Read Saluan IBRANI 8 Bible Online

IBRANI 8 - Saluan bible

IBRANI 8

¹ Pinolengkatan nu anu sinisik iwi-iwi' aiya atina'mo: Kita daagi' ko Imam Daka' anu sumo aijo', anu sumuhang mompalentah hingga-hinggat tiba Tumpu Anu Matangkas na kuasanyo kiita' i suluga'.

²Ia mompojalan pangkatnyo salaku Imam Daka' i Salipi' anu Susi', aijo'mo i uno nu Kemah nu Tumpu anu Susi', anu pinotinjo nu Tumpu, misa' pinotinjo nu mian.

³Batu-batu Imam Daka' i hangkat da monsombahkon koloban kabai anu osombahkon hi Tumpu. Sumo aitu mule' na Imam Daka' to; Ia tionyo daagi' ko apa-apaa anu osombahkon.

⁴Bisuannyo Ia jojoong i dunia aiya, Ia madi' timbali jadi imam kalana daagi'mo ko imam anu monsombahkon koloban anu otuntut i uno nu atulan nu agama Yahudi.

⁵ Pakalaja'an anu nubau nu aha salaku imam aijo' sabenannyo ola sumo sa'angu' na gambalan ka' lolung apaa na anu kiita' i suluga'. Aijo' pinoto'imo nu Tumpu hi Musa naipuan mae, tempo'nyo i Musa kahanda'mo mompotinjo Kemah nu Tumpu. Tumpu Allah notatae sumo uuka hi Musa, “O inau'! Iwi-iwi' aijo' tionyo ahi' nubau montiho sonto' anu pinotinganmo hi beleyum i bawo nu bungkutnyo.”

⁶Panyo uuka i Yesus nohumpakmo pangkat imam anu lebe talasanggo molingkudui anu kinalajamo nu to ima-imam haha aijo'. Kalana palajanjian anu pinodaagi'mo nu Tumpu hi mian atina'mo na palajanjian anu lebe ma'ima' kalana mimpu'u i janji' nu hahan anu lebe ma'ima'.

⁷Bisuanyo madi' kinokakulangannyo na janji' anu momonanyo saba' madi'mo palalu mombau palajanjian anu ko ohua'nyo.

⁸ Panyo Tumpu nontoamo kasala'an hi mian anu palesayamo hi Ia, sahingga Tumpu notatae, “O inau', tokaje mae na tempo'nyo, Aku mompodaagi'je palajanjian anu sala'je tiba bansa Israel, ka' tiba bansa Yehuda.

⁹Misa' sumo palajanjian anu binaung-Kumo tiba mompolee' nu aha tempo'nyo Aku nolaya' nosabat mae lengkat i lipu' Mesir. Aha madi' tinulu-tulutan anu binaung-Kumo tiba aha; aijo' na sababnyo Aku madi'mo mompajuli aha.

¹⁰Panyo uuka aiya, aiyamo na palajanjian anu Ku baumo tiba mian nu Israel, i sina-sinaa anu tokaje mae, koonyo nu Tumpu: Aku monguna'mo atulan-Ku i uno nu pikilan nu aha, ka' montulismo i kinyonyoa nu aha. Aku timbalimo Tumpu nu aha, ka' aha timbalimo mian anu palesayamo hi beleng-Ku.

¹¹Aha madi'mo palalu mompogulu' hi sampo tulunannyo, kabai mompoto'i hi utusnyo, ‘Sabole-bole osumbu' na Tumpu.’ Kalana aha iwi-iwi', ise' daka' saidi' mae nusumbu'je nu aha na Aku.

¹²Ku ampunije na kasala'an-kasala'an nu aha iwi-iwi'.”

¹³Kalana mompoto'imo sa'angu na palajanjian' anu bu'ou, jadi Tumpu Allah nompotimbalimo palajanjian anu momona aijo' naluso'mo ka' madi'mo talalo ma'ima'; ka' apaa na anu naluso'mo tantu malia'mo lanyaap.