo uuka, “Aku notambuha'mo ka' binasumpa'mo, ‘Aha madi' timbali minsoop da mohumpak pingkainan tiba Aku.’ ” Tumpu notatae sumo aijo' mau mule' pakalaja'an-Nyo i lapasmo salatanmo pe'e Ia nompotimbali dunia aiya.

⁴ Kalana mongkona sinaa ko popitu'nyo tinulismo i uno nu Kitab nu Tumpu sumo uuka, “I sinaa ko popitu'nyo Tumpu Allah ningkainmo madi'mo nombau apa-apaa na Ia.”

⁵ Mongkona han aijo' tinulis mule' sumo uuka, “Aha madi' timbali minsoop i lipu' aijo' da mohumpak pingkainan tiba Aku.”

⁶Jadi aha anu momona nohongo lele mongkona Lele Ma'ima' aijo', madi' mohumpak pingkainan aijo' kalana aha madi' palesaya. Desumo aijo' nanasamo taalu' daagi' ko to mia-mian sangga'at anu timbali mohumpak pingkainan aijo'.

⁷ Kalana Tumpu nontantukanmo sa'angu' na sinaa sangga'at mule', anu osanggohi “Sinaa Aiya”. Motau-taunmo na Tumpu nompoto'i han aijo' hi Daud, i uno nu ayat anu ingala ka' tinulis u'uka aijo', “De sinaa uuka komiu mohongomo potatae nu Tumpu, bolimo komiu panggaga.”

⁸ De bisuannyo i Yosua nombee'imo mian haha aijo' da mingkain sumo jinanji'mo nu Tumpu, saba' Tumpu madi'mo daagi' notatae mongkona sinaa sangga'at.

⁹Jadi, kona hi mian anu palesayamo hi Tumpu daagi' ko janji' da mingkain susumo Tumpu ningkainmo i sinaa ko popitu'nyo aijo'.

¹⁰ Kalana mian anu nohumpakmo pingkainan anu jinanji'mo nu Tumpu hi ia aijo', mingkain ahi' suele, ka' iwi-iwi' na pakalaja'annyo bolimo obau pokakana sumo hi Tumpu.

¹¹Kalana aijo', imbo' na kita da bala usaha totu-totu'u da mohumpak pingkainan anu jinanji'mo nu Tumpu aijo'. Boli sampe ko samian anu aiya hi kita na moteba' susumo aha naipuan mae, kalana madi'mo palesaya hi Tumpu.

¹²Potatae nu Tumpu aijo'mo na potatae anu tumuu' ka' mahoson; molingkudui tajom nu bajak anu ko matanyo ohua'. Potatae aijo' monsusuk toka-toka i kinyonyoa ka' santuu'; toka-toka i to losu-losuan ka' touak na buku, sahingga monsumbu' totu-totu'u pikilan ka' tanga'an nu mian.

¹³Madi' ko sa'angu' pe'e na anu konyawanyo na madi' nutoa nu Tumpu. Iwi-iwi na apaa langgo-langgo' ka' kantoan hi ahop-Nyo. Ka' kita tionyo ahi' mongakui apaa na anu binauntomo i hi Ia.

¹⁴Mokonyo aijo' kita tionyo ahi' mintoong hoso-hoson i pangakuan nu kapalesaya'anto. Kalana kita daagi' ko Imam Daka' anu talasanggo, anu ninsoopmo sampe tinoka i ahop nu Tumpu Allah — atina'mo i Yesus anak nu Tumpu.

¹⁵Imam Daka'to anu talasanggo aijo' misa' imam anu madi' moko ala mongoa'i apa-apaa na anu madi' opoko ala o oa'into. Panyo Ia sinobanmo i uno nu iwi-iwi' na han, pokakana sumo kita; ola Ia madi' nombau dosa'.

¹⁶Kalana aijo' imbo' na kita babaani na mangadap hi Tumpu Allah anu ma'ima' hondo na mompalentah. Tumpu mongkalibosije kita ka' mombalakati kita da kita nu tulungi de tokamo na tempo'nyo anu tinantukanmo.