Read Saluan IBRANI 9 Bible Online

IBRANI 9 - Saluan bible

IBRANI 9

¹Palajanjian anu momona, daagi' ko to atu-atulannyo na monsombah Tumpu ka' daagi' suele ko tampat ponsomban anu binau nu mian.

² Sa'angu' na kemah pinotinjo anu i sasu ahopnyo, sinanggohan Salipi' anu Susi'. I kiijo' daagi' ko sulaan nu sulu' ka' daagi' mule' ko meja' tiba roti anu osombahkon hi Tumpu.

³ I sasu unonyo, anu i hiku nu lalanse' anu ko ohua'nyo, daagi' ko salipi'nyo anu osanggohi Salipi' anu Susi' hondo.

⁴ I uno nu salipi' aijo' daagi' ko mezbah mosoni' na binau bau pompapuian kamangian, ka' daagi' mule' ko Peti' Palajanjian. Peti' aijo' i lapisan songko-songko nu mosoni'. I uno nu Peti' aijo' daagi' ko kuhon mosoni', isinyo manna, tokon i Harun anu ninsumpemo, ka' ohua' na kobakan nu batu bau pinontulisan; anu kiijo' tuli-tulis sampulu' na palentah nu Tumpu.

⁵ I bawo nu Peti' aijo' daagi' ko Patong nu Malaikat ohua', anu ko polipiknyo mongibalatakon Tumpu daagi' ko anu i kiijo'. Ohu-ohua' na polipik nu Malaikat aijo' binokanyo i bawo nu kolop nu Peti', aijo'mo tampat pongampunian dosa'. Panyo iwi-iwi' aijo' madi'mo opoko ala otutuhakon tempo' uuka toto sa'angu'.

⁶ Sumo aijo' na nongatun iwi-iwi'. Toka sansina-sinaa to ima-imam minsoop i unonyo sasu ahopnyo nu kemah aijo' mombau kalaja nu aha.

⁷ Anu minsoop i uno nu kemah anu kiijo' hondo-hondo i unonyo nu kemah aijo', ola Imam Daka'. Ia mombau kalajanyo ola minsan sataun. Aijo' nu kalaja momboa baso' da osombahkon hi Tumpu kalana dosa' nu butongnyo ka' kalana to dosa-dosa' anu madi' sangaja' na binau nu mian anu palesayamo hi Tumpu.

⁸Tiba atulan anu sumo aijo', Roh nu Tumpu mompotiju'mo totu-totu'u, saba' de daagi' sabole-bole kemah anu i sasu ahop aijo' opotinjo, jalan minsoop i uno nu Salipi' anu Susi' hondo aijo' ma'isa tabuka'.

⁹Aiya mongibalatakon tempo' uuka; alati'nyo saba' anu sola osombahkon ka' kolobaan binatang haha aijo' anu osombahkon hi Tumpu, madi' moko ala mompokopiani kinyonyoa nu mian anu momboa mae anu osombahkon.

¹⁰Kalana hahan anu obau aijo' ola otalima de anu o kaan, o inum, ka' ngangahan nu han anu bau pomposusi'. Iwi-iwi' ola atulan nu dunia anu opake ola sampe de tokamo na tempo'nyo Tumpu Allah mombali'imo atulan anu bu'ou.

¹¹Panyo i Kristus tinokamo salaku Imam Daka' lengkat mae i hahan anu ma'ima' anu polo-polo'mo daagi'. Kemah nu Tumpu anu pokalaja'an-Nyo salaku Imam Daka' aijo'mo na kemah anu lebe talasanggo ka' lebe ma'ima'. Aijo' misa' binau nu mian; alati'nyo misa' anu nolengkat mae i dunia anu pinotimbali aiya.

¹²I Kristus ninsoop i Salipi' anu Susi' hondo i uno nu kemah aijo', ola ninsan sampe toka sidu-sidutu'. Tempo'nyo aijo' Ia madi' nomboa baso' nu mee' mo'anenyo kabai baso' nu anak nu sapi' da osombahkon; Ia nomboamo posi baso'-Nyo ka' tiba jalan anu sumo aijo' Ia nompobebasmo kita sampe toka sidu-sidutu'.

¹³ Baso' nu mee' ka' sapi' mo'anenyo tiba abu' nu anak nu sapi', anu kinolobanakon, opake da bau pompipi' to mia-mian anu mahenyu susumo koonyo nu atulan nu agama, da aha timbali belesi'.

