Read Saluan YAKOBUS 1 Bible Online

YAKOBUS 1 - Saluan bible

YAKOBUS 1

¹ To utu-utus mian anu palesayamo hi Tumpu iwi-iwi', anu nobagi-bagimo i songko-songko na dunia! Salam do'a lengkat hi belengku, i Yakobus, posaihon nu Tumpu ka' posaihon i Tumpu Yesus Kristus.

²To Utu-utus! De komiu mongoa'i ngangahan nu soba'an, oa'i na aijo' salaku sumo ka'untungan.

³Kalana osumbu' miu, de komiu tataap palesaya hi Tumpu tempo'nyo nongoa'imo soba'an, ahennyo: komiu timbalimo sabaan.

⁴O jaga da kasabalan nu kinyonyoa miu aijo' saja' opo boa-boa sampe komiu totu-totu'u ma'ima'mo ka' madi'mo kakulangan i uno nu han mau pe'e pa' apaa.

⁵De daagi' ko samian itina' hi komiu anu madi' talalo pande, tionyo ahi' ia mongkakase hi Tumpu, sahingga Tumpu mombee'i kapandean hi ia; kalana toto samian sanang na Tumpu Allah mombee'i kalana kanonongannyo ka' kalana kalibosannyo.

⁶Panyo mian anu momoita, tionyo ahi' palesaya; ia madi' timbali bata-bata. Kalana mian anu bata-bata atina' sumo bokon i ambai anu nupuuhi nu mombun mokiijo' ka' mo'uuka mae.

⁷Mian anu sumo aijo' madi' tataap na pikilannyo; ia madi' moko ala mongala sa'angu' na kaputusan apa-apaa i han iwi-iwi' apaa na anu binaunyomo. Kalana aijo', bolimo so'i-so'i ia montaha'imani da mohumpak apa-apaa lengkat hi Tumpu.

⁹Mian Kristen anu kasiasi de nuhangkatmo nu Tumpu tionyo ahi' saja' mongoa'i lame'.

¹⁰ Ka' mian Kristen anu kaya de nu tauhakonmo nu Tumpu tionyo ahi' suele saja' mongoa'i lame'. Kalana mian kaya mingkot sumo bunga nu hemput.

¹¹De bete'mo na sinaa ka' panasnyo talalomo mahangehes, sahingga hemput aijo' mangkalualemo ka' bunganyo mohudu'mo ka' madi'mo ma'ima'. Sumo aitumo singkona na mian kaya; ia silaka hau-haunyo ia mompojalan usahanyo.

¹²Mohumpak ka'ima'an na mian anu sabaan de ia monta'up soba'an. Kalana de ia moko alamo montahan soba'an aijo', ia mohumpakje tambonyo, aijo'mo kantumuu'an anu jinanji'mo nu Tumpu Allah hi to mia-mian anu mongkalibosi Tumpu.

¹³De ihehe na mian tagoda nu soba'an anu sumo aijo', boli ia motatae, “Soba'an aiya nolengkat mae hi Tumpu,” kalana Tumpu madi' opoko goda nu anu ma'idek, ka' madi' singkona monggoda mau pe'e pa' samian.

¹⁴Panyo mian tagoda de ia ahi' memang mongkamiluimo ka' ko tanga'annyo anu ma'idek.

¹⁵Ka' mule', de tanga'annyo anu ma'idek aijo' obatuki, atina'je ka' toka na dosa'; ka' de dosa' tahahumo ka'ahenannyo aijo'mo na kapatean.

¹⁶Boli komiu o akali, to Utu-utusku anu ku ku kanonongi!

¹⁷Batu-batu taju anu ma'ima' ka' palasen anu ma'ima' pinolengkatannyo mae i suluga', tinau'akon nu Tumpu, anu Nompotimbali iwi-iwi na anu ma jingka i langit. Iamo na Tumpu anu madi' mongabali' ka' madi' mule' monsaduakon kapintungan mau mule' pa' mosiamo.

¹⁸Posi pongka'oho'-Nyo na Ia nompotimbalimo kita to ana-anak-Nyo kalana nohongomo potatae-Nyo anu totu'u. Binau-Nyo sumo aijo' da kita mohumpak tampat anu talasanggo molingkudui iwi-iwi' anu ko nyawa-Nyo anu pinotimbalimo nu Tumpu.

¹⁹O intomakon na aiya ima-ima', to Utu-utus anu okanonongi! Batu-batu mian tionyo ahi' malia' na mohongo, panyo momalas na motatae ka' boli sampa' motambuha'.

²⁰Mian anu motambuha' madi' moko ala mombau anu ma'ima', anu momposanang kinyonyoa nu Tumpu.

²¹Mokonyo aijo', alinmo na kabiasa'an anu mahenyu ka' ma'idek. Boli kobubuun na montalima potatae anu sinu'anmo nu Tumpu Allah i uno nu kinyonyoa miu, kalana potatae aijo' ko kuasa momposalamat komiu.

²²Tionyo ahi' obau miu apaa na anu pinoto'imo nu Tumpu, boli ola mohongo, sahingga desumo aijo' oposi akalimo miu na butong miu.

²³Mian anu mohongo potatae nu Tumpu, panyo madi' obau i uno nu palabuatannyo atina' sumo mian anu hau-haunyo montoa ohupnyo anu sahondo-hondonyo i ahop nu mongkitaan.

²⁴Nupoko toa ima-ima', ia mambamo panyo balomo nu kolilimi mosia na balu-balu'nyo nu ohupnyo aijo'.

²⁵Atulan nu Tumpu na'ima'mo hondo ka' ko kuasa mompobebas mian. Ka' mian anu monggulu'i ka' mongintomakon ima-ima' tiba mule' montuluti atulan aijo', ka' misa' ola mohongo lantas okolilimimo, mian anu aijo' apaa na anu nubau nu aha nu balakati nu Tumpu.

²⁶De daagi' ko toto samian anu mongoa'i butongnyo mian anu tulu-tulutan i agama, panyo ia madi' mombala'ingati jila'nyo, saba' ia mongakali posi butongnyo; ia monsombah Tumpu madi' ko kaliangannyo.

²⁷Tulu-tulutan i agama anu obau sahondo-hondonyo ka' madi' ko sala'nyo, susumo koonyo nu Tumpu Tuumanto aijo'mo: montulungi to ana-anak anu unon madi'mo ko tina ka' tuumanyo, ka' to balu-balu anu sinusa'mo, ka' mombala'ingati butong da boli nu idei nu dunia aiya.