Read Saluan YAKOBUS 5 Bible Online

YAKOBUS 5 - Saluan bible

YAKOBUS 5

¹To Utu-utus, mian anu toto kaya-kaya! Potombihing mae na pokinde'ku. Tionyo ahi' komiu humang ka' montando'i kalana kasansala'an o'oa'imo miu!

² Kakaya'an nu belemiu nahutakmo. Baju' miu kinaanmo nu ane'.

³Mosoni' ka' salaka miu kinampuhanmo nu atak; ataknyo na timbali sakisi nongewa komiu ka' mongkekedi sampe mingkot butong miu sumo apu. Komiu nontambunmo halata' bau pontoukai tempo' anu malia'mo mingahen.

⁴ Komiu madi' nombayan tambonyo nu to mia-mian anu mokalaja i ale' nu belemiu. Uuka aiya potombihing na aha notusa'mo! To mia-mian anu nolimu'akon hasin nu ale' miu, noloobo'mo momoita tulung, ka' lobo' nu aha tinokamo i bihing nu Tumpu, Tumpu Anu Matangkas na Kuasanyo.

⁵Komiu tinumuu'mo molabi-labi ka' nongoa'imo kasanangan nu dunia aiya. Komiu sumomo anu hau-haunyo mompilompo'imo butong miu da o kolot toka i sinaanyo.

⁶Komiu nohukummo ka' nompateimo to mia-mian anu madi' ko sala'nyo, ka' aha madi' nongewa komiu.

⁷Kalana aitu, osabalakon to Utu-utus, sangkutnyo Tumpu toka. Toa mosia na kosabaannyo na samian anu topo ale' montanda'i sampe tano'nyo mohasinakon anu ko olinyo hi ia. Ia sabaan na montanda'i ujan loonu nu mohudu' na hon nu kau' ka' ujan loonu nu mimbunga na kau'.

⁸Komiu suele ahi' sabaan ka' oposanang na kinyonyoa, kalana sinaa katokaan nu Tumpu ohanimo.

⁹Boli lewa' motusa' ka' mompaha pisa-pisala'i, da komiu madi' o hukum nu Tumpu. O inau'! Mian Kopian ingohanimo, malia'mo toka.

¹⁰To Utu-utus, o inau' na to nabi-nabi anu binasisikmo salaku nowakini mae Tumpu. Aha sinabanmo ka' madi' nompele-pele' na nongoa'i sansala. Jadi, ala na aha da salaku bau sonto'.

¹¹ Aha osanggohi mohumpakmo ka'ima'an kalana aha madi' nompele-pele'. Komiu nohongomo i Ayub sinaban, ka' komiu nonsumbu'mo mosia na Tumpu imihinyo nombalakati ia. Kalana Tumpu talalo hondo mongkalibosi ka' manonong.

¹² Anu talalo hondo penting, aijo'mo: Boli basumpa', mau tiba sanggo nu langit, mau tiba sanggo nu tano', kabai tiba sanggo nu mau mule' pa' apaa. Ola ahi' otaloakon “Ii'” de kahanda' nu beleyum ii', ka' “Madi'” de kahanda' nu beleyum madi'; da komiu boli opokonai hukuman nu Tumpu.

¹³De itina' hi komiu daagi' ko anu hau-haunyo susa', tionyo ahi' ia balado'a. De ko anu lame', panyanyi na ia ka' puji' na Tumpu.

¹⁴ De ko anu masakit, tionyo ahi' ia molaga to pola-polaya' nu jama'at. Ka' tionyo ahi' polaya' haha aijo', mondo'akon mian anu masakit aijo' ka' monsapui nu lanya', ka' osanggoakon i sanggo nu Tumpu.

¹⁵De do'a nu aha opotoka nu palesaya anu totu-totu'u, Tumpu nompa'alin mian anu masakit aijo', ka' mongampuni to dosa-dosa'nyo anu binaunyomo.

¹⁶Kalana aijo', tionyo ahi' komiu mompaha aku-akui kasala'an ka' mompaha do'a-do'akon, da komiu opa'alin. Do'a nu anu montuluti pongka'oho' nu Tumpu, ko kuasanyo Anu Matangkas.

¹⁷ I Elia pokakana mian sumo kita. Ia binalado'a totu-totu'u da ujan boli tudun, sahingga ujan madi' tinudun tinotolu' ka' inintonga' na taun na kinopinnyo.

¹⁸ Lapas aijo' binalado'a mule' na ia, sahingga langit nontudunakonmo ujan, lantas tano' po'ule'mo mule' kino hasinnyo.

¹⁹To Utu-utusku! De itina' hi komiu daagi' ko pa' anu madi'mo daagi' montuluti pangajalan anu lengkat mae hi Tumpu, lantas mian sangga'at mompotimbali mian aijo' po'ule' minsusule' hi Tumpu Allah,

²⁰ o inau' na ayat aiya: Mian anu mompotimbali mian baladosa' mobalikmo mae mompala'i jalannyo anu sala', mian aijo' nomposalamatmo santuu' nu mian anu binala dosa'mo aijo', anu sabenannyo i natemo ka' nompotimbalimo manjoo' na dosa' ingampunanmo. Tabea' mami, I Yakobus 12