¹⁴Yo, de baso' tiba abu'nyo aijo' moko ala mompobelesi kahenyuan nu to mia-mian, apaa mule' baso' i Kristus. Kalana kuasa nu Roh anu sampe toka sidu-sidutu', i Kristus nonsombahkonmo posi butong-Nyo hi Tumpu salaku koloban anu ma'ima'. Baso'-Nyo mompobelesi kinyonyoanto da bolimo mombau atulan nu agama anu madi' kogunanyo, da kita timbali mombau palentah nu Tumpu anu tumuu'.

¹⁵Aijo' na sababnyo i Kristus tinimbalimo Jalan i sa'angu' na palajanjian anu bu'ou, da mian anu i lagamo nu Tumpu montalimamo to bala-balakat anu madi' mingkot anu jinanji'mo nu Tumpu. Iwi-iwi' aijo' tinimbalimo kalana daagi'mo ko anu sinilaka, aijo'mo i Kristus; ka' Ia sinilaka aijo' nompobebasmo mian i kasala'an-kasala'an anu binaumo nu aha tempo'nyo palajanjian anu momona daagi' pinake.

¹⁶De daagi' ko sulat anu montalangkan ihe na tumpunyo nu halata' nu mian anu sinilakamo, tantu daagi' ko bukuti'nyo nu mian anu nombaumo sulat aijo' montutuhakon ia aijo' sinilakamo.

¹⁷Kalana sulat ihe na tumpunyo nu halata' aijo' madi' opake de mian anu nombau sulat aijo' daagi' tutuu'. Sulatnyo aijo' opakemo de mian aijo' sinilakamo.

¹⁸Kalana aijo' janji' anu momonanyo suele tionyo o sela' nu baso'.

¹⁹ Momonanyo i Musa nompoto'i iwi-iwi' na palentah atulan nu Tumpu hi bansa Israel. Lapas aijo' i Musa nongalamo baso' nu anak nu sapi' ka' baso' nu mee' mo'anenyo, lantas ginalo'annyomo nu uee, lapas aijo' pinipi'akonnyomo i Kitab nu Atulan anu lengkat mae hi Tumpu ka' hi iwi-iwi' na bansa Israel mompake hemput hisop ka' bulu nu domba buhitnyo momea' hondo na bau pompipi'akon.

²⁰Hau-haunyo i Musa mokalaja aijo', ia motataemo, “Aiyamo na baso' anu ponsela' palajanjian lengkat mae hi Tumpu anu tionyo otuluti miu.”

²¹ Lapas mule' tiba han anu pokakana sumo aijo', i Musa nompipi'akonmo baso' aijo' suele i Kemah nu Tumpu ka' iwi-iwi' na to paka-pakakas anu opake monsombah Tumpu.

²² Memang atulan nu agama Yahudi, gagalan iwi-iwi na apaa oposusi' nu baso': ka' dosa' ola timbali o ampuni de daagi' ko baso' ojujuhakon.

²³Tiba han anu sumo aijo' to paka-pakakas anu mongibalatakon hahan anu i suluga' palalu oposusi'. Panyo hahan anu memang i suluga' aijo' mompalalui ahi' koloban anu lebe ma'ima'.

²⁴Kalana i Kristus madi' ninsoop i Salipi' anu Susi' anu binau nu mian, anu ola mongibalatakon Salipi' anu Susi' ka' anu sahondo-hondonyo. Posi i Kristus na minsoop i Suluga'; i kiita' mae Ia tempo' uuka mangadap hi Tumpu kalana kapentinganto.

²⁵Imam Daka' nu Yahudi sataun-toka sataun minsoop i Salipi' anu Susi' hondo i uno nu Laigan nu Tumpu momboa baso' nu binatang sa'angu'. Panyo i Kristus madi' ninsoop nonsombahkon butong-Nyo pino'uli-ulit.

²⁶Kalana desumo aitu, aijo' alati'nyo saja' pino'uli-ulit-Nyo na nongoa'i kasansala'an salatanmo pe'e dunia aiya pinotimbali. Panyo bukuti'nyo, uuka aiya i tempo' anu i mihinyomo aiya, Ia tinoka ola ninsan da mompobelesi dosa', aijo'mo nongkolobanakonmo posi butong-Nyo.

²⁷Tumpu nontantukanmo mian silaka ola minsan ka' lapas aijo' oputusimo nu Tumpu.

²⁸ Sumo aitu mule' na i Kristus ola minsan na sinombahkon salaku koloban mompobelesi dosa' nu mian da'isan. Ia po'ule'je toka kopinduannyo, misa' pa' kahanda' mongulusmo palakala nu dosa', panyo momposalamatmo to mia-mian anu saja' montanda'i katokaan-Nyo.